"بۇل كەسەنەنىڭ ءبىر ەرەكشەلىگى تايقازانى, قابىر جاپقىشى سياقتى كوپتەگەن جادىگەرلەرى ساقتالىپ قالعان. التىنمەن جازىلعانى قۇران كىتابى قازىر الماتىدا تۇر. مۇنداي جادىگەرلەر ورتالىق ازياداعى بىردە ءبىر ەسكەرتكىشتە ساقتالماعان", – دەدى عالىم بۇگىن تۇركىستاندا وتكەن "تۇركىلەر ءتورى تۇركىستان" ونلاين كونفەرەنتسياسىندا.
قازاقستاننىڭ ساكرالدى گەوگرافياسىنداعى تاريحي جادىگەرلەردىڭ دەنى وڭتۇستىكتە شوعىرلانعان. وسىدان 3 جىل بۇرىن ازىرلەنگەن قازاقستاننىڭ كيەلى 100 نىسانىنىڭ 23-ءى وڭتۇستىك وڭىرىندە ورنالاسقان. سول 100 نىساننىڭ 12-ءى عانا ەكىنشى ورىندا تۇرعان قاراعاندى وبلىسىنان ەنگەن ەكەن. ەندى وسى قاسيەتتى ورىنداردىڭ ادەبيەتتەگى كورىنىسى قانداي؟ بۇگىنگى ادەبيەتتە قاستەرلى مەكەندەرىمىز قانشالىقتى دارىپتەلىپ, قامتىلىپ ءجۇر؟ ء"بىز وسى قاستەرلى ورىنداردى ناسيحاتتاۋدا, اسىرەسە جاستارعا تانىتۋدا ادەبي سالانىڭ مۇمكىندىكتەرىن قانشالىقتى پايدالانا الىپ وتىرمىز؟" دەگەن ساۋالدار سانانى مازالايتىنى راس. ەل اۋزىندا كيەلى ورىندار كوپ ايتىلىپ جۇرگەنىمەن, كوپشىلىك ناقتى دەرەكتەردى بىلە بەرمەيدى. بۇل ولقىلىقتىڭ ورنىن تولتىرۋعا دا قالامگەرلەر قاۋىمى سۇبەلى ۇلەس قوسارى انىق. ماڭىزدى تاريحي دەرەكتەردى ادەبي كوركەم تىلمەن اسپەتتەي وتىرىپ كوپشىلىك اۋديتورياعا جەتكىزۋدىڭ وراسان پايداسى بولاتىنى ءسوزسىز.
"ەلباسىنىڭ "بولاشاققا باعدار: رۋحاني جاڭعىرۋ" ماقالاسىنداعى باستى التى باعىتتىڭ ءبىرى – "قازاقستاننىڭ كيەلى جەرلەرىنىڭ گەوگرافياسى" جوباسى. بۇل جوبانى جۇزەگە اسىرۋدىڭ ماقساتى – حالىقتىڭ ۇلتتىق بىرەگەيلىگىن جانە قۇندىلىقتارىن بەكەمدەۋ جانە وسى ارقىلى جات يدەولوگياعا توتەپ بەرەتىن قالقاندى نىعايتۋ. ياعني, ءبىزدىڭ بولاشاق ۇرپاققا تاربيە بەرۋ, ۇلتتىق بولمىسىمىزدى جوعالتىپ الماۋدىڭ قامى. تۇركىستاننىڭ قايتا تۇلەۋى – ۇلتتىق بولمىسىمىزدىڭ, رۋحىمىزدى قايتا ويانۋىنىڭ بىردەن-ءبىر كورىنىسى دەسەك ارتىق ايتپاعان بولار ەدىك. تۇركىستاننىڭ جاڭعىرۋى تەك قۇرىلىس جۇمىستارى, ساۋلەت ونەرىمەن عانا شەكتەلمەۋى ءتيىس, ول تاريحي, ادەبي جانە پۋبليتسيستيكالىق جاڭا تۋىندىلارمەن, شىعارمالارمەن دە قۋاتتالۋى ءتيىس", – دەدى اتالعان ونلاين كونفەرەنتسيانىڭ مودەراتورى, جۋرناليستەر وداعى تۇركىستان وبلىستىق فيليالىنىڭ توراعاسى, "ەگەمەن قازاقستان" گازەتىنىڭ تۇركىستان وبلىسىنداعى ءتىلشىسى عالىمجان ەلشىباي.
كونفەرەنتسيا بارىسىندا بەلگىلى جازۋشى مارحابات بايعۇتتىڭ "تۇركىلەر ءتورى تۇركىستان" كىتابىنىڭ تانىستىرىلىمى ءوتتى. جازۋشىنىڭ 75 جىلدىعى اياسىندا جارىق كورگەن كىتاپتا تۇركىستان ءوڭىرىنىڭ سىرلى تاريحى, كيەلى جەرلەرى ەسسە تۇرىندە باياندالعان. جيىنعا عالىمدار, جازۋشىلار, سەنات, ءماجىلىس, وبلىستىق ءماسليحات دەپۋتاتتار, باۋىرلاس تۇركيا, ءازىربايجان, وزبەكستان ەلدەرىنىڭ ادەبيەتشىلەر, عالىمدارى قاتىسىپ, وي-پىكىرلەرىن ءبىلدىردى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
