بۇگىنگى تاڭدا اۋىل شارۋاشىلىعى ونىمدەرىن وندىرۋشىلەرگە جان-جاقتى قولداۋ كورسەتىلىپ جاتقانى ءمالىم. سونىڭ ءبىرى – سۋبسيديالاۋ, بىراق ول كومەكتىڭ كەشىكتىرىلمەي بەرىلگەنى شارۋالار ءۇشىن ماڭىزدى بولىپ وتىر. سۋبسيديا اي سايىن بەرىلسە, تيىمدىلىگى دە ارتادى. سونداي-اق اۋىل شارۋاشىلىعى ونىمدەرىن قايتا وڭدەيتىن كاسىپورىندارعا قارجىلاي كومەك كورسەتىلسە. ءبىر عانا مىسال, ورداباسى اۋدانىندا پرەزيدەنتتىڭ تاپسىرماسىمەن جۇزەگە اسىرىلىپ جاتقان «ەگىستىكتەن سورەگە دەيىن» جوباسى ءوز تيىمدىلىگىن كورسەتىپ وتىر. جوبا اياسىندا «بورتە ميلكا» جشس جەكە 4 شارۋاشىلىقپەن بىرىگە سپك قۇرىپ, جەڭىس اۋىلىنا ءسۇت جينايتىن كونتەينەر ورناتقان بولاتىن. ەلىمىزدەگى ەڭ ءىرى ءسۇت فەرماسى بار كومپانيانىڭ ءبىرى سانالاتىن «بورتە ميلكا» ءوز زاۋىتىندا كۇنىنە نەبارى 10 توننا ءسۇت وندىرەدى ەكەن. جالپى كاسىپورىن تاۋلىگىنە 50 توننا ءونىمدى تەرەڭ وڭدەۋگە قاۋقارلى. بۇل ورايدا اينالىمعا قاجەت قارجىنىڭ بولماۋى ءوز اسەرىن تيگىزۋدە. ءسۇتتى جيناۋعا قارجى جەتكىلىكتى بولسا, 20-25 توننا ءونىمدى تەرەڭ وڭدەۋگە مۇمكىندىك تۋادى. سونداي-اق ءونىم تۇرلەرىن دە 2-3 ەسە كوبەيتۋگە, قوسىمشا جۇمىس ورىندارىن اشۋعا بولار ەدى. ياعني جولداۋدا ايتىلعانداي نارىقتى الەۋمەتتىك ماڭىزى بار ازىق-ت ۇلىك ونىمدەرىمەن تولىق قامتاماسىز ەتۋگە, ميلليونداعان اۋىل تۇرعىندارىنىڭ تابىسىن ارتتىرۋعا مۇمكىندىك جاسالادى. بيىل الەمدى ابىگەرگە سالعان پاندەميا ءبىزدىڭ وڭىردە ءونىم وتكىزۋ, ەكسپورتتاۋ ماسەلەسىنە كەرى اسەرىن تيگىزدى. قايتا وڭدەۋ كاسىپورىندارىنا قولداۋ كورسەتىلسە, شارۋالار ونىمدەرىن وتكىزۋ ماسەلەسىنە باس اۋىرتپاس ەدى. ياعني دايىنداۋ, قابىلداۋ پۋنكتتەرى بۇگىندە قارجىلاي قولداۋعا مۇقتاج.
پرەزيدەنتكە تىكەلەي قاراستى باسەكەلەستىكتى قورعاۋ جانە دامىتۋ جونىندەگى اگەنتتىك قۇرۋ جونىندەگى مەملەكەت باسشىسىنىڭ تاپسىرماسى دا كاسىپكەرلەر تاراپىنان قولداۋ تابارى ءسوزسىز. سونداي-اق جاڭادان قۇرىلۋى ءتيىس ستراتەگيالىق جوسپارلاۋ اگەنتتىگى جوسپارلاۋدى تومەننەن باستاسا دەگەن ۇسىنىسىمىز دا جوق ەمەس. جولداۋدا مەملەكەتتىك باقىلاۋعا بالاما قوعامدىق باقىلاۋ ينستيتۋتىن قولداي وتىرىپ, ءتيىستى قۇقىقتىق نەگىز قالىپتاستىرۋ قاجەتتىگى ايتىلدى. قوعامدىق باقىلاۋ تۋرالى زاڭدى ازىرلەپ, قابىلداۋعا تاپسىرما بەرىلۋى دە, مەملەكەتتەن بولىنگەن قوماقتى قارجىلاردىڭ ناقتى ادرەسكە جەتەتىنىنە كۇماندانا قارايتىن شارۋالاردى قۋانتىپ وتىر.
شارىپبەك جامالبەك ۇلى,
«تۇركىستان وبلىسى ازاماتتىق اليانسى» زاڭدى تۇلعالار قاۋىمداستىعى قوعامدىق بىرلەستىگىنىڭ پرەزيدەنتى
