"مەملەكەت باسشىسى ەكونوميكا, الەۋمەتتىك, ساياسي سالالارعا قاتىستى الداعى باسىمدىقتاردى ايقىنداپ بەردى. پرەزيدەنتىمىز ەكونوميكالىق ءوسىمدى قالپىنا كەلتىرۋ, حالىقتىڭ ءال-اۋقاتىن ارتتىرۋ, قۇقىق قورعاۋ جۇيەسىن ءارى قاراي جاڭعىرتۋ, ساياسي رەفورمالاردى جالعاستىرۋ ماسەلەلەرىنە توقتالىپ, پارلامەنت پەن ۇكىمەتتىڭ الدىنا ناقتى ماقساتتار قويدى. جولداۋدا ايتىلعان تاپسىرمالاردى زاڭنامالىق تۇرعىدان ۋاقتىلى ءارى ساپالى قامتاماسىز ەتۋ – ءبىزدىڭ نەگىزگى مىندەتىمىز", – دەدى سەنات توراعاسى.
ماۋلەن اشىمباەۆ سەناتورلار وڭىرلەردەگى جاعدايعا مونيتورينگ جۇرگىزىپ, حالىقتى الاڭداتقان وزەكتى ماسەلەلەردى شەشۋگە اتسالىسقانىنا نازار اۋداردى.
جاز بويى ەلىمىزدەگى جانە الەمدەگى ەپيدەميولوگيالىق احۋال كۇردەلى بولعانى بەلگىلى. پرەزيدەنتتىڭ تاپسىرماسى بويىنشا قاجەتتى قاراجات ءبولىنىپ, ءتيىستى زاڭنامالىق اكتىلەر قابىلداندى.
"قازىر جاعدايدىڭ تۇراقتالىپ كەلە جاتقانىن كورىپ وتىرمىز. بىراق پرەزيدەنتىمىز ايتىپ وتكەندەي, سانيتارلىق, ەپيدەميولوگيالىق رەجيمگە, ساقتىق شارالارىنا باسا ءمان بەرۋىمىز كەرەك. وسى جولدا دەپۋتاتتار مەملەكەت باسشىسىنىڭ تاپسىرمالارى اياسىندا قاجەتتى زاڭدار قابىلداۋ جۇمىسىن جالعاستىراتىن بولادى", – دەدى ماۋلەن اشىمباەۆ.
سەنات الداعى ۋاقىتتا جاڭا دەپۋتاتتىق قۇراممەن جۇمىس ىستەيدى. ناقتى ايتقاندا, 2020 جىلدىڭ 12 تامىزىندا سەنات دەپۋتاتتارىنىڭ سايلاۋى ءوتىپ, ونىڭ قورىتىندىسى بويىنشا ولگا پەرەپەچينا, ءالي بەكتاەۆ, سەرگەي ەرشوۆ جانە ايگۇل قاپباروۆا جاڭا مەرزىمگە قايتا سايلاندى. سونداي-اق, سەناتورلار قاتارىنا جاڭادان 13 دەپۋتات قوسىلدى. پالاتانىڭ بۇگىنگى وتىرىسى كەزىندە ولار انت قابىلدادى.
ءوز كەزەگەندە سەنات توراعاسى جاڭادان سايلانعان دەپۋتاتتاردىڭ قىزمەتىنە تابىس تىلەپ, كاسىبي بىلىكتىلىكتەرى مەن مول تاجىريبەلەرىن زاڭ شىعارۋ قىزمەتىندە كەڭىنەن پايدالاناتىنىنا جانە سەنات جۇمىسىنا تىڭ سەرپىن بەرەتىندەرىنە سەنىم ءبىلدىردى.
سونىمەن قاتار وتىرىس بارىسىندا سەنات توراعاسىنىڭ ورىنباسارى بولىپ نۇرلان ءابدىروۆ سايلاندى. ودان بولەك, جوعارعى پالاتا كوميتەتتەرىنىڭ قۇرامى بەلگىلەنىپ, ولاردىڭ توراعالارى سايلاندى. اتاپ ايتقاندا, كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى بولىپ ۆلاديمير ۆولكوۆ; قارجى جانە بيۋدجەت كوميتەتىنىڭ توراعاسى بولىپ ولگا پەرەپەچينا; حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى بولىپ مۇحتار قۇل-مۇحاممەد; ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى بولىپ داۋرەن ادىلبەكوۆ; الەۋمەتتىك-مادەني دامۋ جانە عىلىم كوميتەتىنىڭ توراعاسى بولىپ مۇرات باقتيار ۇلى; اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى بولىپ ءالي بەكتاەۆ سايلاندى.
