سەناتور وڭىردەگى جەدەل باسقارۋ ورتالىعىندا بولدى. جبو باستىعىنىڭ ايتۋىنشا, جىل باسىنان بەرى "102" پۋلتىنە 100 مىڭنان استام دابىل قوڭىراۋى تۇسكەن. باستى مىندەتتەردىڭ ءبىرى قىلمىستارعا دەر كەزىندە دەن قويۋ جانە اشۋ بولىپ قالا بەرەدى. اعىمداعى جىلدىڭ باسىنان بەرى بەينەباقىلاۋ كامەرالارىنىڭ كومەگىمەن 66 قىلمىس اشىلىپ, 17 مىڭعا جۋىق اكىمشىلىك قۇقىق بۇزۋشىلىق انىقتالدى.
وبلىستىق پوليتسيا دەپارتامەنتى باستىعىنىڭ ورىنباسارى 2017 جىلدان باستاپ وڭىردە 39 "اۆتوۋراگان" اپپاراتتىق-باعدارلامالىق كەشەنى ورناتىلىپ, جۇمىس ىستەپ جاتقانىن اتاپ ءوتتى. بۇل كەشەندەر اۆتوجولداردىڭ ەڭ كوپ جۇرەتىن ۋچاسكەلەرىنە كىرۋ جانە شىعۋ جولدارىندا ورناتىلعان جانە جول قوزعالىسى ەرەجەلەرىنىڭ بۇزىلۋىن اۆتوماتتى رەجيمدە تىركەۋگە مۇمكىندىك بەرەدى. جىل
باسىنان بەرى "اۆتوۋراگانداردىڭ" كومەگىمەن 8 قىلمىس اشىلىپ, 30 مىڭنان استام قۇقىق بۇزۋشىلىق انىقتالعان.
سەناتور كارانتين جانە ەنگىزىلگەن شەكتەۋلەر كەزەڭىندە ازاماتتاردىڭ قۇقىقتارىن قورعاۋ, قۇقىق قورعاۋ جۇيەسىن جاڭعىرتۋ, سونداي-اق اكىمشىلىك جانە قىلمىستىق زاڭنامانى رەفورمالاۋ ماسەلەلەرىن قوزعادى. ۆلاديمير ۆولكوۆ زاڭ شىعارۋ سالاسىندا جۇرگىزىلىپ جاتقان جۇمىستارعا نازار اۋداردى.
وبلىستىق پوليتسيا دەپارتامەنتى كوشى-قون قىزمەتى باسقارماسىنىڭ باستىعى سەناتورعا توتەنشە جاعداي رەجيمى كەزىندە شەتەلدىكتەردىڭ ەلدە بولۋ ءتارتىبىن زاڭنامالىق دەڭگەيدە رەتتەۋ تۋرالى ۇسىنىس جاسادى.
"قازىرگى جاعداي قازاقستان رەسپۋبليكاسىنىڭ 2003 جىلعى 2 اقپانداعى "توتەنشە جاعداي تۋرالى" زاڭىنا جانە توتەنشە جاعداي رەجيمى جاعدايىندا شەتەل ازاماتتارىنىڭ ەلدە بولۋ ءتارتىبىن رەتتەۋ ماسەلەلەرى بويىنشا بىرقاتار باسقا دا زاڭنامالىق اكتىلەرگە وزگەرىستەر ەنگىزۋدى تالاپ ەتەدى. بۇل وسىنداي كۇتپەگەن جاعدايلار تۋىنداعان كەزدە شەتەلدىك ازاماتتاردىڭ كوز الدىندا تاۋەكەلدەردى بولدىرماۋ ءۇشىن جانە ءبىزدىڭ ەلىمىزدىڭ ءيميدجى مەن تارتىمدىلىعىن ساقتاۋ ءۇشىن ماڭىزدى", دەدى كوشى-قون قىزمەتى باسقارماسىنىڭ باستىعى.
ءوز كەزەگىندە سەناتور بۇل ۇسىنىستى سەناتتىڭ ءپروفيلدى كوميتەتىنىڭ الداعى وتىرىستارىنىڭ شەڭبەرىندە تالقىلاۋعا ۋادە بەردى.
