«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءتورايىمى اسەمگۇل بالتاشەۆانىڭ ايتۋىنشا, بىلتىرعا قاراعاندا بيىل egov.kz ارقىلى الىنعان ونلاين قىزمەتتەردىڭ سانى ارتقان. «بۇل ءۇردىس ازاماتتاردىڭ تسيفرلى ساۋاتتىلىعىن ارتتىرۋعا وڭ اسەرىن تيگىزگەنى انىق. ماسەلەن, بيىل ەلەكتروندى پورتال ارقىلى 145 مىڭنان استام ادام جۇرگىزۋشى كۋالىگىن اۋىستىرسا, 90 مىڭعا جۋىق كىسى كولىكتەرىن ونلاين تۇردە قايتا تىركەگەن», دەدى ول.
بۇكىلالەمدىك پاندەميا سالدارىنان جاريالانعان توتەنشە جاعداي مەن كارانتيندىك شەكتەۋلەرگە, سونىڭ ىشىندە حالىققا قىزمەت كورسەتۋ ورتالىقتارىنىڭ جۇمىس ۋاقىتى قىسقارعانىنا قاراماستان, قازاقستاندىقتاردىڭ اۆتوكولىككە قاتىستى قىزمەتتەرگە دەگەن سۇرانىسى وتە جوعارى. ايتا كەتسەك, بيىل جۇرگىزۋشى كۋالىگىنە قاتىستى قىزمەتتەردىڭ سانى بىلتىرعا قاراعاندا 70 مىڭعا وسكەن, ال كولىكتى قايتا تىركەۋ بويىنشا قىزمەت نەبارى 150 مىڭعا قىسقاردى.
ايتا كەتەلىك, ەلدەگى كارانتيندىك جاعدايعا بايلانىستى حالىققا قىزمەت كورسەتۋ ورتالىقتارىندا كورسەتىلەتىن مەملەكەتتىك قىزمەتتەردى الۋ ءۇشىن الدىن الا برونداۋ ارقىلى كەزەككە تۇرۋ قاجەت. «حقو-عا كەزەكتى برونداۋ قىزمەتى تەگىن جانە رەسمي تۇردە egov.kz پورتالى, تەلەگرام جانە 1414 بايلانىس ورتالىعى ارقىلى ۇسىنىلادى. بۇل ورايدا الاياقتارعا الدانباۋلارىڭىزدى سۇرايمىز», دەدى اسەمگۇل بالتاشەۆا.
قازىرگى تاڭدا ايماقتارداعى باس سانيتارلىق دارىگەرلەردىڭ شەشىمىمەن حالىققا قىزمەت كورسەتۋ ورتالىقتارىنىڭ جۇمىس ءتارتىبى بىرتىندەپ ۇزارتىلىپ جاتىر.
