اسىرەسە, قازاقتىڭ اس پەن توي ماسەلەسى. سوڭعى جىلدارى ەل جاپپاي «تويجارىس»-قا ءتۇسىپ كەتتى. اتالارىمىز ايتتى ەمەس پە: «توي باردىڭ مالىن شاشادى, جوقتىڭ ارتىن اشادى» دەپ نەمەسە وسىنداي ءبىر كۇندىك قۋانىش ءۇشىن مىڭ كۇندىك قايعى ساتىپ الاتىن توزعان ءداستۇر كىمگە كەرەك. كوپتەگەن تانىس-تۋىستاردى بىلەمىن توي جاسايمىز دەپ كرەديت العان, ونىسىن وتەۋ ءۇشىن ىڭىرشاعى اينالىپ, زورعا ءجۇر.
بۇل ماسەلە قوعامدى دا, بيلىكتى دە ويلاندىرۋى ءتيىس. وسىدان ءتورت-بەس كۇن بۇرىن «انا ءتىلى» اپتالىعىنا مەملەكەتتىك حاتشى قىرىمبەك كوشەرباەۆتىڭ ماقالاسى شىعىپتى. وسى جازبادا: ء«داستۇردىڭ وزىعى بار, توزىعى بار». راسىندا ءبىز قازىر قۇندىلىقتارى جاڭارعان مۇلدە وزگە عاسىردا ءومىر ءسۇرىپ جاتقانىمىزدى ەستەن شىعارماۋىمىز كەرەك. اشىعىن ايتقاندا, بىزدە ۇلتتىق پراگماتيزمنىڭ نەگىزدەرىنە قايشى كەلەتىن ىسىراپشىلدىق سياقتى ادەتتەرگە قارسى شارالار قابىلداۋدا ناقتى ۇستانىم جوق. كورشى ەلدەردە تۋعاننان ولگەنگە دەيىنگى ورىندالاتىن سالت-ءداستۇر, (توي, اس, جانازا, ت.ب) ادەت-عۇرىپ راسىمدەرىن زاڭمەن رەتتەپ قويعاندىقتان, حالىق قويىلعان تالاپتى قالىپتى تۇردە قابىلدايدى» دەپتى مەملەكەتتىك حاتشى.
سونىمەن قاتار قىرىمبەك ەلەۋ ۇلى, الداعى ۋاقىتتا كوپشىلىكپەن كەڭەسە كەلە, ءبىز دە عۇرىپتىق راسىمدەردى زاڭمەن رەتتەۋ شارالارىن قولعا الاتىن ۋاقىت جەتتى, دەيدى. بۇل پىكىرگە ءوز باسىم قوس قولىمدى كوتەرىپ قوسىلامىن. ءتىپتى الداعى ۋاقىتتا اس پەن تويدى ەڭ كوپ دەگەندە 50 ادامنان اسىرماي وتكىزسەك, ونى زاڭمەن بەكىتسە دەگەن ۇسىنىس بار. ونىڭ سىرتىندا توي ۇستىندە ايتىلاتىن ماقتاۋ-ماداق, داراقىلىق, ىسىراپشىلدىق بىلە بىلسەك ىندەتتەن دە جامان.
سماعۇل ەلۋباي,
جازۋشى
