ايماقتار • 03 قىركۇيەك، 2020

اقتوبە وبلىسىندا 195 مىڭ توننا استىق جينالدى

282 رەت كورسەتىلدى

بۇل –كوكتەمدە ەگىلگەن بارلىق بيداي القابىنىڭ 47 پايىزىنان، ياعني 212 مىڭ گەكتاردان  جينالدى. بيىلعى استىقتىڭ ورتاشا  شىعىمدىلىعى – ءار گەكتاردان 9،2 تسەنتنەردەن كەلىپ وتىرسا،  وسى جىلعى  ءتۇسىم  وتكەن جىلمەن سالىستىرعاندا ءبىرشاما جوعارى دەيدى شارۋالار، دەپ حابارلايدى Egemen.kz.

الداعى كۇندەرى كۇن بۇزىلىپ، جاۋىن-شاشىن كەدەرگى كەلتىرمەسە، بارلىق ەگىس القاپتارىندا جيىن-تەرىم  ناۋقانى 25 قىركۇيەكتە اياقتالادى دەپ حابارلادى اقتوبە وبلىسىنىڭ اۋىلشارۋاشىلىعى باسقارماسى باسشىسىنىڭ ورىنباسارى – اسىلحان ابتيەۆ.

ءۇش-ءتورت جىلدان بەرى قىستا  قاردىڭ از ءتۇسۋى، جەردە توڭنىڭ قاتپاۋى، كوكتەمگى جاۋىن-شاشىننىڭ از بولۋى قاتتى قۋاڭشىلىققا سوقتىرعاندىقتان،  ديقانداردىڭ ەڭبەگى زايا كەتىپ،  ەگىس ەگۋگە  جۇمساعان شىعىندارىن وتەي  الماي، قارىزعا باتىپ  كەلدى.

بيىلعى كوكتەمدە ەگىلەتىن داقىلداردىڭ ءار تۇرلىلىگىنە باسىمدىق بەرىلىپ،   ايتەكە بي، حرومتاۋ، مارتوك، قارعالى، قوبدا  اۋداندارىندا  445 مىڭ گەكتار   جەرگە ءداندى داقىل، 46 مىڭ  200 گەكتارعا مايلى داقىل، 104 مىڭ گەكتارعا مال ازىعى، نەگىزىنەن  جوڭىشقا،  ارپا ءدانى سەبىلگەن  بولاتىن. سونداي-اق ءوڭىر شارۋالارى 3310 گەكتار  جەرگە كوكونىس، 1500 گەكتارعا  باقشا داقىلدارىن دا ەكتى.

بولجامدى ءتۇسىمى 450 مىڭ توننادان اسادى دەپ جوبالانعان بيىلعى استىق وڭىردەگى  7 ەلەۆاتوردا ساقتالادى دەپ جوسپارلانىپ وتىر. ونىڭ ەكەۋى اقتوبە قالاسىندا،  5 ەلەۆاتور ايتەكە بي، قارعالى، مارتوك، حرومتاۋ، قوبدا  اۋداندارىندا ورنالاسقان. قولدانىستاعى جەتى ەلەۆاتوردىڭ سىيىمدىلىعى 395 مىڭ تونناعا  لايىقتالعان.

بۇدان وزگە وڭىردەگى جەكە شارۋاشىلىقتاردىڭ مەنشىگىندە 184 استىق ساقتايتىن قويما بار.  بيىلعى  كۇزدە ءوڭىر شارۋاشىلىقتارى   4217  گەكتار جەرگە قارا بيداي ەگىپ تاستاماقشى. ايتا كەتۋ كەرەك،  سوڭعى 15-20 جىلدان بەرى وڭىردە كۇزدىك بيداي ەگۋ مۇلدە ۇمىتىلعان ەدى.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار