جول ءجۇرۋ قۇجاتتارىن (بيلەتتەردى) جانە اقشالاي قاراجاتتارىن قايتارۋ ءۇشىن "جولاۋشىلار تاسىمالى" اق جولاۋشىلاردان كەلىپ تۇسكەن وتىنىشتەردى قابىلداپ جانە ماسەلەنى جەدەل شەشۋ ماقساتىندا 2020 جىلدىڭ 3 قىركۇيەگىنەن باستاپ WhatsApp +7-707-270-36-64 مەسسەندجەرىن ىسكە قوستى.
بيلەتتەر ءۇشىن تولەمدەردى قايتارۋ ءتارتىبى مەن بيلەتتى ساتىپ الۋ تاسىلىنە بايلانىستى قولما-قول اقشامەن جانە قولما-قول اقشاسىز ەسەپ ايىرىسۋ ارقىلى جۇرگىزىلەدى:
ستانسادان پويىز جونەلتىلگەنگە دەيىن 1 ساعاتتان كەشىكتىرمەي بيلەتتى قايتارعان شاقتا عانا اقشا قاراجاتى 5 (بەس) جۇمىس كۇنى ىشىندە تولەۋشىنىڭ كارتاسىنا تۇسەدى;
ستانسادان پويىز جونەلتىلگەنگە دەيىن 1 ساعاتتان كەم ۋاقىت ارالىعىندا بيلەتتى قايتارعان كەزدە اقشا قاراجاتى جولاۋشىنىڭ ءوتىنىشى نەگىزىندە تالاپ قويۋ تارتىبىمەن 30 (وتىز) كۇنتىزبەلىك كۇن ىشىندە جولاۋشىنىڭ كارتاسىنا تۇسەدى.
"بيلەت قۇنىن قايتارا الماعان جولاۋشىلار WhatsApp +7-707-270-36-64 نومىرىنە حابارلاسىپ, اقشا قايتارۋ مارتەبەسىن سۇراستىرۋلارىنا بولادى. سۇراۋ سالۋدى جىبەرگەن كەزدە جول ءجۇرۋ قۇجاتىنىڭ (بيلەتتىڭ) ءنومىرىن كورسەتۋ كەرەك نەمەسە بيلەت كاسساسىنا جۇگىنگەن كەزدە جول ءجۇرۋ قۇجاتىنىڭ (بيلەتتىڭ) فوتوسۋرەتىن جانە جول ءجۇرۋ قۇجاتىن (بيلەتىن) قايتارۋ تۋرالى تۇبىرتەكتى جىبەرۋ قاجەت", - دەلىنگەن حابارلامادا.
ۇلتتىق تاسىمالداۋشى تەمىر جول بيلەتتەرىن قايتارۋ ءۇشىن قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2015 جىلعى 30 ساۋىردەگى № 545 بۇيرىعىمەن بەكىتىلگەن جولاۋشىلاردى, باگاجدى, جۇك-باگاجدى جانە پوشتا جونەلتىلىمدەرىن تەمىرجول كولىگىمەن تاسىمالداۋ قاعيدالارىنا (بۇدان ءارى-قاعيدالار) سايكەس جۇرگىزىلەتىنىن ەسكە سالادى.
ەرەجەگە سايكەس جول ءجۇرۋ قۇجاتتارىن (بيلەتتەردى) قايتارۋ كەزىندە:
- پويىز جونەلتىلگەنگە دەيىن 24 ساعاتتان كەشىكتىرمەي - جول ءجۇرۋ قۇجاتىنىڭ تولىق قۇنى قايتارىلادى;
- كەمىندە 24 (جيىرما ءتورت) ساعات بۇرىن, بىراق پويىز جونەلتىلگەنگە دەيىن كەمىندە 6 ساعات بۇرىن – بيلەت قۇنى جانە پلاتسكارت قۇنىنىڭ 50% قايتارىلادى;
- پويىز جونەلتىلگەنگە دەيىن كەمىندە 6 ساعات بۇرىن جانە جونەلتىلگەننەن كەيىن 1 ساعاتتان ارتىق ەمەس – بيلەتتىڭ قۇنى قايتارىلادى, بۇل رەتتە پلاتسكارتتىڭ تولىق قۇنى ۇستالادى.
پويىز جونەلتىلگەننەن كەيىن 1 ساعاتتان سوڭ جول ءجۇرۋ قۇجاتتارىن (بيلەتتەرىن) قايتارۋ جۇرگىزىلمەيدى جانە اقشا قاراجاتى قايتارىلمايدى.
جولاۋشىلار پويىزىنىڭ قاتىناۋى توقتاعان جاعدايدا جولاۋشىلار جول ءجۇرۋ قۇجاتتارىن (بيلەتتەرىن) قايتارۋدى رەسىمدەپ, اقشالاي قاراجاتتارىن تولىق كولەمدە قايتارىپ الا الادى.
ەستەرىڭىزگە سالا كەتەيىك, جولاۋشىلار جول ءجۇرۋ قۇجاتتارىن (بيلەتتەردى) ساتىپ العان ورنى بويىنشا قايتارۋ كەرەك.
