كونفەرەنتسيادا قالالىق ء بىلىم باسقارماسىنىڭ باسشىسى جانات ارىسبەكقىزىنىڭ 2019-2020 وقۋ جىلىندا اتقارىلعان جۇمىستارى مەن الداعى مىندەتتەر تۋرالى بايانداما جاسادى. ونىڭ ايتۋىنشا, ەپيدەميولوگيالىق جاعدايعا بايلانىستى جاڭا وقۋ جىلىندا 14 940 باستاۋىش سىنىپ وقۋشىسى ءۇشىن اتا-انالاردىڭ ءوتىنىشى نەگىزىندە قاتاڭ سانيتارلىق تالاپتاردى ساقتاي وتىرىپ, 996 كەزەكشى سىنىپ اشىلادى. ولار تەك ءبىر كابينەتتە ءبىر مۇعالىممەن عانا وقيدى, ۇزىلىستەر ءارتۇرلى ۋاقىتتا, سىنىپتاعى بالالار سانى 15-تەن اسپايتىن بولادى ەكەن.
بۇگىندە مەكتەپتەر «Bilim Iand - Onlinemektep.orq» ينتەرنەت پلاتفورماسىندا قاشىقتان وقىتۋعا تولىعىمەن دايىن. كومپانيا تاراپىنان شىمكەنت قالاسىنا سەرۆەر ورناتۋ «قازاقتەلەكوم» اق ارقىلى قامتاماسىز ەتىلۋدە.
سونىمەن قاتار, وقۋشىلاردىڭ قاۋىپسىزدىگى باسا نازارعا الىنعان قالاداعى 36 مەكتەپكە ىشكى اجەتحانالار ورناتىلىپ, 136 مەكتەپ 100 پايىز بەينەباقىلاۋ كامەراسىمەن قامتاماسىز ەتىلدى.
كەڭەس بارىسىندا شاھار باسشىسى مۇرات دۇيسەنبەك ۇلى جىل سايىن جاڭا وقۋ جىلى الدىندا وتكىزىلەتىن تامىز كەڭەسى ۇستازدار ءۇشىن ماڭىزدى جيىن ەكەنىن اتاپ ءوتتى.
«ەلىمىزدە العاشقى رەت بالالار جاڭا وقۋ جىلىن قاشىقتان وقۋمەن باستاۋدا. قاشىقتان وقۋ بارىسىندا كوپتەگەن قيىنشىلىقتارعا قاراماي ۇستازدارىمىز ۇنەمى ىزدەنە وتىرىپ, بىرلىگىمەن, بەلسەندىلىگىمەن, جاۋاپكەرشىلىگىمەن قالا ابىرويىن اسقاقتاتا ءبىلدى. بىرلەسە اتقارعان ەڭبەكتەرىڭىز ءۇشىن بارلىقتارىڭىزعا العىسىمدى بىلدىرگىم كەلەدى»,- دەدى قالا اكىمى.
سونداي-اق, ءبىلىم سالاسىنىڭ باسشىلارىنا جاڭا وقۋ جىلىندا بارلىق ءبىلىم بەرۋ ۇيىمدارىندا سانيتارلىق تالاپتاردىڭ ساقتالۋىن, سىبايلاس جەمقورلىق تاۋەكەلدەرى ورىن الاتىن بارلىق قىزمەتتى تسيفرلاندىرۋدى, تەحنيكالىق جانە كاسىپتىك ءبىلىم بەرۋ ۇيىمدارىندا دۋالدى وقىتۋدى جانە «جاس مامان» جوباسى بويىنشا جۇمىستاردى ساپالى جۇرگىزۋدى تاپسىردى.
