«ازاماتتارعا ارنالعان ۇكىمەت» باسقارماسىنىڭ ءتورايىمى اسەمگۇل بالتاشەۆانىڭ ايتۋىنشا, قازاقستان بويىنشا مەملەكەتتىك كورپوراتسيانىڭ بىرقاتار مامانى قايتا دايارلاۋدان ءوتىپ, ۆيدەوكەڭەسشى رەتىندە ازاماتتاردى قاشىقتىقتان ماب-نا تىركەۋگە كىرىسكەن.
«قازىر 1414 سall-ورتالىعىندا ءبىر جارىم مىڭ ادام جۇمىس ىستەيدى. سونىڭ ىشىندە 400 ۆيدەوكەڭەسشى ونلاين تارتىپتە تۇرعىنداردى ءموبيلدى ازاماتتار بازاسىنا تىركەۋمەن اينالىسادى. وسىنىڭ ناتيجەسىندە كوروناۆيرۋس ىندەتى كەزىندە دە بۇل ءۇردىس توقتاماي, سوڭعى 5-6 اي ىشىندە مەملەكەتتىك قىزمەتتەردى ءموبيلدى قۇرالدار مەن egov.kz پورتالى ارقىلى الۋشىلاردىڭ قاتارى 1,6 ميلليونعا ارتتى», - دەدى اسەمگۇل بالتاشەۆا.
ماب-قا تىركەلگەن تۇلعالار مەملەكەتتىك قىزمەتتەرگە eGovMobile قوسىمشاسى, EgovKzBot2.0 تەلەگرام-بوتى ارقىلى قول جەتكىزىپ, سونداي-اق پرواكتيۆتى قىزمەتتەر مەن باسقا دا سەرۆيستەردىڭ يگىلىگىن كورە الادى. ونىڭ ۇستىنە ماب قولدانۋشىلارىنا قۇجاتتىڭ دايىن بولعاندىعى نەمەسە ەتسق مەرزىمىنىڭ ءوتىپ بارا جاتقاندىعى تۋرالى sms-حابارلاما كەلەدى.
ايتا كەتۋ كەرەك, ءموبيلدى ازاماتتار بازاسىنا egov.kz ەلەكتروندىق ۇكىمەت پورتالىنداعى جەكە كابينەت ارقىلى نەمەسە egov.kz ۆيرتۋالدى كەڭەسشىسىنىڭ كومەگىمەن تىركەلۋگە بولادى. ءموبيلدى ازاماتتار بازاسىنداعى تىركەۋدى تەكسەرۋ ءۇشىن egov.kz ەلەكتروندىق پورتالىنداعى «سەرۆيستەر» ءبولىمىن قاراۋ كەرەك.
