ز.سۇلەيمەنوۆا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە حالىقارالىق قاتىناستار ماماندىعى بويىنشا باكالاۆردا, ودان سوڭ ماگيستراتۋرادا ءبىلىمىن تولىقتىرعان. ۋنيۆەرسيتەتتەن كەيىن پرەزيدەنت جانىنداعى قازاقستان ستراتەگيالىق زەرتتەۋ ينستيتۋتىندا ەڭبەك جولىن باستاعان.
– ءساتى ءتۇسىپ, شەتەلگە جۇمىسقا اتتاندىم. تايلاند استاناسى بانگكوگتە بىرىككەن ۇلتتار ۇيىمىنىڭ ازيا جانە تىنىق مۇحيتى ايماعى ءۇشىن الەۋمەتتىك جانە ەكونوميكالىق كوميسسياسىندا قورشاعان ورتانى قورعاۋ جانە دامۋ ديۆيزيونىندا قىزمەت اتقاردىم. 2016 جىلى حالىقارالىق قاتىناس بويىنشا ءبىلىمىمدى تەرەڭدەتۋ ماقساتىندا جاپونيانىڭ ساياسي زەرتتەۋ ينستيتۋىنا دوكتورانتۋراعا ءتۇستىم. دوكتورانتۋرادا وقىپ ءجۇرىپ بۇۇ-نىڭ ءتۇرلى اگەنتتىكتەرىندە جۇمىسىمدى جالعاستىردىم. سونىڭ ىشىندە بۇۇ-نىڭ قازاقستان مەن تۇرىكمەنستانعا باعىتتالعان دامۋ باعدارلامالارىمەن جۇمىس ىستەدىم. سونىمەن بىرگە ۇكىمەتتىك ەمەس ۇيىمدارمەن جانە جەكە سەكتورلارمەن تىعىز بايلانىستا بولدىم, – دەيدى زۋلفيا.
شەتەلدە جۇرگەنىندە ەلگە ورالۋدى جوسپارلاعان زۋلفيا پرەزيدەنتتىڭ جاستار كادرلىق رەزەرۆى تۋرالى باستاماسىن ەستىپ, مۇنىڭ مۇمكىندىك ەكەنىن تۇسىنەدى.
– اقپارات العاننان كەيىن جوباعا قۇجات تاپسىردىم. ىرىكتەۋدىڭ العاشقى كەزەڭدەرى تسيفرلى جانە ۆەربالدى تەستىلەردەن تۇراتىنى بەلگىلى, كوبى وسى كەزەڭنەن وتپەي قالعانىن ەستىدىم. ينتەرنەتتەن ۇقساس تەستىلەر تاۋىپ, دايىندالدىم, كىتاپتار وقىدىم. العاشقى كەزەڭ اسا قيىن بولمادى, دەگەنمەن قىزۋ دايىندىقتى قاجەت ەتەدى. ءۇشىنشى كەزەڭدە وزىمە جاقىن جوبانى تانىستىردىم. دوكتورلىق ديسسەرتاتسيامنىڭ تاقىرىبى – سىرداريا باسسەينىندەگى ترانسشەكارالىق سۋ ىنتىماقتاستىعى ماسەلەلەرى. جوبامدى قازاقستانداعى سۋ جانە ترانسشەكارالىق سۋ ىنتىماقتاستىعى ماسەلەلەرىن شەشۋگە باعىتتادىم. ەكسپەرتتىك كوميسسيامەن سۇحباتتى ەڭ قىزىق كەزەڭ دەر ەدىم. جانىڭا جاقىن, ءوزىڭ بىلەتىن تاقىرىپتى تالقىلاۋدىڭ قانداي كەرەمەت ەكەنىن ايتپاسام دا تۇسىنىكتى. سوڭعى كەزەڭ سىناق ەمەس, شىن مانىندە سۇحبات رەتىندە ءوتتى. ءوز ويىمدى, جوسپارلارىمدى ءبىلىمدى, بىلىكتى, جوعارى لاۋازىمداعى تۇلعالارمەن ءبولىسۋ دە مەن ءۇشىن مارتەبە بولدى, – دەيدى سىننان سۇرىنبەي وتكەن رەزەرۆشى.
بۇگىندە زۋلفيا سۇلەيمەنوۆا ەكولوگيا, گەولوگيا جانە تابيعي رەسۋرستار مينيسترلىگىنىڭ كليماتتىق ساياسات جانە جاسىل تەحنولوگيالار دەپارتامەنتى ديرەكتورىنىڭ ورىنباسارى بولىپ قىزمەت ەتەدى. قۇرىلىم ەلىمىزدىڭ كليماتتىق ساياساتىن ىسكە اسىرۋمەن, قالىپاستىرۋمەن, وزون قاباتىن ساقتاۋمەن, سونىمەن قوسا جاسىل تەحنولوگيالاردى ىلگەرىلەتۋ ماسەلەلەرىمەن اينالىسادى.
– قىزمەتتەگى نەگىزگى ماقساتىم – قازاقستاننىڭ كليماتتىق ساياساتىن جاقسارتۋ. ءبارىمىز ەستىپ, ءبىلىپ جۇرگەندەي, ەكولوگيا ماسەلەلەرى دۇنيەجۇزى بويىنشا وزەكتى. بۇل بەيجاي قارايتىن جايت ەمەس. كليمات ماسەلەلەرى ەكونوميكا جانە الەۋمەتپەن تىعىز بايلانىستى. جاقىندا ەۋروپالىق وداق پارنيكتىك گازداردىڭ شىعارىندىلارىنا شەكارالىق سالىق ەنگىزۋدى قاراستىرا باستادى. ەگەر بۇل ساياسات جۇزەگە اسسا, ەكونوميكامىزعا اسەر ەتەدى, ال ول الەۋمەتكە دە وڭ اسەر ەتەتىنى ءسوزسىز. بۇعان جاۋاپتى مينيسترلىك وسى سالاداعى احۋالدى, جاھاندىق ترەندتەردى ءجىتى قاراپ, دۇرىس تالداپ, ەلىمىزدىڭ مۇددەسىنە ساي كەلەتىن ساياساتتى قالىپتاستىرۋى كەرەك. وسى باعىتتاعى سۇراققا جاۋاپ ىزدەۋى مىندەت. مەنىڭ باستى ماقساتىم – كليمات ماسەلەلەرى بويىنشا اناليتيكانى نىعايتۋ, سونىمەن بىرگە جاڭا ءارى دۇرىس ەكولوگيالىق ساياسات قالىپتاستىرۋعا اتسالىسۋ. بىزگە ەڭ باستىسى حالىقتىڭ ءومىر ساپاسىن ارتتىراتىن ساياسات قاجەت, – دەيدى ول.
جالپى, مەملەكەت باسشىسى ايتىپ كەتكەندەي, جاستار كادرلىق رەزەرۆىنىڭ نەگىزگى ماقساتى مەملەكەتتىك قىزمەت سالاسىندا ترانزاكتسيالىق ليدەر ەمەس, ترانسفورماتسيالىق ليدەرلەر قالىپتاستىرۋ. زۋلفيا ەندىگى كەزەكتە قالىپتاسىپ جاتقان ترانسفورماتسيانى جۇزەگە اسىرۋعا مۇمكىندىك بەرىلسە دەگەن ويىن دا جاسىرمادى.
– حالىقارالىق ۇيىمداردا جۇمىس ىستەپ جۇرگەندە سارالاپ, ويىما توقىپ جۇرەندەرىم كوپ بولدى. ەكولوگيالىق ساياسات پەن قورشاعان ورتانى قورعاۋ ماقساتىندا شەتەلدەر وكىلدەرىمەن بىرلەسىپ قىزمەت ەتتىك. كەيبىر ۇدەرىستەردىڭ شەتەلدە قالاي جۇزەگە اساتىنىن بايقادىم. مەملەكەتتىك قىزمەتكە كەلگەلى دە جۇيەنى وڭتايلاندىرۋعا قاتىستى ءبىراز وي قالىپتاستىرىپ ۇلگەردىم. الدا سولاردى جۇزەگە اسىرا الامىن دەگەن ويدامىن, بۇعان دەيىنگى تاجىريبەمدى, ءبىلىمىمدى پايداعا جاراتامىن دەپ سەنەمىن. مەملەكەتتىك قىزمەتتىڭ باستى ماقساتى – ەلىمىزدە ۇستەمدىك ەتەتىن دۇرىس زاڭ مەن ساياسات قالىپتاستىرۋ, ادامدارعا وزدەرىنىڭ مۇمكىندىكتەرىن جۇزەگە اسىرا الاتىن جاعداي جاساۋ. سول تۇرعىدان قاراعاندا, ءوزىمنىڭ وقىعانىمدى, تاجىريبەمدى ءتيىمدى قولدانا الامىن دەگەن نيەتتەمىن», دەيدى جاس مامان.
ول قازىرگى وي جارىستىراتىن, ارماندارعا قول جەتكىزۋگە مۇمكىندىك مول زاماندا جاستاردىڭ ءوز الدارىنا بيىك ماقساتتار قويا ءبىلۋى ماڭىزدى ەكەنىن جەتكىزدى.
– جاستار تەك باعا ءۇشىن ەمەس, «بىلسەم» دەگەن ىنتامەن وقۋى كەرەك. بەلگىلى ءبىر تاقىرىپقا قىزىعۋشىلىق بولسا, ونى دامىتا تۇسكەن ابزال. ويتكەنى ءبىزدىڭ قوعامنىڭ, مەملەكەتتىڭ تاعى ءبىر ماسەلەسى – كادر جەتىسپەۋشىلىگى. ەلىمىزدى الدىڭعى قاتارلى مەملەكەتتەر اراسىنان كورىگىمىز كەلسە, ساپالى كادرلار دايىنداۋ كەرەك. جاستار وزدەرى قالاعان, ەرتەڭ مەڭگەرىپ كەتە الاتىن ماماندىقتى الۋعا ۇمتىلۋى ءتيىس. ال ودان كەيىن وزىنە سەنۋى كەرەك. وزىنە سەنبەگەن ادامعا ەشكىم سەنبەيدى. «ارمانسىز ادام – قاناتسىز قۇس» دەگەندى ءجيى ەستيمىز, الايدا ونىڭ مانىنە ۇڭىلە بەرەيمىز. ءبىزدى الىس جولدارعا دا, بيىك اسۋلاردان وتۋگە دە جەتەلەيتىنى – ارمان. سوندىقتان ۇلكەن ادام بولۋ ءۇشىن ۇلكەن ارماندارعا قول سوزۋ كەرەك-اق, – دەپ تۇيىندەدى ءسوزىن جاس عالىم.
