بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى رۋسلان تۋلەپباەۆ ءمالىم ەتتى.
"سۇتقورەكتىلەردىڭ 10 ءتۇرى مەن قۇستاردىڭ سەگىز ءتۇرى اۋلاۋ وبەكتىلەرى بولىپ تابىلادى. بۇل - قابان, ەلىك, قاسقىر, قويان, تۇلكى, قارساق, دالا ساسىقكۇزەنى, بورسىق, سۋىر, سۋ تىشقانى, ۇيرەك, قاز, قاسقالداق, ءشىل, قۇر, بودەنە, كوگەرشىن, شالشىقشى. اڭشى جولدامادا نەمەسە رۇقسات بەرىلگەن قۇجاتتا كورسەتىلگەن جانۋارلاردىڭ سانى قانشا بولسا, سونشا اۋلاۋعا قۇقىلى. 2020 جىلدىڭ قورىتىندىسى وبلىستىڭ جابايى جانۋارلار سانى ۇلعايعانىن كورسەتتى. اڭ اۋلاۋ ەرەجەلەرىنە سايكەس اۋەسقوي سپورتتىق اڭ اۋلاۋ ءۇشىن ءتيىستى قۇجاتتار بولۋ كەرەك. اڭشى كۋالىگى, جانۋارلار دۇنيەسىن پايدالانۋعا بەرىلگەن رۇقساتناما, اڭشىلىق شارۋاشىلىعى سۋبەكتىسىنىڭ جولداماسى, جەكە تۇلاعالار ءۇشىن قارۋ مەن وقتاردى ساقتاۋعا جانە الىپ جۇرۋگە رۇقساتناما, جىرتقىش قۇستاردى اۋلاۋ كەزىندە تولقۇجات بولعاندا عانا رۇقسات بەرىلەدى", - دەيدى رۋسلان تۋلەپباەۆ.
ينسپەكتسيا باسشىسىنىڭ ايتۋىنشا, وتكەن جىلى اڭ اۋلاۋ ەرەجەلەرىنىڭ تالاپتارىن بۇزعان 491 ادام انىقتالىپ, اكىمشىلىك جاۋاپكەرشىلىككە تارتىلعان. ونىڭ ىشىندە اڭ اۋلاۋ ەرەجەلەرىن بۇزعانى ءۇشىن 42 ادامعا 7 ملن تەڭگەدەن استام ايىپپۇل سالىنىپ, 3 ملن تەڭگە وندىرىلگەن.
"جانۋارلار دۇنيەسىن پايدالانۋ تالاپتارىن جانە اڭ اۋلاۋ ەرەجەلەرىن بۇزۋ انىقتالعان جاعدايدا ازاماتتار قر اقبتك-ءنىڭ 382-بابى بويىنشا اكىمشىلىك جاۋاپكەرشىلىككە تارتىلادى. مۇنداي جاعدايدا ەسكەرتۋ نەمەسە جەكە تۇلعالارعا 5 اەك (13890 تەڭگە), كاسىپكەرلىك سۋبەكتىلەرىنە 25-تەن (69 450 تەڭگە) 100 (277 800 تەڭگە) اەك-كە دەيىن ايىپپۇل سالىنادى", - دەيدى رۋسلان تۋلەپباەۆ.
