تالدىقورعان قالاسىنىڭ «قاراتال» شاعىن اۋدانىندا ۇزاق جىلدار بويى قاراۋسىز قالعان اياقسىز قۇرىلىستى وبلىس اكىمى ا. باتالوۆ كوممۋنالدىق مەنشىككە وتكىزىپ, ستۋدەنتتەر جاتاقحاناسى رەتىندە قايتا سالۋدى تاپسىرعان بولاتىن. سونىڭ ناتيجەسىندە اينالاسى ءبىر جىلدىڭ ىشىندە 13 قاباتتى, ساۋلەتى كەلىستى جاڭا جاتاقحانا بوي كوتەردى. تالدىقورعانداعى بىردەن ءبىر جوعارى وقۋ ورنى ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى ءۇشىن بەرىلىپ وتىرعان بۇل نىسان بىلىمگەرلەردىڭ ءومىر ءسۇرۋ جاعدايىن جاقسارتىپ, ءبىلىم ساپاسىن ارتتىرۋعا ىقپال ەتەتىن قادام بولماق.
جاتاقحانانىڭ اشىلۋ سالتاناتىندا وبلىس اكىمى ا. باتالوۆ ستۋدەنت جاستارعا ىزگى تىلەگىن ءبىلدىردى.
"كەزىندە كاسىپ يەسى قوناق ءۇي سالامىز دەپ, كەيىن قۇرىلىسىن اياقسىز قالدىرىپ كەتكەن نىساننىڭ بەتونى ۇگىلىپ, ارماتۋراسى توزىپ, قاراۋسىز جاتقان بولاتىن. وسى قۇرىلىستى ستۋدەنتتەر ءۇيى رەتىندە سالساق دەپ شەشىم قابىلداپ, بۇگىن, مىنە, پايدالانۋعا بەرىپ وتىرمىز. عيماراتتىڭ جوباسىن مارقۇم, بەلگىلى ساۋلەتشى اقمىرزا رۇستەمبەكوۆ جاسادى. تالدىقورعان قالاسىنىڭ اجارىن اشاتىن بۇل نىسان جەتىسۋلىق جاستار ءۇشىن ۇلكەن سىي دەپ بىلەمىن. ەندى بۇل جاتاقحانا جالىندى, جىگەرلى جاستارىمىزدىڭ ءوز ۇيىندەي بولادى. ءبىز جاستارعا ۇلكەن ءۇمىت ارتامىز. وسى عيمارتتا بولاشاققا جول سالىڭدار, ارماندارىڭ ورىندالسىن!" - دەگەن وبلىس باسشىسى جۇمىستى ساپالى ورىنداعان «نسك استانا-قۇرىلىس» جشس قۇرىلىس كومپانياسىنا العىسىن ءبىلدىردى.
مۇنان سوڭ ءى.جانسۇگىروۆ اتىنداعى جمۋ رەكتورى قۋات بايمىرزاەۆ, ستۋدەنتتىك پارلامەنتىنىڭ سپيكەرى, قۇقىق جانە ەكونوميكا فاكۋلتەتىنىڭ 4 كۋرس ستۋدەنتى ماديناتۇرداش ءسوز الىپ, جاستارعا دەگەن قامقورلىعى ءۇشىن ەل اعالارىنا ۋنيۆەرسيتەت ۇجىمىنىڭ اتىنان, ستۋدەنتتەردىڭ اتىنان ريزاشىلىقتارىن ءبىلدىردى.
جينالعان كوپشىلىك عيماراتتىڭ ءىشىن ارالاپ, كىتاپحانا, كينوزال, وزىندىك جۇمىس بولمەسى, دەمالىس بولمەسى, اسحانا, جاتىن بولمەلەرگە كىرىپ كوردى. كەلۋشىلەرگە «Bolashak Books» بۇرىشى تانىستىرىلدى. ءار بولمەدە ستۋدەنتتەردىڭ ەركىن ءبىلىم الۋى مەن دەمالۋىنا بارلىق قاجەتتى جاعدايلار جاسالعان, ءتيىستى قۇرال-جادبىقتارمەن تولىق قامتىلعان. ازىرگە مۇندا «اينالايىن» بالالار ءۇيىنىڭ تاربيەلەنۋشىلەرى قاتارىنداعى جانە ينتەرنەت جىلدامدىعى باياۋ شالعاي ەلدى مەكەندەردەن كەلگەن جالپى سانى 13 ستۋدەنت ورنالاستى.
اتاپ وتسەك, جىل سوڭىنا دەيىن تالدىقورعان قالاسىندا مەديتسينالىق جانە پوليتەحنيكالىق كوللەدجدەرىنىڭ 280 جانە 200 ورىندىق, قاراتال اۋدانى بەستوبە اۋىلىنداعى بەستوبە سەرۆيستىك-تەحنيكالىق كوللەدجىنىڭ 50 ورىندىق جاتاحانالارى قولدانىسقا بەرىلىپ, تاعى 530 ستۋدەنت قۋانىشقا بولەنەدى. كونستيتۋتسيا كۇنىنە وراي وبلىس بويىنشا 10 الەۋمەتتىك نىسان اشىلىپ, رايىمبەك اۋدانى, نارىنقول اۋىلىندا 33 جەكە تۇرعىن ءۇي, تالدىقورعان قالاسىندا 60 پاتەرلىك تۇرعىن ءۇي قولدانىسقا بەرىلدى.
