ءبىر سوزبەن ايتقاندا «وتىز كۇن ويىنى مەن قىرىق كۇن تويى تارقاماعان» قازاق تويىنا رەفورما قاجەت پە دەگەن سۇراق تۋىندايدى. ءدال وسى وي بۇل كۇندە ءبىرازىمىزدىڭ سانامىزدى مەڭدەپ ءجۇر.
ارينە قازاق ەجەلدەن, ساۋىقشىل, تويشىل, دۋمانشىل حالىق. قادىر اقىننىڭ سوزىمەن ايتساق: «ويلاي دا بىلگەن ادامعا, تويلاي دا بىلگەن لايىق». بۇل حالقىمىزدىڭ كونە داستۇرىمەن, بولمىسىمەن ساباقتاسىپ جاتقان دۇنيە. كەڭدىگىمىزدىڭ ءبىر كورىنىسى. دەي تۇرعانمەن, سوڭعى ون شاقتى جىلدىڭ بەدەرىندە ءدال وسى تۇرعىدان كەلگەندە ءسال داراقىلانىپ كەتتىك پە دەيمىن. ۇستەل ءۇستى مايىسارداي استا-توك داستارحان جايىپ اسىرە ىسىراپشىلدىققا جول بەردىك. جاعدايى بارلار توي ارقىلى ءبىر-بىرىمەن باسەكەگە ءتۇسىپ, قاراپايىم حالىق ءبىر كۇندىك توي ءۇشىن بانكتەردەن جوعارى پايىزدىق مولشەرلەمەمەن نەسيە الاتىن بولدى. بۇل ءوز كەزەگىندە حالىق اراسىنا الەۋمەتتىك جىك ءتۇسىرىپ جاتىر. مۇنىڭ ءتۇبى جاقسى ەمەس.
مامىراجاي كەزدە توي جاساما دەۋدەن اۋلاقپىز. اركىمنىڭ ومىردە ءبىر بولاتىن قۋانىشى. الايدا, داۋلەتىڭە ساي ارەكەت قىلىپ, كورپەڭە قاراي كوسىلۋ دەگەن بولادى. وسىنى ۇمىتپاساق يگى. ماسەلەن, وزبەك اعايىندار ەڭ ۇلكەن تويلارىنىڭ وزىنە ارى كەتسە 100-150 ادام شاقىرادى. تاماقتى دا كىسى باسىنا شاقتاپ قويادى. العاشقى داستارحانعا قويىلعان تاعامدار جەلىنىپ بولعاننان كەيىن عانا كەلەسى تاماق اكەلىنەدى. زەردەلەپ قاراساق, بۇل دا مادەنيەت. شاريعاتىمىزدا: «جەڭدەر, ىشىڭدەر, بىراق ىسىراپقا جول بەرمەڭدەر» دەمەي مە؟ قۇدايدىڭ سىيىن ۇنەمدەۋ كەرەك. باتىس ەلدەرىندە دە ءدال سولاي. وتباسىڭداعى قۋانىشتى جاقىن-جۇراعاتىڭمەن شاعىنداپ اتاپ وتسەڭ قانداي جاقسى. ماسەلەن ارى كەتسە 100 ادام. ال ءبىزدىڭ كەيبىر تويلاردا جارتى ميلليون ادام جينالادى. ىزگىشۋاق تىلەكتەر توگىلەتىن وتباسىلىق مەرەكەلەر كونتسەرتكە ۇلاسىپ, ارزان اڭگىمە, ءاجۋا ازىلدەر ايتىلىپ جاتاتىن كەزدەر دە كوپ. مۇنى دا ءوز جولىمەن جۇيەلەۋ كەرەك سەكىلدى.
قازاقتى لايىم تويدان اجىراتپاسىن. دەگەنمەن داراقىلىق, داڭعازالىق, ىسىراپشىلدىقتان ارىلىپ, ۇنەمشىلدىككە ىقشامدىلىققا بەيىمدەلسەك دەگەن تىلەگىم بار.
ءسابيت ورازباەۆ,
قازاقستاننىڭ حالىق ءارتىسى,
مەملەكەتتىك سىيلىقتىڭ لاۋرەاتى
الماتى
