Edu Stream كومپانياسىنىڭ Youtube ارناسى ارقىلى ونلاين-رەجىممەن وتكەن ماراپاتتاۋ راسىمىندە بالا قۇقىعى جونىندەگى ۋاكىلەتتى وكىل ارۋجان سايىن پارلامەنت سەناتىنىڭ توراعاسى ماۋلەن اشىمباەۆتىڭ قۇتتىقتاۋ حاتىن وقىپ بەردى.
ءساۋىر مەن شىلدە ارالىعىندا وتكەن بايقاۋعا ەلىمىزدىڭ تۇكپىر-تۇكپىرىنەن ءتورت مىڭنان استام بالا قاتىسقان. ناتيجەسىندە, باس جۇلدەگە الماتىلىق ماريا يۆانيچەنكو (15 جاس) لايىق دەپ تابىلسا, ال 6-8 جاس توبى بويىنشا وسكەمەندىك پولينا زونوۆا (8 جاس), 9-11 جاس ارالىعىنداعى بالالار توبىنان سولتۇستىكقازاقستاندىق ەلدوس جانگەلدى (10 جاس), 12-14 جاستاعى جەتكىنشەكتەر اراسىنان ورالدىق دانا كۋراك (14 جاس), 15 پەن 17 جاس ارالىعىنداعى ونەرپازداردان نۇر-سۇلتاندىق الينا بايبوسىنوۆا (15 جاس) ءبىرىنشى ورىندى يەلەندى.
باس جۇلدە يەگەرى ماريا يۆانيچەنكوعا بايقاۋدىڭ باس دەمەۋشىسى Edu Stream كومپانياسى تاراپىنان اۆسترياعا جولداما جانە Apple iPad تابىستالدى. سونىمەن قاتار ءبىرىنشى ورىن يەگەرلەرىنە دە اۆسترياعا ساپار سەرتيفيكاتى بەرىلدى. جەڭىمپازدارعا "تەحنودوم", "ناستوياششي بۋراتينو" كومپانيالارىنان سمارتفون, ساموكات جانە باسقا قۇندى سىيلىقتار تابىس ەتىلدى. ونەر دوداسىنا قاتىسۋشىلاردى ىشكى ىستەر مينيسترلىگى, LIKEE عالامدىق پلاتفورماسى, "دوبروۆولنوە وبششەستۆو" ميلوسەرديە" قوعامدىق قورى, Animal Security قوعامدىق قورى, "بەلىي بيم" جانۋارلاردى قورعاۋ مەكەمەسى ىنتالاندىرۋ سىيلىقتارىمەن ماراپاتتادى.
ونلاين-جوبادا جەڭىمپازدار جانۋارلارعا سۇيىسپەنشىلىگىن جەتكىزىپ, العا قويعان ماقسات-مۇراتتارىمەن ءبولىستى. مىسالى, ءبىرىنشى ورىن يەلەنگەن ەلدوس جانگەلدى گراتتاج تەحنيكاسىمەن سۋرەت سالعاندى ۇناتاتىنىن, بايگەگە قاتىسۋىنا الەۋمەتتىك جەلىدەن بالالاردىڭ ءيتتى ورتەگەنى جايلى وقىعان اقپاراتى سەبەپ بولعانىن تىلگە تيەك ەتسە, 2-ورىن يەلەنگەن تۇركىستاندىق سۋرەتشى جاسۋربەك كارچيەۆ: "مەن ءۇشىن بۇل كۇتپەگەن جاڭالىق بولدى. ونلاين-قۇتتىقتاۋ تاماشا ءوتتى, دەمەۋشىلەرگە, ۇيىمداستىرۋشىلارعا راقمەت ايتامىن", دەدى.
سونداي-اق جاس سۋرەتشى وتكەن جىلى رەسپۋبليكالىق سۋرەت بايقاۋىنا قاتىسىپ, باس جۇلدەنى جەڭىپ العانىن, كوشەدە قاراۋسىز قالعان ءيتتىڭ سۋرەتىن سالۋ يدەياسى ءۇي جانۋارلارى تۋرالى ءفيلمدى كورىپ وتىرعاندا تۋعانىن ايتتى.
Edu Stream كومپانياسىنان اۆسترياعا سەرتيفيكات العان جەڭىمپازدار كارانتيننەن كەيىن ءوز ەڭبەكتەرىن ۆەنادا وتەتىن كورمەدە پاش ەتپەك. ال كونكۋرسقا قاتىسقان ءبىر توپ بالانىڭ سۋرەتى قالا كوشەلەرىندەگى بيلبوردقا ىلىنەدى.
بايقاۋدىڭ ماقسات-مۇراتى – تابيعاتقا, قورشاعان ورتاعا, جانۋارلارعا دەگەن سۇيىسپەنشىلىكتى وسكەلەڭ ۇرپاق ساناسىنا ءسىڭدىرۋ. ۇيىمداستىرۋشىلار مۇنداي ءىس-شارالاردىڭ تاربيەلىك ءمانى زور دەپ ەسەپتەيدى. ەلشى-امباسسادور ديانا گامازوۆا جانۋارلاردى قورعاۋ ماقساتىندا زاڭدا قاراستىرىلعان نورمالاردى قاتاڭداتۋ, يەسىز قالعان ءۇي جانۋارلارىنا جاعداي جاساۋ جانە يتتەردى بالانىڭ كوزىنشە اۋلاماۋ سياقتى ۇسىنىستاردى العا تارتتى. ال ءادىل قازىلار القاسىنىڭ مۇشەسى ت. جۇرگەنوۆ اتىنداعى قۇوا بەينەلەۋ ونەرىنىڭ تاريحى مەن تەورياسى كافەدراسىنىڭ پروفەسسورى ولگا باتۋرينا مەكتەپتە الەمدىك بەينەلەۋ ونەرىنىڭ تاريحى جايلى ساباقتى قايتا جانداندىرۋدى ۇسىندى.
ايتا كەتۋ كەرەك, بايقاۋ قازاقستان پرەزيدەنتىنىڭ قامقورلىعىمەن, بۇۇ قورشاعان ورتانى قورعاۋ باعدارلاماسىنىڭ دۇنيەجۇزىلىك قورشاعان ورتانى قورعاۋ كۇنى اياسىندا, ءبىلىم جانە عىلىم, مادەنيەت جانە سپورت مينيسترلىكتەرىنىڭ قولداۋىمەن, "بالالار الەمدى بەينەلەيدى" قوعامدىق قورى, باس سەرىكتەس Edu Stream كومپانياسىنىڭ جانە "تەحنودوم" مەن "ناستوياششي بۋراتينو" سەرىكتەستەرىنىڭ قاتىسۋىمەن وتكەن ەدى.
