«بۇدان جامان كەزىمىزدە دە تويعا بارعانبىز» دەگەندى اجەلەرىمىز ايتىپ وتىراتىن. بىراق بۇگىنگى توي سول بۇرىنعى تويلاردىڭ ءداستۇرىن بۇزىپ, ۇلتىمىزدىڭ ۇردىسىنەن اسىپ-تاسىپ شىعىپ, بەتىمەن كەتىپ, سىڭارەزۋ اتتاي بوي بەرمەي, بەتالدى لاعا باستادى. زىڭگىتتەي جىگىتتەردىڭ شالبارىن شەشىپ بيلەۋى, ءاپ-اسەم قىزداردىڭ تىرجالاڭاشتانىپ بۇراڭدايتىن كورگەنسىز كورىنىستەرى كوبەيدى. كەلە-كەلە بۇگىنگى تويلارداعى ونداي جۇگەنسىزدىكتەر بەلەڭ العانى سونشا, قازىرگى قازاقتى اباي اتامىز ايتقانداي «باسىندا مي جوق, وزىندە وي جوق, كۇلكىشىل كەردەڭ, ناداننىڭ» كەيپىنە جەتكىزۋگە جاقىندادى.
ال وسى قالىپتاسىپ قالعان تويدىڭ فورماتىن قالاي وزگەرتۋ كەرەك دەگەندە ءبارىمىز باسىمىزدى قاسيمىز. دەگەنمەن «ۆەلوسيپەدتى قايتا ويلاپ تاپپاساق تا» وي جۇگىرتىپ كورەيىك. كوپتىڭ پىكىرىنىڭ ۇشتاسا كەلە توقايلاساتىن تۇسى بار. ول – تويدى استا-توك ىسىراپشىلدىق, داڭعازا دىردۋ, داراقى ماقتان, ەلىرمە مۋزىكا, بوسپە باسەكە, داۋرىقپا, كوپىرمە كوپ سوزدەن ارىلتۋ كەرەك دەگەن پىكىر. جاتتاندى, جەلىكپە جەل سوزبەن جورتاقتاپ, بەيباستاق, انايى ءازىل ايتىپ, قۇرمەتتى قوناقتاردى قىلجاققا اينالدىرىپ, قولجاۋلىق قىلۋعا تىرىساتىن, ءتىلى مەن جاعىنا سۇيەنگەن ادەپسىز اسابالاردىڭ استامشىلىعىن تىيۋ كەرەك. قوناقتار بىرنەشە ساعات بويى ءبىتىپ بەرمەيتىن, ءبىرىن-ءبىرى قايتالايتىن ۇزىن-سونار توست-تىلەكتەردەن, ءمان-ماعىناسىز, قىزدىرما قىزىل سوزدەردەن قۇلاعى سارسىلىپ, اسقازاندارىن اياماي نىعارلاۋدان قالجىراپ-شارشاپ قايتپاي, كوڭىلى دە كوتەرىلىپ, ءبىر جاساپ, سەرگىپ, سەرپىلىپ قالاتىنداي, ءارى عيبراتتى اسەر الاتىنداي بەرەكەلى مەرەكەگە اينالدىرساق دەيمىن. توي – ۇلتتىق سالت-ءداستۇرىمىزدىڭ سالتانات قۇراتىن, ۇلتتىق ونەرىمىزدىڭ ورگە جۇزەتىن كۇنى بولۋى كەرەك. تويدى رەفورمالاۋعا ءبىلىمدى ەتنوگرافتار مەن بىلىكتى مادەنيەت-ونەر قايراتكەرلەرىن جانە جاڭاشا ويلايتىن دارىندى جاستاردى تارتقان ءجون. جاڭا فورماتتى جوبا كوپتىڭ كوڭىلىنەن شىعاتىنداي بولۋى كەرەك. تىزەگە باسىپ توي وتكىزۋگە دە بولمايدى. «حالىق قازىناسى» بولعاننان كەيىن, ونىڭ تاعدىرىن حالىقتىڭ تالقىسىنا سالىپ العان تەرىس بولماس.
ۇلىقبەك ەسداۋلەت,
مەملەكەتتىك سىيلىقتىڭ لاۋرەاتى, قازاقستان جازۋشىلار وداعىنىڭ توراعاسى
