جەرەبە ناتيجەسىندە قازاقستان كومانداسى سارى تۇسكە بويالعان ءتورت تانكىگە يە بولدى. كونكۋرس ۇيىمداستىرۋشىلارى – رەسەيلىك تاراپتان ۇسىنىلعان تەحنيكانى تەحنيكالىق قامتاماسىز ەتۋ توبى وفيتسەرلەرىنىڭ باسشىلىعىمەن ەكيپاجدار قابىلدادى.
قابىلداۋ بارىسىندا تانكىلەردىڭ تەحنيكالىق جاعدايى, جاۋىنگەرلىك ماشينانىڭ بولىكتەرى جانە مەحانيزمدەرىنىڭ جارامدىلىعى مەن قابىلەتتىلىگى تەكسەرىلدى. سونىمەن قاتار تانكتەردىڭ تەحنيكالىق قامتاماسىز ەتىلۋى جانە پايدالانۋ الدىنداعى دايىندىققا نازار اۋدارىلدى.
قازاقستاندىق اسكەري قىزمەتشىلەر جاۋىنگەرلىك ماشينالاردىڭ جاعدايى قاناعاتتانارلىق ەكەندىگىن جانە «تانك بياتلونى» سايىسى اياسىنداعى بارلىق تاپسىرمالاردى ورىنداۋعا مۇمكىندىك بەرەتىنىن اتاپ ءوتتى.
جارىس باستالماس بۇرىن قازاقستاندىق تانكىشىلەرگە قارۋ-جاراقتىڭ دايىندىعى مەن دالدىگىن دۇرىستاپ, تانك بياتلونى تراسساسىنىڭ باعىتىن مۇقيات زەردەلەۋ قاجەت.
قازاقستان قارۋلى كۇشتەرىنىڭ كومانداسىنا حالىقارالىق بايقاۋعا ىرىكتەۋ كەزەڭدەرىنىڭ كوشباسشىلارى – تانكىشى ماماندار تاڭدالدى. الدىن الا كەزەڭدەر بارىسىندا «وڭتۇستىك», «شىعىس», «باتىس» وڭىرلىك قولباسشىلىقتارىنىڭ جانە دەسانتتىق-شابۋىلداۋ اسكەرلەرىنىڭ اتىنان ءتورت تانك ماماندارىنىڭ ەكيپاجى ىرىكتەلدى. ەلىمىز اتىنان سىنعا تۇسەتىن كوماندانى قر قك باس شتابى باستىعىنىڭ ورىنباسارى گەنەرال-مايور ادىلبەك الدابەرگەنوۆ باسقارادى.
ەسكە سالا كەتەيىك, ارميا حالىقارالىق ويىندارى-2020 اياسىندا وتكىزىلەتىن «تانك بياتلونى» حالىقارالىق جارىسى 23 تامىز – 5 قىركۇيەك ارالىعىندا «الابينو» پوليگونىندا وتەدى. قازاقستاندىق كوماندا العاشقى جەكە جارىسىن 25 تامىز كۇنى باستاپ, قىرعىزستان, رەسەي جانە وزبەكستان تانكىشىلەرىمەن بىرگە ءبىر توپتا ونەر كورسەتەدى.
اتالعان ويىن 2013 جىلدان بەرى وتكىزىلىپ كەلەدى. قاتىسۋشى ەلدەردىڭ سانى دا جىل سايىن ارتۋدا. بيىل «تانك بياتلونىنا» 16 ەلدىڭ كوماندالارى قاتىسادى. ساراپشىلار اتاپ وتكەندەي, بايقاۋدىڭ ەڭ مىقتىلارى – بەلارۋس, قازاقستان, قىتاي جانە رەسەي قاتىسۋشىلارى.
«تانك بياتلونى» – بيىل قازاقستاندىق كوماندا قاتىساتىن جالعىز بايقاۋ. بۇل جالپى كوماندالىق جۇلدەلى ورىنداردى جەڭىپ الۋ مۇمكىندىگىن ايتارلىقتاي تومەندەتەدى. ويتكەنى كوپتەگەن بايقاۋلاردا جوعارعى ۇپاي جيناعان كوماندا جەڭىسكە جەتەدى. سوعان قاراماستان, قازاقستاندىق جاۋىنگەرلەر جەڭىس تۇعىرىنان كورىنۋگە ءۇمىتتى.
«تانك بياتلونى» تانكتى باسقارۋ, كەدەرگىلەردەن ءوتۋ جانە زەڭبىرەك پەن پۋلەمەتتەن نىسانا كوزدەۋ سياقتى جوعارى شەبەرلىكتى عانا ەمەس, سونىمەن قاتار ۇيلەسىمدىلىكتى, ەكيپاج مۇشەلەرىنىڭ ءىس-قيمىلىن ۇيلەستىرۋدى, جاقسى دەنە دايىندىعىن تالاپ ەتەدى.
