ەل ەڭسەسىن كوتەرۋگە سەپتىگى تيەتىن ءبىلىمدى, جىگەرلى جاستارعا مەملەكەت تاراپىنان ايتا قالارلىقتاي قامقورلىق جاسالىپ جاتقاندىعىن اتاپ ايتساق ارتىقتىعى بولماس. ماسەلەن, وسى جوبا اياسىندا اۋىلعا بەت العان 700-دەن استام جاس مامانعا 199,7 ميلليون تەڭگە كولەمىندە كوتەرمەاقى ءبولىنىپتى. سونداي-اق, اعىمداعى جىلى 340 مامانعا باسپانا الۋعا 1,4 ميلليارد تەڭگە كولەمىندە بيۋدجەتتىك نەسيە قاراستىرىلعان.
"اۋىلدىق جەرگە باراتىن ماماندارعا 100 ايلىق ەسەپتىك كورسەتكىش كولەمىندە كوتەرمەاقى تولەنەدى", - دەيدى وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ مامانى اسەل سىزدىقوۆا, - ءۇي سالا قالسا 15 جىلعا نەسيە بەرىلەدى. شاراپاتى كوپ بۇل جوباعا دەنساۋلىق ساقتاۋ, سپورت, ءبىلىم بەرۋ, باسقا دا الەۋمەتتىك سالالار بويىنشا ماماندار قاتىسا الادى. ەڭ باستى شارتى – جاس مامان اۋىلدىق جەردە ءۇش جىل جۇمىس ىستەۋى كەرەك. ازىرگە تسەلينوگراد, زەرەندى اۋداندارىنا تىلەك بىلدىرۋشىلەر كوپ.
جۇمىس ىستەۋ مەرزىمى بەس جىلدان ءۇش جىلعا قىسقاردى. وسى جوبامەن بارىپ زەرەندى اۋداندىق اۋرۋحاناسىندا لابورانت بولىپ جۇمىس ىستەپ جاتقان جاس مامان ماريا ماناپوۆانىڭ ايتۋىنا قاراعاندا, مەرزىمنىڭ قىسقارۋى جاستاردىڭ ىقىلاسىن ودان سايىن ءوسىرىپ وتىر.
اۋىلعا شارۋاشىلىق سالاسىندا جۇمىس ىستەيتىن جاس ماماندار وتە قاجەت. كوپتەگەن جۇمىس ورىندارى دا بوس تۇر. ەندەشە, ەل ەڭسەسىن جاستاردىڭ كوتەرگەنى كوڭىلگە قۋانىش ۇيالاتادى.
اقمولا وبلىسى
