بۋرابايدا بيىكتىگى 42 مەترلىك شولۋ شەڭبەرى سالىنىپ جاتىر. جاڭا نىساننىڭ بوي كوتەرۋى دەمالۋشىلاردىڭ نازارىن اۋدارماق.
سونىمەن بىرگە وتباسىلىق, بالالار جانە ەكسترەمالدى باعىتتاعى اتتراكتسيوندار اشۋ دا قاراستىرىلعان. نىسان قۇرىلىسى "ششۋچە-بۋراباي كۋرورتى ايماعىن دامىتۋ" مەملەكەتتىك باعدارلاماسى شەڭبەرىندە جەكە ينۆەستورلاردى تارتۋ ارقىلى جۇزەگە اسىرىلۋدا. شولۋ شەڭبەرى مەن ءتۇرلى قىزىقتى اتتراكتسيوندار بۋراباي كۋرورتىنا دەمالۋعا كەلەتىن تۋريستەردىڭ كوڭىل كوتەرىپ, دەمالاتىن سۇيىكتى ورنىنا اينالادى دەگەن سەنىم بار.
– بۇل جالپى قۇنى 347 ميلليون تەڭگەنى قۇرايتىن ينۆەستيتسيالىق جوبا. ونى ينۆەستور "كولەسو ۋداچي" جشس جۇزەگە اسىرۋدا. نىسان بۋراباي كەنتىندەگى «بۋراباي دامۋ» جشس ۆيزيت ورتالىعىنىڭ اۋماعىندا ورنالاسادى. ونى ۇستىمىزدەگى جىلدىڭ ءۇشىنشى توقسانىندا پايدالانۋعا بەرۋ جوسپارلانعان, – دەيدى ازامات بايمۇقانوۆ.
شولۋ شەڭبەرى بۋراباي تۇرعىندارى مەن قوناقتارىنا كۋرورتى ايماقتىڭ كوركىن جىل بويى تاماشالاۋعا مۇمكىندىك بەرەدى. اتتراكتسيون تاۋلىك بويى قىزمەت كورسەتىپ, وندا 15 ادام جۇمىس ىستەيتىن بولادى. ايتا كەتەيىك, "ششۋچە-بۋراباي كۋرورتتى ايماعىن دامىتۋ" مەملەكەتتىك باعدارلاماسى شەڭبەرىندە 2025 جىلعا قاراي كۋرورتتى وڭىرگە كەلەتىن تۋريستەر سانىن 1,6 ميلليونعا جەتكىزۋ جوسپارلانعان.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
