وڭىردە جاڭا وقۋ جىلىنا دايىندىق ەرتە باستالىپ, سالانىڭ كەم-كەتىگى تۇگەندەلىپ, ونى رەتكە كەلتىرۋ ءسات سايىن تياناقتالىپ وتىردى. وسىنداي جۇيەلى ءىستىڭ ناتيجەسىندە قازىرگى ۋاقىت تالابىنا ساي ونلاين وقۋ ءۇشىن وقۋشىلاردى ەلەكتروندى قۇرىلعىلارمەن قامتاماسىز ەتۋگە باسا نازار اۋدارىلدى. قاشىقتان وقيتىن 116 254 وقۋشىنىڭ 66 پايىزىنىڭ ەلەكتروندى قۇرىلعىلارى بار ەكەنى انىقتالىپ, مۇنداي مۇمكىندىگى جوق وقۋشىلاردى كومپيۋتەر, پلانشەتتەرمەن قامتۋ جۇمىستارى جۇرگىزىلدى. وسى ءىستىڭ اياسىندا مەكتەپتەر تەڭگەرىمىندەگى 14 203 كومپيۋتەر وقۋشىلارعا ۋاقىتشا پايدالانۋعا بەرىلىپ, سالاداعى ۇنەمدەلگەن قارجى ەسەبىنەن 2 635 پلانشەت الىندى. قالعان بالالارعا ۇكىمەت رەزەرۆى ەسەبىنەن بەرىلەتىن 22 870 كومپيۋتەرلىك تەحنيكا 20 قىركۇيەككە دەيىن تاراتىلادى. سونىمەن قاتار «مەكتەپكە جول» اكتسياسى اياسىندا الەۋمەتتىك جاعدايى تومەن وتباسىنان شىققان 1116 وقۋشىعا نوۋتبۋكتەر مەن پلانشەتتەر تاراتىلدى.
وبلىستا 20 259 مۇعالىم بار. قاشىقتان وقىتۋعا قاجەتتى قۇرىلعىلاردى الىپ بەرۋدە دەمەۋشىلەر ەسەبىنەن 306 پەداگوگكە نوۋتبۋك تابىستالدى.
ەسەپ بويىنشا جاڭا وقۋ جىلىندا 293 مەكتەپتە 169 173 وقۋشى وقيدى. ونىڭ ىشىندە 18 423 بالا 1-سىنىپ تابالدىرىعىن اتتاپ وتىر. ءبىلىم جانە عىلىم مينيسترلىگىنىڭ مەكتەپتەگى وقۋ پروتسەسىن ۇيىمداستىرۋ جونىندەگى باعىتىنا سايكەس 116 592 وقۋشى قاشىقتان وقىتىلادى. ول BilimLand, دارىن-ونلاين ينتەرنەت پلاتفورمالارى ارقىلى جۇرگىزىلمەك. ال 1-4-سىنىپتاعى 41 547 وقۋشى ءداستۇرلى جۇيە بويىنشا ءبىلىم الادى. ينتەرنەت يگىلىگى جەتە قويماعان شالعاي ەلدى مەكەندەردەگى 73 مەكتەپتە 11 004 بالا دا وفلاين وقيتىن بولدى. مەكتەپكە كەلىپ ءبىلىم الاتىن بالالاردىڭ قاۋىپسىزدىگى ءۇشىن سانيتارلىق تالاپتار قاتاڭ ساقتالادى. وقۋشىلار 5 ساتىدان تۇراتىن دەزينفەكتسيادان وتەدى. سىنىپتاردىڭ اۋاسىن تازارتۋ, كۆارتستاۋ, دەزينفەكتسيالىق-ىلعالدى جۋىپ تازالاۋ قاداعالاۋعا الىنادى. وسى سانيتارلىق شارالارعا 182 ملن تەڭگە باعىتتالىپ وتىر.
ارينە, ونلاين وقۋدىڭ دا ايتەۋىر ءبىر اياقتالىپ, بالالاردىڭ مەكتەپكە ورالاتىنى انىق. سوندىقتان دا مەكتەپتەردى جاڭا تالاپتارعا بەيىمدەۋ, بالالاردىڭ قاۋىپسىزدىگىن قامتاماسىز ەتۋ ۇمىت قالماۋى ءتيىس. بيىل وسى ماقساتتا ءبىلىم ورىندارىن بەينەكامەرالارمەن قامتۋ ءۇشىن وبلىستىق بيۋدجەتتەن 250 ملن تەڭگە قارجى ءبولىنىپ, العاشقى لەكتە 70 مەكتەپكە بەينەكامەرالار ورناتىلدى. الدا دا بۇل ماسەلە كەزەڭ-كەزەڭىمەن شەشىلەتىن بولادى. سونىمەن قاتار بالا قاۋىپسىزدىگى ءۇشىن سالاارالىق ءىس-شارالار جوسپارى بەكىتىلدى.
جاڭا وقۋ جىلىنا وقۋلىقتار مەن وقۋ-ادىستەمەلىك كەشەندەر ساتىپ الۋعا جەرگىلىكتى بيۋدجەتتەن 1,2 ملرد تەڭگە ءبولىنىپ, كەرەكتى وقۋلىقتار تۇگەل جەتكىزىلدى.
قىزىلوردا وبلىسى
