اتالعان اۋرۋحانادا COVID-19 بەن پنەۆمونيا دياگنوزى قويىلعان بىردە-ءبىر ناۋقاس قالمادى. ەندى №4 قالالىق كلينيكالىق اۋرۋحاناسىنىڭ جۇقپالى اۋرۋلار بولىمشەسىنە دەزينفەكتسيالىق جۇمىستار جۇرگىزىلەدى. سونداي-اق اۋرۋحانانىڭ مەديتسينالىق قىزمەتكەرلەرى ەكى اپتا بويى وقشاۋلانىپ, سودان كەيىن وزدەرىنىڭ بەيىندى بولىمشەلەرىنە – بۇرىنعى جۇمىستارىنا ورالادى.
ء«بىر اپتا بويى تەمپەراتۋرام 39,8°C-قا دەيىن كوتەرىلىپ, كەۋدە تۇسىمدى قاتتى اۋىرسىندىم. اۋا جەتىسپەۋشىلىگى, قۇرعاق جوتەل, السىزدىك پەن ەنتىگۋ بولدى. اۋرۋحاناعا وزدىگىمنەن قابىلداۋ بولمەسىنە كەلىپ, تەكسەرىلگەنىمدە دەرەۋ كت جاساپ, اۋرۋحاناعا جاتقىزدى. ماعان ەكى جاقتى پوليسەگمەنتتىك پنەۆمونيا دياگنوزى قويىلدى. دارىگەرلەر قامقورلىق تانىتىپ, ينەكتسيالار مەن اسپا ۋكولداردى وتە مۇقيات قويدى. ەكى اپتادان كەيىن قايتادان ءيىس سەزە باستادىم», دەيدى «تورتتىك» ستاتسيونارىندا ەمدەلگەن ءجۇمادىل اكىمبەكوۆ.
بيىل 24 ماۋسىمدا الماتى قالاسىنىڭ قوعامدىق دەنساۋلىق ساقتاۋ باسقارماسى مەن تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ بىرلەسكەن بۇيرىعى نەگىزىندە №4 قكا-دا 25 توسەكتىك ورىن بار جۇقپالى اۋرۋلار بولىمشەسى اشىلدى. سول كەزدە جوسپارلى مەديتسينالىق كومەك كورسەتۋ توقتاتىلدى, فيزيوتەراپيا جانە وڭالتۋ بولىمشەسىن قايتا بەيىندەۋ ەسەبىنەن كوۆيدتىك بولىمشە قۇرىلدى. كلينيكانىڭ ەرىكتىلەرى قاتارىنان 44 ادامنان تۇراتىن مەديتسينالىق قىزمەتكەرلەر الىندى.
«جاڭا جۇقپالى اۋرۋلار بولىمشەسىنە جۇمىسقا قابىلداۋ تۋرالى حابارلامادان سوڭ كوپشىلىگى ويلانباستان ءوتىنىش بەردى. باستاپقىدا 14 دارىگەر جۇمىس ىستەدى, ونىڭ ىشىندە 4 رەانيماتولوگ, قالعان 10 دارىگەر قۇراما كوماندا: تراۆماتولوگ, ينفەكتسيونيست, تەراپەۆت, رەابيليتولوگ دارىگەر, فگدس دارىگەرى, ۋدز دياگنوستيكاسى بار. قالعانى مەدبيكەلەر مەن سانيتارلار, سونداي-اق ەرىكتىلەر. بولىمشەدە 25 توسەكتىك ورىنعا جانە 5 رەانيماتسيالىق ورىنعا ەسەپتەلگەن, اۋرۋ ورشىگەن شاقتا شىندىعىندا 70-كە دەيىن اۋىر ناۋقاس جاتتى», دەيدى جۇقپالى اۋرۋلار بولىمشەسىنىڭ مەڭگەرۋشىسى نۇرجان بايباحوۆ.
پاندەميا دارىگەردىڭ ءومىرىن «دەيىن» جانە «كەيىن» دەپ ءبولدى. نۇرجان نۇرمۇحانبەت ۇلى – بىلىكتى تراۆماتولوگ-ورتوپەد, حيرۋرگ, ەندوپروتەزدەۋ بولىمشەسىندە جۇمىس ىستەيدى, بۋىنداردى ەندوپروتەزدەۋ مامانى. جۇقپالى اۋرۋلار بولىمشەسىنىڭ قىزمەتكەرلەرى وتباسىنان وقشاۋلانىپ, قوناقۇيگە كوشتى. العى شەپتە جۇمىس ىستەيتىن دارىگەرلەردى جۇمىسقا اپارىپ, الىپ قايتۋ, رەستوراتورلار كلۋبىنان ىستىق تاماق, دەمەۋشىلەردەن ازىق-ت ۇلىك سەبەتتەرى بەرىلىپ, ەرەكشە جاعداي جاسالدى.
وسى ۋاقىت ىشىندە بولىمشەدە 126 ادام ەمدەلدى. قالالىق كلينيكالىق اۋرۋحاناعا پنەۆمونيامەن اۋىرعان اۋىر ناۋقاستار جاتقىزىلدى. رەانيماتسيا, انەستەزيولوگيا جانە قارقىندى تەراپيا بولىمشەسىنىڭ اعا مەدبيكەسى ايجان وماروۆانىڭ داعدىسى مەن تاجىريبەسى ينفەكتسيالىق بولىمشەدە جۇمىس ىستەۋدە ءوز پايداسىن تيگىزدى, ول دا ەرىكتىلەر قاتارىندا بولدى. سوڭعى ناۋقاس شىققان كۇنى ايجان وسى ۋاقىتقا دەيىن تاپسىرعان بارلىق پتر تەستى تەرىس ناتيجە كورسەتكەنىن اتاپ ءوتتى.
«وسى ۋاقىت ارالىعىندا بىزگە وتە قيىن بولدى. پاتسيەنتتەردىڭ باسىم بولىگى تىنىس الۋى قيىنداعان, اۋىر حالدە بولدى, بارلىعى قابىلداۋ بولىمشەسى ارقىلى كەلىپ ءتۇستى. وتە اۋىر جاعدايداعى ناۋقاستار دەرەۋ رەانيماتسيا بولىمىنە جاتقىزىلدى, اۋىرلىعى ورتاشا جانە پتر تەستى وڭ بولعاندار ءبىزدىڭ جۇقپالى اۋرۋلار بولىمشەسىنە جىبەرىلدى. قىزمەتكەرلەرگە ۇلكەن پسيحوەموتسيونالدى اۋىرلىق ءتۇستى, ناۋقاستار مورالدىق تۇرعىدان شارشاپ, بايبالام سالعاندار دا بولدى, كەيبىرىندە ەمدەۋ پروتسەسى وتە قيىن جاعدايدا ءوتتى. ءبىز ولاردى تىنىشتاندىرىپ, ءبىر-ءبىرىمىزدى جىگەرلەندىرىپ, باقىلاپ جۇردىك. كەيىنىرەك, ينفەكتسيا تومەندەگەن كەزدە, جەڭىستىڭ جاقىنداعانىن تۇسىندىك. ەندى قالىپتى ومىرگە قايتا ورالىپ جاتىرمىز», دەدى №4 قكا جۇقپالى اۋرۋلار بولىمشەسىنىڭ اعا مەدبيكەسى ايجان وماروۆا.
سوڭعى ناۋقاستى شىعارعاننان كەيىن جۇقپالى اۋرۋلار بولىمشەسىنىڭ مەديتسينالىق قىزمەتكەرلەرى قورعانىس كوستيۋمدەرىن شەشىپ, دارىگەرلەر ەكى اپتالىق ءوزىن ءوزى وقشاۋلاۋعا كەتەدى, ادامداردىڭ ءومىرى ءۇشىن قىزۋ كۇرەستەن كەيىنگى دەمالىس ۋاقىتى كەلدى. كارانتيننەن كەيىن پتر تەستىن مىندەتتى تۇردە تاپسىرۋ قاجەت, ەگەر تەرىس ناتيجە بولسا, ولار وزدەرىنىڭ مامانداندىرىلعان بولىمشەلەرىنە بۇرىنعى جۇمىسىنا ورالادى.
ايتا كەتەيىك, كوروناۆيرۋس ينفەكتسياسىنىڭ تارالۋ قاۋپى جاعدايىندا الماتى قالاسىنىڭ مەديتسينالىق ۇيىمدارى ەپيدەمياعا قارسى قاۋىپسىزدىك تالاپتارىن ساقتاي وتىرىپ, كارانتين رەجىمىندە جۇمىس ىستەۋدى جالعاستىرىپ وتىر.
الماتى
