قورعانىس ءمينيسترى, گەنەرال-لەيتەنانت نۇرلان ەرمەكباەۆ اسكەري قىزمەتشىلەرگە «قازاقستان كونستيتۋتسياسىنا 25 جىل», «قازاقستان حالقى اسسامبلەياسىنا 25 جىل» مەدالدارىن تابىس ەتتى.
«ەلىمىزدىڭ نەگىزگى زاڭىنىڭ ماعىناسىندا تەڭدىك پەن تۇراقتىلىق قامتاماسىز ەتىلە وتىرىپ, بۇكىل قازاقcتاندىقتاردىڭ مۇددەلەرى قامتىلعان, – دەدى مينيستر ءوز سوزىندە. – اتا زاڭنىڭ اسكەر ءۇشىن ماڭىزى زور».
قورعانىس ۆەدومستۆوسىنىڭ باسشىسى تاۋەلسىز قازاقستاننىڭ كونستيتۋتسيالىق قۇرىلىسىن قورعاۋ جانە قورعانىس قابىلەتىن نىعايتۋ ءۇشىن قارۋلى كۇشتەردىڭ الەۋەتى جىل سايىن ارتىپ كەلە جاتقانىن اتاپ ءوتتى. كۇن سايىن جاۋىنگەرلىك دايىندىقتىڭ ساپاسى مەن قارقىنى جاڭا دەڭگەيگە كوتەرىلىپ, اسكەرلەردىڭ تەحنيكالىق جابدىقتالۋى جەتىلدىرىلۋدە, اسكەري قىزمەتشىلەر الەۋمەتتىك كەپىلدىكتەرمەن قامتاماسىز ەتىلۋدە.
«وتان قورعاۋ جولىندا كونستيتۋتسيالىق بورىش پەن جەكە سەنىمگە سۇيەنە تۇرىپ, اسكەردىڭ الەۋەتتى بولۋى قاجەت. سانالى تۇردەگى تاڭداۋدى باسشىلىققا الا وتىرىپ, قارۋلى كۇشتەر ءاردايىم ءوزىنىڭ باستى ماقساتى – وتانى, حالقى, پرەزيدەنتى مەن ەلباسىعا ادال بولۋى كەرەك!», دەپ اتاپ ءوتتى مينيستر.
قازاقستان رەسپۋبليكاسى پرەزيدەنتى – قك جوعارعى باس قولباسشىسىنىڭ جارلىقتارىمەن قارۋلى كۇشتەردىڭ 260 اسكەري قىزمەتشىسى مەن قىزمەتكەرى مەدالمەن ماراپاتتالدى. قورعانىس ءمينيسترىنىڭ بۇيرىعىمەن 38 ادامعا گراموتا تابىستالدى.
قارۋلى كۇشتەردىڭ اسكەري بولىمدەرى مەن قۇرالىمدارىندا دا ءبىر ۋاقىتتا كونستيتۋتسيانىڭ مەرەيتويىنا ارنالعان سالتاناتتى شارالار وتكىزىلدى.
مەرەكەلىك جيىندار كەزىندە كارانتين شارالارى ساقتالىپ, قاشىقتىق رەجىمدە ءوتتى.
ەلىمىزدىڭ پرەزيدەنتى قاسىم-جومارت توقاەۆ كونستيتۋتسيانىڭ 25 جىلدىعىنا ارنالعان حالىقارالىق كونفەرەنتسيادا سويلەگەن سوزىندە: «قازاقستان كونستيتۋتسياسىندا الەمدىك قۇقىقتىق ويدىڭ وزىق جەتىستىكتەرىمەن ۇشتاسقان قازاق حالقىنىڭ سان عاسىرلىق باي تاجىريبەسى جانە دانالىعى كورىنىس تاپقان», دەدى.
