دەلەگاتسيا الدىمەن ات باسىن "بەيبىتشىلىك" ارالىنا بۇرىپ, سەمەي يادرولىق پوليگونى قۇرباندارىن ەسكە الدى. "ولىمنەن دە كۇشتى" مونۋمەنتىنە گۇل شوقتارىن قويدى. اتاپ ايتا كەتۋ كەرەك, وسىدان 29 جىل بۇرىن, 29 تامىزدا سەمەي يادرولىق پوليگونى جابىلىپ, ەل بولىپ, الەم بولىپ قۋانعان ەدىك.
– كەڭەستەر وداعى باسشىلىعىنىڭ قارسىلىعىنا قاراماستان ەلباسى نۇرسۇلتان ءابىش ۇلى نازارباەۆتىڭ پاتريوتتىق, ۇلتجاندى شەشىمى اجداھا اپانىنىڭ جابىلۋىنا ىقپال ەتتى, – دەدى قىرىمبەك كوشەرباەۆ ءوز سوزىندە.
يادرولىق سىناق قۇرباندارىن ءبىر مينۋتتىق ۇنسىزدىكپەن ەسكە العان دەلەگاتسيا وكىلدەرى بۇدان كەيىن جاڭارتىلعان اباي الاڭىن, كۇردەلى جوندەۋدەن وتكەن اباي تەاترىن كوردى.
بيىل حاكىم ابايدىڭ 175 جىلدىعىنا بايلانىستى اقىن اتىمەن اتالاتىن بىرقاتار نىساندار جاڭارىپ, جوندەۋدەن وتكەن. سونىڭ ىشىندە اباي مۇراجايى دا بار. مەرەيتويعا وراي مۇراجايدىڭ زالدارى جوندەلىپ, عيماراتتىڭ قاسبەتى مەن وعان جاپسارلاس اۋماق جاڭارتىلعان. اۋلاسىنداعى تروتۋار پليتالارى اۋىستىرىلدى, اباتتاندىرىلدى, كوگال توسەلدى. وسى تۇستا اۋىز تولتىرىپ ايتا كەتەرلىگى - ابايدىڭ ۇلدارىمەن بىرگە تۇرعان ءمۇسىنى اشىلدى.
دەلەگاتسيا سونىمەن قاتار 203 گەكتار اۋماقتى الىپ جاتقان قاراعايلى شاعىنا اۋدانىنىڭ تىنىس-تىرشىلىگىمەن تانىستى.
