– الەۋمەتتىك جوبالاردى قولداۋعا باعىتتالعان بريتان كەڭەسى مەن Chevron ەنەرگەتيكالىق كومپانياسى ۇيىمداستىرعان كونكۋرسقا قاتىسۋىڭىزعا نە تۇرتكى بولدى؟ وعان كىمدەر قاتىسا الادى؟
– بريتان كەڭەسى مەن Chevron ەنەرگەتيكالىق كومپانياسى الەۋمەتتىك جوبالار بايقاۋىن رەسپۋبليكامىزدىڭ ءتۇرلى قالالارىندا جىل سايىن وتكىزىپ تۇرادى. 2017 جىلى ايماقتار تىزىمىنە اتىراۋ ءوڭىرى ەنگىزىلىپ, اتىراۋلىقتار دا ويداعى جوبالارىن جۇزەگە اسىرۋعا مۇمكىندىك الدى. نەگىزى, جوبا تۋرالى بىلتىر ەستىدىم. الايدا قۇجات تاپسىرۋعا كەش قالىپ, قاتىسۋدىڭ رەتى بيىل تۋدى. جوبانىڭ ماقساتى ەلىمىزدىڭ تۇكپىر-تۇكپىرىندەگى ءوز ماقساتى مەن يدەياسى بار جاستارعا قولداۋ كورسەتۋ. 18 بەن 29 جاس ارالىعىنداعى كەز كەلگەن قازاقستاندىق تەحنولوگيا, عىلىمي يننوۆاتسيا, اۋىل شارۋاشىلىعى مەن الەۋمەتتىك ماسەلەلەرگە قاتىستى جوباسىن ۇسىنا الادى. ەڭ باستىسى, جوبا حالىققا پايدالى بولۋى كەرەك.
ىرىكتەۋ 15 شىلدەدە باستالىپ, 1 ايعا سوزىلدى. 100-دەن استام جوبانىڭ ىشىنەن 25 ۇزدىگى تاڭدالدى. ودان ءارى 3 اپتا بويى ارنايى تاعايىندالعان مەنتورلارمەن جۇمىس ىستەپ, جوبامىزدى قورعادىق.
گرانت الۋ ءۇشىن جوبامەن قاتار مەنتوردىڭ دا ماڭىزى زور. مەنىڭ مەنتورىم اتىراۋداعى تاجىريبەلى بيزنەس ترەنەرلەردىڭ ءبىرى – بيبىگۇل شاحيەۆا. ول جوبام تۋرالى ەستىگەننەن باستاپ, جان-جاقتى كومەك كورسەتىپ, دايىندادى, ناقتىلاي ايتقاندا جوبامدى قازىلار الدىندا قورعاۋعا, قوسىمشا سۇراقتارعا جاۋاپ ىزدەۋگە, كارانتين سەكىلدى داعدارىس كەزەڭدەرىندەگى جۇمىستى ۇيىمداستىرۋعا, ايماقتاعى باسەكەلەستەردى زەرتتەۋگە كومەكتەستى.
جالپى, جوبانىڭ ءوز تالاپتارى مەن ەرەجەلەرى بار. ارنايى تاپسىرمالار بەرىلىپ, قاداعالانادى. قاتىسۋشىلار جۇمىسى اپتا سايىن باعالانىپ وتىرادى. تاپسىرمالاردىڭ ۋاقتىلى ورىندالۋى مىندەتتەلەدى.
جوبا ايماقتاعى وزەكتى ماسەلەلەردى شەشۋگە ىقپال ەتەتىندەي بولۋى ءتيىس, ونىڭ حالىققا پايدالى بولعانى ابزال. جوبانىڭ ەرەكشەلىگى دە نازارعا الىنادى. مەن ەرەكشە بالالارعا ارنالعان ارت تەراپيا جوباسىن ۇسىندىم.
– ءسىزدىڭ جوباڭىز نەسىمەن ەرەكشەلەندى؟ جوبا يدەياسى قالاي تۋدى؟
– مەنىڭ جوبام ونەرمەن ەمدەۋگە, ياعني ارت تەراپياعا قاتىستى. مەنىڭ تاڭداۋىم سونىڭ ىشىندەگى قۇم تەراپياسى. جالپى, قۇم تەراپياسىنىڭ ادامنىڭ پسيحيكاسىنا, سەزۋ مۇشەلەرىنە تيگىزەر پايداسى مول: دەپرەسسيا, پسيحولوگيالىق شارشاۋداعى ادامداردىڭ دەرتىنە بىردەن-ءبىر ەم. ول كوپتەگەن تاجىريبە نەگىزىندە دالەلدەنىپ ءجۇر. بالالاردىڭ ۇساق موتوريكاسىن دامىتۋدا ۇلەسى كوپ. ال ەرەكشە كۇتىمدى قاجەت ەتەتىن بالالار ءۇشىن تىپتەن پايدالى. ۇساق موتوريكاسىن دامىتۋ ارقىلى دۇرىس سويلەۋىنە, ومىرتقا جۇيەسىنىڭ قالىپتى جۇمىس ىستەۋىنە اسەر ەتە الامىز. دۇرىس سۋرەت سالۋدى ۇيرەتۋ ارقىلى ويىن جيناقتاۋعا, قيالىن كەڭەيتۋگە كومەكتەسەمىز.
اتىراۋدا ەرەكشە بالالارعا ارنالعان ورتالىقتار بار. ولارعا بەلگىلى ءبىر جاستاعى بالالار عانا قابىلدانادى. بۇل جاعداي ارت تەراپيا ورتالىقتارىنىڭ قاجەتتىلىگىن بىلدىرەدى. سونىمەن قاتار 13-18 جاس ارالىعىنداعى بالالارعا كوپ كوڭىل بولىنبەيدى. ال ولار ءالى دە دامۋدى قاجەت ەتەتىن توپ. ءوزىمنىڭ تاجىريبەمدى, ءبىلىمىمدى جيناقتاپ, مەنتورىممەن كەڭەسىپ جوسپار قۇردىق. جوبا وسىلاي پايدا بولدى.
بىلتىر اتىراۋ وبلىستىق ىشكى ساياسات باسقارماسىنىڭ ازاماتتىق ورتالىعىنا جۇمىسقا ورنالاستىم. ۇكىمەتتىك ەمەس ۇيىمدارمەن جۇمىس ىستەگەندىكتەن الەۋمەتتىك باعدارلامالاردىڭ باسى-قاسىندا جۇرەمىز. ايماقتاعى الەۋمەتتىك ماسەلەلەردەن حاباردارمىن. اتىراۋعا كەلگەنىمدە, ارت تەراپيا ورتالىقتارىن ىزدەي باستادىم. وكىنىشكە قاراي, جاقسى ورتالىق تابۋ قيىنعا سوقتى.
– دەمەك اتىراۋلىقتار سىزدەردىڭ ورتالىعىڭىزدا تەگىن ارت تەراپيا ساباقتارىن الا الادى عوي؟
– ءيا, ەرەكشە كۇتىمدى قاجەت ەتەتىن بالالار ورتالىق جۇمىسىن باستاعاننان كەيىن تەگىن ساباقتارعا قاتىسا الادى. ارنايى ماماندار قۇممەن, سۋمەن سۋرەت سالۋدى ۇيرەتىپ, قاجەتتى بىلىممەن بولىسەدى. ساباقتاردىڭ بارلىعى تەراپياعا نەگىزدەلگەن. ورتالىقتا دەفەكتولوگ-لوگوپەد, پسيحولوگتار دا جۇمىس ىستەيدى. ياعني, ورتالىق جاي عانا بوس ۋاقىتىن وتكىزەتىن جەر ەمەس, ولاردىڭ دەنساۋلىعىن تۇزەيتىن ورتالىققا اينالسا دەگەن ويىمىز بار. قۇرال-جابدىقتارعا تاپسىرىس بەرىلدى, ماماندار دا دايىن. قازان ايىندا جۇمىسىمىزدى باستايمىز دەگەن ويدامىز.
اتىراۋ قالاسىندا ارت تەراپيا بويىنشا 2 مامان عانا بار. ولار ەرىكتى تۇردە كومەكتەسىپ جاتىر. مامانداردىڭ قاتارىن تولىقتىرساق دەگەن وي بار. سوندىقتان كەلەشەكتە ۆولونتەرلەردى شاقىرىپ, ولارعا دا ارت تەراپيانى ۇيرەتۋدى جوسپارلاپ وتىرمىز.
اڭگىمەلەسكەن
سۆەتلانا عالىمجانقىزى,
«Egemen Qazaqstan»
