قازاق تويى – قازاقتىڭ باۋىرمالدىعىن, بىرتۇتاستىعىن, داستۇرگە بەرىك, سالتقا ادالدىعىن تانىتاتىن. الايدا قازاقپەن قانشاما عاسىر بويى بىرگە جاساپ كەلە جاتقان وسىناۋ قازىنامىزدىڭ بايىرعى كەلبەتىن كەيىنگى شيرەك عاسىردا مۇلدەم وزگەرتىپ, باسقا ارناعا بۇرىپ جىبەردىك. بۇگىنگى تويدىڭ سيپاتى داراقى, داڭعوي, ىسىراپشىل, توعىشار تويعا اينالدى. بۇل توي بابامىزدان ميراسقا قالعان توي ەمەس, جالعان ماقتان, قۇر تىراش, بوس باسەكەگە جالعاسىپ بارادى. تويعا توقتاۋ ايتاتىن جاعدايعا جەتتىك. بۇل – ۇيات.
ءدال قازىر تويدىڭ زامانى ەمەس, ويدىڭ زامانى ەكەنىن ۇعاتىن اسا جاۋاپتى كەزەڭدە تۇرمىز. ەسىنەپ بولساق ەسىمىزدى جيىپ, بىرىڭعاي كوپىرىك ءسوز بەن وتىرىك ماداقتان عانا تۇراتىن ءبىر كۇندىك ءماجىلىس-ءماسليحاتتى شەكتەۋىمىز كەرەك.
تۇپتەپ كەلگەندە تويدىڭ العاشقى دا, سوڭعى دا يەسى ءبىز ەمەس. ايتپەسە, ەۋروپا توي تويلايمىن دەسە شاشۋعا اقشاسى, شىعىنداۋعا ءسوزى تاۋسىلىپ وتىرعان جوق. مادەنيەتى وزىق ەلدەردىڭ بارلىعى بۇل ساۋىق-سايران ساتىسىنان الدەقاشان ءوتىپ كەتكەن. ءبىز عانا اس ءىشىپ, اياق بوساتقانىمىزعا ءماز-مەيرامبىز.
الداعى ۋاقىتتا تويعا شاشاتىن قارجى-قاراجاتتى عىلىم-بىلىمگە, ونەرگە باعىتتاۋدىڭ باعدارلاماسىن قۇرۋ كەرەك. تويعا كەتەتىن شاش-ەتەك شىعىنىنان بولەك, توي قازاقتىڭ التىن ۋاقىتىن دا تەككە ءولتىرىپ جاتىر.
جالپى مەن بۇگىنگى تويدى ەش اقتاي المايدى ەكەنمىن: توي بۇرىن تاربيە قۇرالى ەدى, قازىر بەيباستاق اڭگىمە مەن جۇگەنسىز الاڭعا اينالدى. بەيادەپ قىلىق ىزدەسەك تە, تارس-گۇرس فونوگرامما ەستىگىمىز كەلسە دە, ادەبيەتىمىز بەن مادەنيەتىمىزدەگى قىپ-قىزىل حالتۋرامەن دە وسى تويدا كەزدەسەتىن بولدىق.
بۇل ايتىپ وتىرعانىمىز سونداي-اق ءبىز ءسوز ەتكەن تويدان بولەك مەملەكەتتىڭ مىس-مىس اقشاسىن شاشىپ, استا-توك وتكىزىلىپ كەلگەن مەرەكەلىك كەشتەرگە دە قاتىستى بولۋى كەرەك.
سەرىك اقسۇڭقار ۇلى,
اقىن, قازاقستاننىڭ ەڭبەك سىڭىرگەن قايراتكەرى
قاراعاندى
