قايراتكەر ەسىمى ءبىلىم وشاعىنا بيىلعى ناۋرىز ايىندا بەرىلگەن بولاتىن. وسىدان كەيىن وبلىستىق بيۋدجەتتەن قاجىر-قايراتىن ەلدىڭ وركەندەۋىنە ارناعان ازاماتتىڭ ءمۇسىنىن ازىرلەۋگە قارجى ءبولىنىپ, ول قازاقستان رەسپۋبليكاسى مادەنيەت جانە سپورت مينيسترلىگى جانىنداعى مەملەكەتتىك كوميسسيا كەلىسىمىن الدى.
سالتاناتتى شارادا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ قۇتتىقتاۋ حاتى وقىلدى. وبلىس اكىمى گۇلشارا ابدىقالىقوۆا ارالدان شىعىپ, الاشقا تانىلعان ەلدىڭ ۇلىنىڭ رۋحىن ۇلىقتاۋ كەيىنگىلەرگە پارىز ەكەنىن اتاپ ءوتتى.
– ۇلى ادامداردىڭ ءومىر جولى ۇرپاق ءۇشىن ارقاشان ونەگە. تاۋەلسىز قازاقستان رەسپۋبليكاسىنىڭ تۇڭعىش پرەمەر-ءمينيسترى قىزمەتىن اتقارعان ۇزاقباي قارامانوۆ اعامىزدىڭ ەلدىك مۇددەنى جوعارى قويعان قايراتكەر بولعانى قاي بۋىن ءۇشىن دە ۇلگى. جۇرتىنا ادال قىزمەت ەتىپ, II دارەجەلى «بارىس», «ەڭبەك قىزىل تۋ» وردەندەرىمەن, قازاق كسر جوعارعى كەڭەسىنىڭ قۇرمەت گراموتالارىمەن جانە ءتۇرلى جوعارى دارەجەدەگى مەدالدارمەن ماراپاتتالعان ۇزاقباي قارامان ۇلى جۇرت جادىنان وشپەيتىن تۇلعا, – دەدى وبلىس اكىمى.
اۋدان تۇرعىندارى مەن قايراتكەرمەن ۇزەڭگىلەس ازاماتتار, ءىزباسار ىنىلەرى جيىلعان شارادا مادەنيەت جانە سپورت ءمينيسترى اقتوتى رايىمقۇلوۆا, قازاقستان رەسپۋبليكاسىنا ەڭبەگى سىڭگەن مادەنيەت قايراتكەرى, ارداگەر-جۋرناليست شاكىرات دارماعامبەتوۆ لەبىز ءبىلدىردى.
وسىدان كەيىن قوناقتار ۇزاقباي قارامانوۆتىڭ جەكە زاتتارى مەن ول تۋرالى جازىلعان ەڭبەكتەردەن جاساقتالعان قوعامدىق مۋزەي جۇمىسىمەن تانىسىپ, «باستاۋ» كاسىبي قوعامداستىق كابينەتىندە ۇزدىك وقۋشىلارىمەن كەزدەستى.
اۋداندىق ءبىلىم ءبولىمىنىڭ باسشىسى سانيرا جاننازاروۆانىڭ ايتۋىنشا, قايراتكەر ەسىمىن يەلەنگەن, 1200 ورىندىق №262 مەكتەپ-گيمنازياسى 2009 جىلى پايدالانۋعا بەرىلگەن. ۇجىمدا 106 پەداگوگ بار. وتكەن وقۋ جىلىنىڭ وزىندە 8 مۇعالىم رەسپۋبليكالىق يدەيالار فەستيۆالى مەن فورۋمداردا, 21 مۇعالىم وبلىستىق دەڭگەيدەگى سەمينارلار مەن كونفەرەنتسيالاردا ءىس-تاجىريبەسىن تاراتىپتى. بيىل ءبىلىم وشاعىنان ۇبت-عا قاتىسقان 24 تۇلەكتىڭ 22-ءى مەملەكەتتىك ءبىلىم گرانتىن يەلەنگەن.
قىزىلوردا
