ەلوردادا مەديتسينالىق قىزمەتتەردى قاشىقتان قالاي الۋعا بولادى؟
سالالىق مامانداردىڭ كەڭەستەرى, تەلەمەديتسينا ارقىلى كونسۋلتاتسيالار, سونداي-اق رەنتگەن تۇسىرىمدەرىن قايتا وقۋ, ەلەكتركارديوگرامما تاڭبالارىن ءتۇسىندىرۋ قىزمەتتەرى ەندى قاشىقتان قابىلداۋ كەزىندە دە قولجەتىمدى.
بۇرىن قاشىقتان كەڭەس بەرۋ سوزىلمالى اۋرۋلارى بار ناۋقاستاردى (ۋچاسكەلىك جالپى پراكتيكا دارىگەرى, تەراپەۆت, پەدياتر) ديناميكالىق باقىلاۋ كەزىندە قولدانىلدى. قاشىقتان مەديتسينالىق قىزمەت كورسەتۋدىڭ ەرەكشەلىكتەرى 2020 جىلعى 17 شىلدەدەن باستاپ كۇشىنە ەنگەن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستە (129-باپ) ايقىندالعان.
زاماناۋي تەحنولوگيالار مەن ءتۇرلى بايلانىس ارنالارى ارقىلى مەديتسينالىق ۇيىمدار پاتسيەنتتەرگە قاشىقتان قىزمەت كورسەتۋ مۇمكىندىگىنە يە بولىپ وتىر. الداعى ۋاقىتتا قاشىقتان كورسەتىلەتىن قىزمەتتەر ءتىزىمى كەڭەيتىلەدى.
دارىگەردىڭ ونلاين-كەڭەسىن قالاي الۋعا بولادى؟
1. ءوز ەمحاناڭىزدىڭ Call-ورتالىعى ارقىلى نەمەسە باسقا بايلانىس ارنالارى, ءموبيلدى قوسىمشالار (بار بولسا) ارقىلى دارىگەردىڭ كەڭەسىنە جازىلۋ كەرەك.
2. كەڭەس بەرۋ كۇنى مەن ۋاقىتىن تاڭداۋ كەرەك. سونىمەن قاتار سالالىق ماماننىڭ قابىلداۋىنا جازىلۋ ءۇشىن الدىمەن ۋچاسكەلىك دارىگەردەن جولداما الۋ كەرەك, ياعني ەڭ الدىمەن تەراپەۆكە/جپد-عا قابىلداۋ ءۇشىن ءوتىنىش بەرۋ كەرەك.
3. تاڭدالعان بايلانىس ارناسى ارقىلى ماماننان بەلگىلەنگەن ۋاقىتتا قوڭىراۋ (اۋديو نەمەسە ۆيدەو) كۇتىڭىز.
«دارىگەردەن كەڭەس الۋ ءۇشىن ەمحاناعا بارۋدىڭ قاجەتى جوق. دارىگەر كەڭەسى ناۋقاس قاي جەردە بولسىن, قاشىقتان قولجەتىمدى. سونىمەن قاتار دارىگەر ءدارى-دارمەكتەرگە رەتسەپت جازىپ بەرە الادى. سىرقاتتاما پاراقشالارىن, زەرتحانالىق زەرتتەۋلەردىڭ, تەكسەرۋلەردىڭ ناتيجەلەرىن دە كورۋگە بولادى. سىرقاتتار مەن جاراقاتتاردى دياگنوستيكالاۋ, ەمدەۋ, مەديتسينالىق وڭالتۋ جانە الدىن الۋ ءۇشىن, زەرتتەۋلەر مەن باعالاۋ ءۇشىن مەديتسينالىق قىزمەتتەر تسيفرلى تەحنولوگيالار ارقىلى قاشىقتان ۇسىنىلادى. ياعني وسى قىزمەتتەردى الۋ ءۇشىن ەمحاناعا كەلۋدىڭ قاجەتى جوق», دەيدى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالى ديرەكتورىنىڭ ورىنباسارى ايناگۇل داۋلەتشينا.
ۋچاسكەلىك دارىگەردىڭ قاشىقتان كەڭەس بەرۋى العاشقى مەديتسينالىق-سانيتارلىق كومەك بەرەتىن مەديتسينالىق ۇيىمداردىڭ (ەمحانالاردىڭ) جان باسىنا شاققانداعى نورماتيۆ تولەمى شەڭبەرىندە تمككك تىزبەسىنە, ال سالالىق مامانداردىڭ كونسۋلتاتسيالارى, ناقتى كورسەتىلگەن قىزمەتتەرى (تمككك بويىنشا قىزمەت كورسەتىلەتىن سوزىلمالى, الەۋمەتتىك ءمانى بار جانە ينفەكتسيالىق اۋرۋلاردان باسقا) ءمامس پاكەتىنە كىرەدى.
قانداي دا ءبىر سۇراقتار تۋىنداعان جاعدايدا ازاماتتار مەديتسينالىق ساقتاندىرۋ قورىنىڭ Qoldau 24/7 ءموبيلدى قوسىمشاسى ارقىلى جۇگىنە الادى.
