قازاقستانداعى مەملەكەتتىك جوسپارلاۋ جۇيەسى تاۋەلسىزدىك العاننان بەرى جاھاندىق تاجىريبەلەرگە سايكەس ۇنەمى جەتىلۋدە. قازىرگى تاڭدا ەلدىڭ الەۋمەتتىك-ەكونوميكالىق دامۋىنىڭ نەگىزگى ماقساتىنا جەتۋگە باعىتتالعان مەملەكەتتىك جوسپارلاۋ جۇيەسىنىڭ ءنورماتيۆتى-قۇقىقتىق جانە ادىستەمەلىك نەگىزى قالاندى. ستراتەگيالىق جانە باعدارلامالىق قۇجاتتار, ستراتەگيالىق جوسپارلار مەن اۋماقتاردى دامىتۋ باعدارلامالارى ازىرلەنىپ, ىسكە اسىرىلۋدا. قۇجاتتاردىڭ تيىمدىلىگىن ارتتىرۋ ماقساتىندا ولارعا جۇيەلى تۇردە مونيتورينگ جانە باعالاۋ جۇرگىزىلىپ وتىر. سونىمەن بىرگە ناتيجەگە باعىتتالعان بيۋدجەتتەندىرۋ قاعيداتتارى ەنگىزىلۋدە.
مەملەكەتتىك جوسپارلاۋ سالاسىنداعى جۇرگىزىلىپ جاتقان رەفورمالارعا قاراماستان ءالى دە شەشىمىن تاپپاعان بىرقاتار ماسەلەلەر بار. اتاپ ايتساق, ستراتەگيالىق جانە بيۋدجەتتىك جوسپارلاۋدا ۇيلەسىمنىڭ جەتكىلىكسىزدىگى, قۇجاتتاردى ازىرلەۋ جانە باعالاۋ پروتسەستەرىنە حالىقتىڭ بەلسەندى قاتىسپاۋى, قۇجاتتار سانىنىڭ كوپتىگى. بۇل ماسەلەلەردىڭ بارلىعى ەلدىڭ ستراتەگيالىق ماقساتتارىنا جەتۋىنە كەدەرگى كەلتىرۋدە. سونداي-اق مەملەكەتتىك باسقارۋ جۇيەسىنىڭ تيىمدىلىگىن تومەندەتۋى مۇمكىن.
وسى ورايدا پرەزيدەنت جولداۋىندا ايتىلعان ستراتەگيالىق جوسپارلاۋ جانە رەفورمالار اگەنتتىگىن قۇرۋ ۋاقتىلى شەشىم بولىپ تابىلماق. قازىرگى تاڭدا ىشكى جانە سىرتقى سىن-تەگەۋرىندەرگە بايلانىستى الەمدىك جانە ۇلتتىق ەكونوميكادا بولىپ جاتقان وزگەرىستەر قازاقستاندا ەكونوميكانى دامىتۋ بويىنشا جاڭا رەفورمالار مەن باستامالار تالاپ ەتۋدە. بۇل رەتتە ستراتەگيالىق جوسپارلاۋ ماسەلەلەرى بويىنشا پرەزيدەنتكە باعىنىشتى جەكە مەملەكەتتىك قۇرىلىمنىڭ بولۋى ەلدەگى مەملەكەتتىك جوسپارلاۋ جۇيەسىنىڭ ماڭىزدىلىعىن ارتتىرادى. سونىمەن بىرگە «حالىق ۇنىنە قۇلاق اساتىن مەملەكەت» قاعيداسى ادامداردىڭ ءومىر ءسۇرۋ دەڭگەيىن ارتتىرۋعا الىپ كەلەتىن ساپالى ەكونوميكالىق ءوسۋدى جوسپارلاۋعا مۇمكىندىك بەرەدى.
گۇلنار شاعامباەۆا,
قازاقستاننىڭ جەكە جۇمىسپەن قامتۋ اگەنتتىكتەرى قاۋىمداستىعىنىڭ ديرەكتورى
