كەزدەسۋدى مادەنيەت جانە سپورت ۆيتسە-ءمينيسترى وركەن بيساقاەۆ اشىپ, ءبىرىنشى كەزەكتە بيىلعىداي كۇردەلى جاعدايدا نارىقتى نىعايتا وتىرا بيزنەس پەن مەملەكەت اراسىندا سىندارلى ديالوگ قۇرۋ قاجەتتىلىگىن العا تارتتى.
بۇل باسقوسۋدىڭ باستى تاقىرىبى تاۋداعى 2020-2021 قىسقى ماۋسىمعا دايىندىق جانە ۇلتتىق پاركتەردە ەكوتۋريزمدى دامىتۋ بولدى.
شىمبۇلاقتاعى جىل بويعى تاۋ كۋرورتى تۇساۋكەسەرلەرى بارىسىندا كومپانيانىڭ باس ديرەكتورى رينات ءابدىراحمانوۆ تۋروپەراتورلارمەن بىرگە پاكەتتىك ۇسىنىستاردى قالىپتاستىرۋعا ەرەكشە نازار اۋدارىپ, تۋريستىك قاۋىمداستىقتار باسشىلارىمەن كۋرورتتى ودان ءارى دامىتۋدى تالقىلادى.
«تاۋ شاڭعىسى دەمالىسىن ۇيىمداستىرۋ قازاقستاندا كەلەشەگى بار بيزنەس, ويتكەنى شەتەلدىك تۋريستەردىڭ ءبىزدىڭ تاۋلارىمىزعا دەگەن قىزىعۋشىلىعى جانە ءبىزدىڭ تۋريستەرىمىزدىڭ ەۋروپانىڭ نەمەسە ورتالىق ازيا ەلدەرىنىڭ شەتەلدىك تاۋ شاڭعى كۋرورتتارىنا دەگەن سۇرانىسى دا بار», – دەيدى Turan Asia LLP ديرەكتورى گۇلعايشا قاسەنحانقىزى.
ايتا كەتۋ كەرەك, ستاتيستيكاعا سايكەس, تاۋ شاڭعىسى ءتۋريسى ءوز دەمالىسى ءۇشىن كۇنىنە ورتاشا ەسەپپەن 250 دوللار جۇمسايدى, ال سالىستىرمالى تۇردە جاعاجايعا باراتىن تۋريست تەك 50 دوللار جۇمسايدى.
كەزدەسۋدىڭ ەكىنشى ءبولىمى تولىعىمەن ەكوتۋريزم جانە تۋريستەردىڭ ەكولوگيالىق ساۋاتتىلىعىن ارتتىرۋ ماسەلەلەرىنە ارنالدى.
«تامىر» جابايى تابيعاتتا بولۋ مەكتەبىنىڭ يدەيالىق جەتەكشىسى اسەل يسانوۆا تۋريستەردى قورشاعان ورتاعا ۇقىپتى قاراۋعا ۇيرەتۋ جوسپارلارى تۋرالى ايتىپ بەردى.
ء«بىز جۇرتشىلىققا تاۋداعى ءجۇرىس-تۇرىس ەرەجەلەرىن قوعامدىق دارىستەر, اقپاراتتىق تۋرلار, ءبىلىم بەرۋ جانە شابىتتاندىراتىن مەديا كونتەنت ارقىلى تانىستىراتىن بولامىز. ءبىزدىڭ باستى ماقساتىمىز – ادامنىڭ تابيعاتتا قاۋىپسىز بولۋىن, سونداي-اق تابيعاتتى ادامنىڭ زياندى ارەكەتتەرىنەن قورعاۋدى قامتاماسىز ەتۋ», دەدى اسەل يسانوۆا.
ءارى قاراي سپيكەر مەكتەپ جانىنان ەكو-ۆولونتەرلىك قوزعالىس قۇرىلاتىنىن, وعان ءبىر ايدا 600-دەن استام ادام تىركەلگەنىن حابارلادى. قوزعالىسقا قاتىسۋشىلار اراسىندا مەكتەپ وقۋشىلارى مەن ستۋدەنتتەردەن باسقا, كاسىبي ەرىكتىلەر, شىعارماشىلىق ادامدارى, ەكولوگتار, بيولوگتار, اقپاراتتىق تەحنولوگيالار سالاسىنداعى ماماندار جانە باسقا دا مامانداندىرىلعان تۇلعالار بار.
«مەن بىرلەسكەن ءىس-ارەكەتتەردىڭ ناتيجەسىندە پاركتىڭ لاستانۋى, فلورا مەن فاۋنانىڭ جويىلۋى, تۋريستىك اعىنداردى رەتتەۋ جانە تاعى باسقا ماڭىزدى ماسەلەلەردى شەشۋگە ۇلكەن ۇلەس قوسا الاتىنىمىزعا سەنىمدىمىن», دەدى اسەل يسانوۆا.
الماتى
