سۋرەتتى تۇسىرگەن مۇحتار حولدوربەكوۆ
باس باسىلىمنىڭ قابىرعاسىندا ۇيىمداستىرىلعان جۇزدەسۋگە ءماجىلىس دەپۋتاتتارى, تانىمال اقىن-جازۋشىلار, عالىمدار, جوعارى وقۋ ورنى باسشىلارى, جۋرناليستيكا ارداگەرلەرى, بەلگىلى زيالى قاۋىم وكىلدەرى قاتىستى.
– مەملەكەت باسشىسى قاسىم-جومارت توقاەۆتىڭ «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىنداعى 11 باعىت ەلدىڭ ءال-اۋقاتىن دۇرىستاپ, مەملەكەتتىڭ دامۋىنا جاڭا سەرپىن بەرەتىنى انىق. وسى 11 باعىتتىڭ قاي-قايسىسى بولسا دا قاراپايىم حالىقتىڭ ەرتەڭىن ويلاعان شارالار دەپ ايتۋعا بولادى. ارينە ىندەت باستالعالى ءومىر-سالتىمىز وزگەرىپ, وزگەشە ءومىر سۇرۋگە بەيىمدەلدىك. سولاي بولا تۇرا, پاندەميا كەزىندە ۇلت بولىپ ۇيىسقانىمىزدى, ەل بولىپ قالىپتاسقانىمىزدى كورسەتە بىلدىك. ارقايسىمىزدىڭ بويىمىزدا بۇرىن كورىنبەي جۇرگەن, بىلىنبەي كەلگەن قايىرىمدىلىق, باۋىرماشىلدىق, جومارتتىق سىندى قاسيەتتەر وياندى.
بىراق پاندەميا كەزىندە بۇقارالىق اقپارات قۇرالدارى ارقىلى اۋقىمدى ءتۇسىندىرۋ جۇمىستارىن جۇرگىزىپ جاتساق تا, كەي كەزدە تارتىپكە باعىنبايتىن تۇستارىمىز دا كەرى اسەرىن تيگىزگەنىن كورىپ وتىرمىز. اباي اتامىزدىڭ زامانىنان بەرى ايتىلىپ كەلە جاتقان ىسىراپشىلدىق, داراقىلىق, جالقاۋلىق, جاۋاپسىزدىق سىندى جاعىمسىز ادەتتەردەن ءالى دە ارىلا قويعان جوقپىز, – دەدى ا.بالاەۆا.
ۆەدومستۆو باسشىسىنىڭ ايتۋىنشا, وسى وعاش قىلىقتار تۋرالى ەل پرەزيدەنتى بيىلعى جولداۋىندا دا ايتقان بولاتىن. ەندىگى ماقسات – سانا-سەزىمدى وزگەرتۋ, جاڭا, جاڭعىرعان ۇلتتىڭ بولمىسىن قالىپتاستىرۋ. بۇل رەتتە, مينيستر بۇل جۇمىستاردى اتقارۋ بارىسىندا كەزدەسۋگە قاتىسۋشىلاردىڭ ءرولى ۇلكەن ەكەنىن ايتىپ, ولارعا زور سەنىم ارتاتىنىن جەتكىزدى.
– پرەزيدەنت ايتىپ كەتكەن جاڭا قاسيەتتەردى ءار قازاقستاندىق ازامات ءوز بويىندا تاربيەلەۋى ءتيىس. ول ءۇشىن جۇمىلا جۇمىس ىستەپ, ايقىن ماقساتقا تالپىنۋ قاجەت. بۇل جۇمىستاردى قالاي ۇيىمداستىراتىنىمىزدى, قانداي ءىس-شارالار اتقارىپ, اقپاراتتىق جۇمىستاردىڭ مازمۇنىن قالاي وزگەرتەتىنىمىزدى بىرلەسىپ اقىلداسامىز دەگەن سەنىمدەمىن, – دەدى ۆەدومستۆو باسشىسى.
ءمينيستردىڭ ايتۋىنشا, مەملەكەت باسشىسىنىڭ بيىلعى جولداۋىن بارىنشا ءتيىمدى جۇزەگە اسىرۋ ءۇشىن باستىسى بىرلەسكەن ارەكەت پەن جۇدىرىقتاي جۇمىلعان جۇمىس قاجەت.
– بۇل جيىن ىندەت بەلەڭ العالى بەرى ۇيىمداستىرىلعان جۇزدەسۋلەردىڭ اۋقىمدىسى دەپ بىلەمىن. سەبەبى قازىر كوپ باسقوسۋلار ونلاين رەجىمدە ءوتىپ جاتىر. بۇگىنگى جيىنعا ەل اعالارى, قوعامنىڭ تامىرىن تاپ باساتىن جازۋشىلار, اقىندار, زيالى قاۋىم وكىلدەرى, ۋنيۆەرسيتەت رەكتورى, حالىق قالاۋلىلارى, ءباسپاسوز قۇرالدارىنىڭ وكىلدەرى قاتىسىپ وتىر. سوندىقتان بۇل تالقىلاۋدىڭ ءمان-ماڭىزى جوعارى بولادى دەپ سەنەمىن. پرەزيدەنت جولداۋدا «قازىرگى مىندەت – حالقىمىزدىڭ جاڭا بولمىسىن قالىپتاستىرۋ, تۇتاس ۇلت ساپاسىن ارتتىرۋ. ادامدى جانە قوعامدى ۋاقىت تالابىنا ساي جەتىلدىرۋ قاجەتتىگىن ءومىردىڭ ءوزى كورسەتىپ وتىر» دەپ اتاپ ءوتتى. بيلىك پەن قوعام اراسىنداعى ديالوگ تۋرالى باسا ايتتى, – دەدى «Egemen Qazaqstan» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى.
بيلىك پەن حالىقتىڭ اراسىندا التىن ارقاۋ بولىپ جۇرگەن ازاماتتار رەتىندە ەڭ الدىمەن دەپۋتاتتاردى ايتۋعا بولار ەدى. ەلدىڭ ءسوزىن سويلەپ, مۇڭىن جەتكىزىپ جۇرگەن دە وسى دەپۋتاتتار.
– «جولداۋ نە ءۇشىن جاسالادى؟» دەگەن ماسەلەگە توقتالاتىن بولساق, ءاربىر جولداۋ رەفورمالاردى جۇزەگە اسىرۋ ءۇشىن قاجەت. سەبەبى ءار زاماننىڭ وزىندىك تالاپتارى, وزىندىك سۇرانىستارى بولادى. سول ماسەلەلەردىڭ شەشىمىن تابۋ ءۇشىن دە وسىنداي جولداۋ كەرەك. سولاي بولا تۇرا, وسى جولداۋدا ءبىر ساباقتاستىق بار. ماسەلەن, پرەزيدەنت وسىدان بەس جىل بۇرىن ەلباسى جولعا قويعان «بەس ينستيتۋتسيونالدىق رەفورمانى جۇزەگە اسىرۋ جونىندەگى ۇلت جوسپارىندا» كوتەرىلگەن ماسەلەلەردى ءارى قاراي جۇزەگە اسىرۋدىڭ جولدارىن ۇسىنىپ وتىر. سونىڭ ىشىندە كاسىبي ۇكىمەتتى قالىپتاستىرۋ دا, ءتيىمدى ەكونوميكا قۇرۋ دا, ۇلتتىق قۇندىلىقتاردى ۇمىتپاۋ دا بار. پرەزيدەنت ء«بىزدىڭ تۇيتكىلدى تۇستارىمىز بەن كەمشىلىكتەرىمىزدى جاقسى بىلەمىز» دەدى. بۇل مەنىڭ ويىمشا قوعامدى ويلاندىراتىن ماسەلە. ۇكىمەت, بيلىك ونى بىلمەي وتىرعان جوق. بارلىعىن ءبىلىپ, كورىپ, سونى شەشۋ جولدارىن ايتىپ وتىر.
كەي كەزدەرى اسىققان دا, كەشىككەن دە زيان. الايدا بۇگىنگى جيىننىڭ ءوزى دەر كەزىندە جاسالىپ وتىر. سەبەبى كەي كەزدەرى كەشىگىپ قابىلدانعان شەشىمنىڭ ءوزى جاي عانا زيان ەمەس, ۇلتتىق قاۋىپسىزدىگىمىزگە قاتەر توندىرەدى. سوندىقتان العاشقىلاردىڭ ءبىرى بولىپ وسىنداي جيىندى ءباسپاسوز قۇرالدارى, زيالى قاۋىم وكىلدەرى جاساپ وتىرعانى وتە قۇپتارلىق,– دەدى ءماجىلىس دەپۋتاتى دارحان مىڭباي.
دەپۋتاتتىڭ ايتۋىنشا, كەز كەلگەن مەملەكەتتىڭ جۇمىس ىستەۋى ءۇشىن ءتيىمدى ەكونوميكاسى, قوعام سەنىم ارتاتىن زاڭى بولۋى كەرەك. بۇل رەتتە دەپۋتات وسى زاڭ شىعارۋ ماسەلەسىنە دە توقتالىپ ءوتتى. سەبەبى جولداۋدا دا زاڭناما ماسەلەسىنە قاتىستى قانشاما جاقسى ۇسىنىستار ايتىلعان ەدى. ونى جۇيەلى جۇزەگە اسىرۋ بۇكىل كورپۋستىڭ ەمەس, ەڭ الدىمەن ءار دەپۋتاتتىڭ ارەكەتىندە تيىمدىلىك بولۋى كەرەك.
– بۇل جولداۋدىڭ ەڭ الدىمەن حالىقتىڭ مۇددەسىنە باعىتتالعانى انىق كورىنىپ وتىر. وسىدان ءبىر جىل بۇرىنعى جولداۋىندا مەملەكەت باسشىسى «حالىق ۇنىنە قۇلاق اساتىن مەملەكەت» تۇجىرىمداماسى تۋرالى ايتقان بولاتىن. سونىڭ ءبىز ۇستانىمعا, بيلىكتىڭ جۇمىس ىستەۋ پرينتسيپىنە اينالىپ كەلە جاتقانىنا كۋا بولدىق. ءسوزدىڭ ىسكە اينالعاندىعىنىڭ كۋاسىمىز. از ۋاقىتتىڭ ىشىندە كوپتەگەن قوردالانعان ماسەلەلەر كوتەرىلدى. سول ماسەلەلەردىڭ بارلىعىن بارىنشا جىلدام شەشۋگە نازار اۋدارىلدى.
ەندىگى كۇنى بيلىك پەن حالىقتىڭ اراسىنداعى بايلانىس ۇنەمى ۇزىلمەۋى ءتيىس. وتانداستارىمىزدىڭ ويىن, جانايقايىن ەستي بىلەتىن, جۇيەلى جۇمىس جاسايتىن مەحانيزم بولۋى كەرەك. ونى جاسايتىن ساياسي پارتيالار, قوعامدىق ۇيىمدار, قوعامدىق بىرلەستىكتەر, ءماجىلىس پەن ءماسليحاتتار. مىنە, بۇل جولداۋدا وسى ۇيىمدارعا باسا نازار اۋدارىلدى. ولاردىڭ قۇزىرەتى ارتىپ, قوسىمشا قۇقىق بەرىلەتىنى تۋرالى دا بىلدىك, – دەدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, تاريح عىلىمدارىنىڭ دوكتورى ەرلان سىدىقوۆ.
ءسوز سوڭىندا ۋنيۆەرسيتەت رەكتورى ايدا بالاەۆاعا «اباي اكادەمياسى» اياسىندا جارىق كورگەن كىتاپتاردى تارتۋ ەتتى.
– بۇل جولداۋدىڭ ەرەكشەلىگى سول – بيىل حالقىمىز وقيعادان وقيعاعا سوقتىعىپ, ونىڭ ۇستىنە الدەمدەگى ىندەت ەڭسەمىزدى باسىپ تۇرعان كەزدە جاسالىندى. قازىر حالىقتىڭ كوڭىلى كوپ نارسەگە الاڭدايدى. «قىتاي سياقتى ميللياردتاعان سانىمىز دا جوق. وتانداستارىمىز وسى ىندەتتەن وپات بولىپ كەتپەي مە, ەل نە بولادى؟» دەگەن ويلار ءار ادامدى تولعاندىرىپ وتىر. جولداۋدى قاسىم-جومارت كەمەل ۇلى وسى ماسەلەدەن باستادى. ىندەتتىڭ كەزىندە بيلىك حالىقتان ەشنارسەنى جاسىرماعانىن, ەلمەن بىرگە كۇرەسكەنىن جەتكىزدى.
جولداۋ – ەلدىڭ ىشىندە قايناپ جاتقان تۇيتكىلدەردىڭ بارلىعىنا جاۋاپ بەردى دەپ سەنەمىن. جولداۋ تۋرالى الۋان ءتۇرلى پىكىر ايتىپ جاتقاندار بار. ءبىلىپ ايتاتىندار دا, داۋرىعىپ ايتاتىندار دا بار. سوندىقتان بيىلعى جولداۋدى تالداپ, تەرەڭنەن تولعانىپ قارايتىن بولساق, الداعى ۋاقىتتا مۇلدە جاڭا وزگەرىس اكەلەتىن قۇندى قۇجات ەكەنىن تۇسىنەمىز, – دەدى مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى.
ونىڭ ايتۋىنشا, بۇل جولداۋ ۇلتتىڭ تاعدىرىن, حالىقتىڭ جاعدايىن قالاي شەشۋ ماسەلەلەرى وتە كەمەلدىكپەن, جان-جاقتى ويلانىپ بارىپ ايتىلۋىمەن, كەلەشەكتىڭ كوكجيەگىنە باراتىن جولدى ايقىنداۋىمەن قۇندى.
– ايدا عالىمقىزى بۇگىنگى سوزىندە «باق جايىندا, اقپارات جايىندا اشىق ايتىپ وتىرساڭىزدار» دەدى. وسىنىڭ وزىنەن-اق جۋرناليستيكانىڭ, ءباسپاسوزدىڭ قوعامداعى ورنى ايقىندالىپ تۇر. سەبەبى قوعامدا نەندەي دۇنيە اتقارىلاتىن بولسا, سول ەڭ الدىمەن بۇقارالىق اقپارات قۇرالدارىندا تاراتىلادى. سونىڭ تاراتىلۋى قانداي دەڭگەيدە, كوپتىڭ كوڭىلىنەن شىعا ما, ونداعى ايتىلاتىن ءسوزدىڭ كوكەيگە قونۋى قالاي, ۇعىنىقتى ما دەگەن ماسەلەردى شامامىز كەلسە اشىق ايتۋىمىز كەرەك. جولداۋدى الدىمەن تىكەلەي ەفيردەن كورىپ, تىڭدادىم. راديودان ەستىدىم. كەلەسى كۇنى «Egemen Qazaqstan» گازەتىنەن وقىدىق. گازەتتەن وقىعاننىڭ ءجونى ءبىر بولەك. سەبەبى تەلەديداردان كورىپ, راديودان ەستىپ كوپ دۇنيەنى ۇعىنا المايسىڭ. ارينە, كورەسىڭ, اقپارات الاسىڭ. بىراق «Egemen Qazaqstan» گازەتىن وقىپ, استىن سىزىپ وتىرماساڭ ويعا وڭايلىقپەن قونبايدى.
جولداۋدا بارلىق ماسەلەنى قامتۋ قيىن. دەگەنمەن, قازىر دەنساۋلىق ساقتاۋ سالاسىنىڭ جۇمىسى اسا ماڭىزدى بولىپ وتىر. سونىمەن قاتار پاندەميانىڭ كەسىرىنەن ەلىمىزدىڭ ءبىلىم بەرۋ سالاسى دا تىعىرىققا تىرەلىپ تۇر. اسىرەسە مەكتەپ وقۋشىلارىنا وڭاي بولمايتىنى انىق. كەي وبلىستاردا ءتىپتى وقۋشىلاردىڭ 7 پايىزى عانا مەكتەپ تابالدىرىعىن اتتاعان ەكەن. وسى جىلداردا ەلىمىزدە قانداي كەرەمەت مەكتەپتەر سالىندى. سولاردى وقۋشىعا تولتىرۋدىڭ ورنىنا ءبىر ءۇيدىڭ بەس بالاسىن ءبىر كومپيۋتەرگە تەلمىرتىپ قويىپ, قاراپ وتىرمىز. وسىنداي وزەكتى ماسەلەلەردى دە ۇمىتپاۋ قاجەت. مەملەكەت باسشىسىنىڭ جولداۋىن تۇسىندىرۋدە, حالىققا جەتكىزۋدە, ەلگە ناسيحاتتاۋدا بۇقارالىق اقپارات قۇرالدارىنىڭ, سونىڭ ىشىندە وسى باس باسىلىمىنىڭ ماڭىزى زور, – دەدى جۋرناليستيكا ارداگەرى, عالىم نامازالى وماشەۆ.
ونىڭ ايتۋىنشا, جولداۋدى ناسيحاتتاۋ, ءتۇسىندىرۋ ىسىندە تەلەديدار مەن باسىلىمداردان بولەك, راديونىڭ مۇمكىندىگىن دە بارىنشا ءتيىمدى پايدالانعان ءجون.
– جولداۋدا كوپ نارسەلەر ايتىلدى. جولداۋدا ايتىلعان ماسەلەلەردى ورىنداۋ بار دا, ونى قاداعالاۋ تاعى بار. جولداۋدا ايتىلىپ جاتقان دۇنيەلەر ورىندالۋىمەن قاتار, تياناقتى قاداعالانىپ جاتسا, ءبىراز نارسەگە قولىمىز جەتكەن بولار ەدى. اسىرەسە جولداۋدى ناسيحاتتاۋ, ءتۇسىندىرۋ بارىسىندا وسىنداي ولقىلىقتار ورىن الادى. حالىققا كەرىسىنشە جولداۋدى بارىنشا قاراپايىم, تۇسىنىكتى تىلمەن جەتكىزگەن ماڭىزدى. بيىلعى جولداۋدا پرەزيدەنتتىڭ ويى وتە جاقسى, تۇسىنىكتى ايتىلدى. سونىڭ ىشىندە مەملەكەتتىك قىزمەتكەرلەردى 25 پايىزعا قىسقارتۋ ماسەلەسى ماڭىزدى دەپ سانايمىن. ونىڭ ورنىنا مەملەكەت باسشىسى ايتىپ وتكەندەي قوعامدىق كەڭەستەردىڭ سانىن ارتتىرعان ابزال. وسى ۇسىنىس حالىقتىڭ كوڭىلىنەن شىقتى دەپ ويلايمىن.
سونىمەن قاتار قازاقستانداعى ءار التىنشى وتباسىنىڭ ۇرپاقسىز وتىرعانى جانىما باتتى. وسى ماسەلەنى شەشۋگە قاتىستى ەل پرەزيدەنتى ۇسىنعان باستاماعا حالىق قاتتى قۋانىپ جاتىر. وسىنداي دۇنيەلەر حالىققا تياناقتى, جەتكىلىكتى تۇردە ايتىلدى دەپ ويلامىن, – دەدى جازۋشى-دراماتۋرگ روزا مۇقانوۆا.
قالامگەردىڭ پىكىرىنشە, ايتىلا بەرەتىن سىن دا, ءمىن دە كوپ بولادى. ەڭ باستىسى, مەملەكەت باسشىسىنىڭ بيىلعى جولداۋى حالىقتىڭ مۇددەسىن كوزدەپ, جاعدايىن جاقسارتۋعا باعىتتالعان.
– وتكەن عاسىردىڭ 50-جىلدارىنىڭ اياعىندا كسرو-داعى تۋدىڭ ەڭ جوعارى كورسەتكىشى قازاق ايەلدەرىنە تيەسىلى ەدى. كەيىن ءبىز وسى ۇردىستەن جاڭىلىپ قالدىق. سونى قالپىنا كەلتىرۋىمىز قاجەت. بۇگىندە كورشى وزبەكستان حالقىنىڭ 30 ميلليوننان اسىپ كەتكەنىن بىلەمىز. وسى ورايدا ءبىزدىڭ ەلىمىزگە دە بەلگىلى ءبىر شارا قابىلداپ, ولقىلىقتىڭ ورنىن تولتىرۋ قاجەت. مەملەكەت باسشىسى بيىلعى جولداۋدا ەلدەگى دەموگرافيالىق احۋال ماسەلەسىن الدىڭعى ورىنعا شىعارىپ, ۇرپاقسىز وتىرعان جۇپتارعا قوماقتى قولداۋ كورسەتىلەتىنىن جەتكىزدى. قۋانارلىق جاعداي. سونىمەن قاتار «سەرپىن» باعدارلاماسىنا دا باسا نازار اۋدارۋىمىز قاجەت. وڭتۇستىك وڭىردەگى قاراكوزدەرىمىزدى ەلىمىزدىڭ وزگە وڭىرلەرىنە كوشىرىپ, كوپتەگەن ماسەلەنىڭ باسىن اشىپ الۋعا بولادى. سوندىقتان حالىق سانى دا, دەموگرافيالىق احۋال ماسەلەسى دە پرەزيدەنت جولداۋىندا جارقىن كورىنىس تاپقانىنا اسا قۋانىشتىمىن, – دەدى تاريح عىلىمدارىنىڭ دوكتورى بۇركىت اياعان.
عالىمنىڭ ايتۋىنشا, ەلىمىزدەگى دەموگرافيالىق ماسەلەنى جۇيەلى شەشە الاتىن بولساق, حالىق ءوسىمى دە تۇراقتاناتىن بولادى.
– مەملەكەت باسشىسى بىلتىرعى جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن ۇسىنعان بولاتىن. سول جىلدىڭ وزىندە كوپتەگەن وزەكتى ماسەلەلەر شەشىلدى. ون شاقتى جىلدان بەرى قابىلدانباي كەلگەن «ارداگەرلەر تۋرالى» زاڭدى قابىلدادىق. ياعني زاڭنامالىق تۇرعىدان بىلتىرعى جولداۋدا ايتىلعان دۇنيەلەردى پارلامەنت تولىعىمەن قامتاماسىز ەتتى. بيىلعى جولداۋدا دا الدىمىزعا ۇلكەن مىندەتتەر قويىلىپ وتىر. كوپتەگەن زاڭ قابىلداناتىن بولادى, – دەدى ءماجىلىس دەپۋتاتى كارىباي مۇسىرمان.
دەپتۋتاتتىڭ ايتۋىنشا, پارلامەنت دەپۋتاتتارى اسىرەسە الەۋمەتتىك جەلىدە كوپ سىنالادى. تەلەديداردان كورىپ ءبىراۋىزدان داۋىس بەردى دەپ سىناپ جاتادى. شىن مانىندە نەگىزگى تالقىلاۋ جۇمىس توپتارىندا, كوميتەتتەردە وتكىزىلەدى.
– بۇگىن وتە جاقسى ويلار ايتىلدى. پىكىرلەردە دە بەلگىلى ءبىر ۇيلەسىم بولدى. ەڭ باستىسى, جولداۋدىڭ مازمۇنى مەن ونىڭ جۇزەگە اسۋ ماسەلەسى ۇيلەسىمدى بولسا, مەملەكەتتىك اپپارات پەن قوعامدىق قارىم-قاتىناستىڭ اراسىندا ۇيلەسىم بولسا, ءار ادامنىڭ ىشكى دۇنيەسىندە, ءسوزى مەن ىسىندە ۇيلەسىم بولسا كوپ نارسەگە قول جەتكىزەمىز دەپ سەنەمىن, – دەدى ا.بالاەۆا.
جيىن سوڭىندا مينيستر «Egemen Qazaqstan» گازەتىنىڭ ۇجىمىمەن, جاس جۋرناليستەرمەن جۇزدەستى. ۆەدومستۆو باسشىسى ۇجىمنىڭ جۇمىسىنا جوعارى باعا بەرىپ, باس باسىلىمدى مۇقيات قاراپ وتىراتىنىن اتاپ ءوتتى.
– جۇمىس كۇنىمىز باس باسىلىمعا شولۋدان باستالادى. ەلىمىزدەگى اپتانىڭ ءار كۇنىندە شىعاتىن بىردەن-ءبىر گازەتتىڭ مازمۇنى دا وتە تەرەڭ. جاقسى ماقالالاردى وزىمە ءتۇرتىپ قويامىن. الەۋمەتتىك جەلىلەردە دە «Egemen Qazaqstan» گازەتىنىڭ ماتەريالدارىن ءجيى ءبولىسىپ جۇرەمىن. سونىڭ ىشىندە, اباي اتامىزدىڭ 175 جىلدىعىنا ارنالعان ماقالالاردا كەرەمەت ويلار ايتىلىپ ءجۇر. باس باسىلىم قازىر قوعامداعى تۇيتكىلدى تاقىرىپتاردى قوزعاپ, تالاي ماسەلەنىڭ باسىن اشىپ وتىر, – دەدى مينيستر.
كەزدەسۋ بارىسىندا ايدا بالاەۆا ەلىمىزدىڭ جۇزجىلدىق جىلناماسى بار باس باسىلىمنىڭ اقپارات ايدىنىنداعى قىزمەتىنە جوعارى باعا بەرىپ, «Egemen Qazaqstan» گازەتىنىڭ ۇجىمىنا اۆتوكولىك تارتۋ ەتتى.
