ماسەلەن, ءماجىلىس دەپۋتاتى ج.نۇرمانبەتوۆا ەلوردانىڭ بىرقاتار ءبىلىم وشاقتارىندا بولىپ, پاندەميا كەزىندە وقۋشىلار مەن ستۋدەنتتەردى قاشىقتان وقىتۋ مۇمكىندىگىنە باقىلاۋ جاسادى. ل.ن.گۋميلەۆ اتىنداعى ەۇۋ-دە اتالعان وقۋ ورنى ۇستازدارىمەن جانە ورتا مەكتەپ مۇعالىمدەرىمەن كەزدەسۋدە دەپۋتات وقۋشىلاردى قاجەتتى وقۋلىقتارمەن, تسيفرلىق تەحنيكالارمەن, ينتەرنەتكە قولجەتىمدىلىكتى قامتاماسىز ەتۋ, ۇستازداردىڭ IT مۇمكىندىگىن قالىپتاستىرۋ, كەزەكشى توپتار ۇيىمداستىرۋ جانە باسقا دا وزەكتى ماسەلەلەردى تالقىلادى. دەپۋتات مەكتەپتەردى ارالاۋ بارىسىندا كومپيۋتەرمەن قامتۋ, جوعارى جىلدامدىقتى ينتەرنەت, ايرىقشا ءبىلىم قاجەتتىلىگىن تالاپ ەتەتىن بالالار وقۋىن ۇيىمداستىرۋ, باستاۋىش سىنىپتاردى ورىس ءتىلى, باسقا دا پاندەر بويىنشا ۇستازداردىڭ, دەفەكتولوگتار مەن لوگوپەدتەر جەتىسپەۋشىلىگى سىندى ماسەلەلەردى انىقتاعان بولاتىن. نۇر-سۇلتان قالاسى ءبىلىم باسقارماسى وكىلدەرىنىڭ ايتۋىنشا, جالپى ءبىلىم بەرەتىن مەكتەپتەر بويىنشا قالادا 13 616 كومپيۋتەر بار, ال قاشىقتان وقىتۋ جۇيەسىن قوسا ەسەپتەگەندە اتالعان تەحنيكاعا تولىق قاجەتتىلىك 35 737 بىرلىكتى قۇرايدى. ج.نۇرمانبەتوۆا, سونداي-اق ا.قۇنانباەۆ اتىنداعى № 87 ءبىلىم ورداسىندا بولدى. بۇل جەردە «حابار» اگەنتتىگىنىڭ 8 ستۋدياسى ورنالاستىرىلعان. كۇن سايىن 80-گە جۋىق تەلەۆيزيالىق ساباقتار تۇسىرىلەدى. تۇسىرىلىمگە نۇر-سۇلتان, الماتى قالالارىنىڭ, اقمولا, قاراعاندى, قوستاناي جانە پاۆلودار وبلىستارىنىڭ ۇستازدارى قامتىلعان. قۇزىرلى مينيسترلىكتىڭ مالىمەتتەرىنە سۇيەنسەك, 1 قاراشاعا دەيىن 1 جانە 2 توقسان ءۇشىن بارلىعى 6 636 بەينە ساباق ازىرلەۋ جوسپارلانعان.
* * *
سەنات دەپۋتاتى ن.تورەعاليەۆ باتىس قازاقستان وبلىسىنا بارعان ساپارىندا وڭىردە سالىنىپ جاتقان الەۋمەتتىك نىسانداردىڭ قۇرىلىس بارىسىنا باسا نازار اۋداردى.
سەناتور سىرىم اۋدانىنا ارنايى بارىپ, جۇرگىزىلىپ جاتقان جول جوندەۋ جۇمىستارىنىڭ جاي-كۇيىمەن تانىستى. سونداي-اق مەكتەپتەردىڭ جاڭا وقۋ جىلىنا دايىندىعى جانە كوشەلەردى اباتتاندىرۋ ماسەلەلەرىنە ەرەكشە كوڭىل ءبولدى. سونىمەن قاتار ول اۋداندىق اۋرۋحانادا بولىپ, مەديتسينالىق قىزمەتكەرلەرمەن كەزدەستى. جەرگىلىكتى مامانداردىڭ ايتۋىنشا, قازىر اۋدان بويىنشا كوروناۆيرۋس ىندەتىن جۇقتىرعان ناۋقاستاردىڭ ءبارى دەرلىك ەمدەلىپ شىققان. دەپۋتات اۋداندىق اۋرۋحانادا جانە جەرگىلىكتى ءدارىحانالاردا پاندەميامەن كۇرەس ءۇشىن قاجەتتى ءدارى-دارمەكتىڭ جەتكىلىكتى ەكەنىن دە ءوز كوزىمەن كورىپ شىقتى.
ودان باسقا سەناتور جىمپيتى-كەناشى سۋ قۇبىرىنىڭ قۇرىلىسىمەن تانىستى. بۇل نىساننىڭ ۇزىندىعى 77 شاقىرىمدى قۇرايدى. جالپى قۇنى – 2,2 ميلليارد تەڭگە. ناريمان تورەعاليەۆ ايماقتا اۋىز سۋ ماسەلەسى وتە وزەكتى ەكەنىنە نازار اۋدارىپ, بۇل جوبانىڭ اۋدان ءۇشىن ماڭىزى زور ەكەنىن جەتكىزدى. اتالعان سۋ قۇبىرى «وڭىرلەردى دامىتۋ» مەملەكەتتىك باعدارلاماسى اياسىندا رەسپۋبليكا بيۋدجەتىنىڭ ەسەبىنەن سالىنىپ جاتىر. بۇگىندە قۇرىلىس جۇمىستارى اياقتالىپ قالعان. ايتا كەتەيىك, كەناشى ەلدى مەكەنىندە ءۇش سكۆاجينا بار. اتالعان سۋ كوزدەرى شاعىرلىوي, بۇلان, جامبىل, قوسوبا اۋىلدارىن اۋىز سۋمەن قامتاماسىز ەتۋگە مۇمكىندىك بەرەدى. اۋداندا اتقارىلىپ جاتقان جۇمىستاردىڭ جاي-كۇيىمەن تانىسىپ شىققان سەناتور جەرگىلىكتى بيلىك وكىلدەرىنە بيۋدجەت قاراجاتىنىڭ ءتيىمدى جۇمسالۋىن ۇدايى باقىلاۋدا ۇستاۋ كەرەكتىگىن ايتتى. دەپۋتات, اسىرەسە, ءوڭىر تۇرعىندارى ءۇشىن الەۋمەتتىك ماڭىزى بار نىسانداردى سالۋ بارىسىندا باقىلاۋ جۇمىستارىن كۇشەيتۋ قاجەتتىگىن دە ءسوز ەتتى.
* * *
ماجىلىستەگى «اق جول» پارتياسى فراكتسياسىنىڭ جەتەكشىسى ا.پەرۋاشەۆ جانە ءماجىلىس دەپۋتاتى ە.بارلىباەۆ الماتىداعى «سۇڭقار» جەكەمەنشىك كلينيكاسىنىڭ بازاسىنداعى پروۆيزورلىق ورتالىقتىڭ جۇمىسىمەن تانىستى.
سونداي-اق دەپۋتاتتار دارىگەرلەردىڭ جۇمىس جاعدايى جونىندە, كوروناۆيرۋس جۇقتىرعان ونكولوگيالىق اۋرۋى بار ناۋقاستار تۋرالى مالىمەتتەرگە قانىقتى. كلينيكا كوروناۆيرۋس جۇقتىرعاندارعا كومەك كورسەتۋ ماقساتىندا قايتا جاساقتالعان. ءار پالاتاعا, وپەراتسيا جانە جانساقتاۋ بولىمدەرىنە اۆتونومدىق ارنالار تارتىلعان. سونداي-اق امبۋلاتورلىق كومەكتەر كورسەتىلەدى. الايدا جەكەمەنشىك كلينيكا ءوز بازاسىن ۇسىنعانىمەن مەملەكەتتەن نەمەسە ءمامس-تەن قوسىمشا قارجىلاندىرىلماعان. تەك عانا قايىرىمدىلىق قورلارىنىڭ ارىپتەستىك كومەگىنە جۇگىنەدى. قازىر اۋرۋحانادا جيىرماعا جۋىق ادام ەم قابىلداۋدا. مەكەمە قىزمەتكەرلەرىنىڭ قارجىلاندىرۋ جونىندەگى ءوتىنىشىن تىڭداعان دەپۋتاتتار بۇل ماسەلەنىڭ شەشىمىن تابۋىنا ارالاسۋعا دايىن ەكەندەرىن جەتكىزدى.
* * *
سەنات دەپۋتاتتارى ن.بەكنازاروۆ پەن ا.قاپباروۆا شىمكەنت قالاسىنىڭ جۇمىسپەن قامتۋ ورتالىعىندا بولدى. سەناتورلار كارانتينگە بايلانىستى قارجىلىق قيىندىققا تاپ بولعان وتباسىلارعا قولداۋ كورسەتۋ شارالارىن تالقىلادى.
ورتالىق ماماندارى اتاۋلى الەۋمەتتىك كومەك كورسەتۋ بويىنشا كەلىپ تۇسكەن وتىنىشتەردى جەدەل وڭدەيتىندەرىن ايتتى. توتەنشە جاعداي رەجيمى باستالعاننان بەرى جارتى ميلليوننان استام شىمكەنتتىك اقشا تابۋ مۇمكىندىگىن جوعالتقان. قۇجاتتارىن تاپسىرعان جۇمىسسىزداردىڭ بارلىعى دەرلىك مەملەكەتتەن اقشالاي وتەماقى الدى. تۇرعىنداردى قولداۋ ماقساتىندا جالپى سوماسى 19,9 ميلليارد تەڭگە بولىنگەن. سەناتورلار جۇمىسقا ورنالاستىرۋ جانە تۋىنداعان الەۋمەتتىك پروبلەمالاردى جەدەل شەشۋ ارقىلى حالىققا ودان ءارى دە كومەك كورسەتۋ كەرەك ەكەنىن, اسىرەسە, ادامداردىڭ وتىنىشتەرىنە سەرگەك قاراۋ قاجەت ەكەنىن جەتكىزدى.
سونىمەن قاتار ورتالىق جالپى سوماسى 6 ميلليارد تەڭگەگە تاعى 141,5 مىڭ تۇرعىنعا ماتەريالدىق كومەك كورسەتتى. سەناتورلار, سونداي-اق اكىمدىك پەن قايىرىمدىلىق ۇيىمدارىنىڭ وكىلدەرىنە از قامتىلعان جانە كوپبالالى وتباسىلارعا ازىق-ت ۇلىكپەن كومەك كورسەتۋدى توقتاتپاۋ تۋرالى ءوتىنىش ءبىلدىردى.
* * *
ءماجىلىس دەپۋتاتى ي.ارونوۆا قوستاناي وبلىسى بويىنشا جاڭا وقۋ جىلىنا دايىندىق جاعدايىمەن تانىستى.
جازعى دەمالىس كەزىندە اتالعان ءوڭىر بويىنشا بارلىق مەكتەپتە اعىمداعى جانە كۇردەلى جوندەۋ جۇمىستارى جۇرگىزىلىپ, ماتەريالدىق-تەحنيكالىق بازا نىعايتىلدى. جەرگىلىكتى ءبىلىم سالاسى ماماندارىنىڭ ايتۋىنشا, وسى جىلى 9,2 ملرد تەڭگە قارجى ءبولىنىپ, 130 نىسانعا كۇردەلى جوندەۋ جۇرگىزىلگەن. دەپۋتات وبلىستىق ۇستازدار قاۋىمىمەن وتكەن ونلاين كونفەرەنتسيادا قازىرگى كارانتين جاعدايىندا ءبىلىم بەرۋ جۇمىسىن ۇيىمداستىرۋ تاقىرىبىن تالقىلادى. ءمالىم بولعانداي, بارلىق مەكتەپتەردە ساباق قاشىقتان وقىتۋدان باستالادى. ونلاين كەزدەسۋ بارىسىندا ۇستازدار مەن ولاردىڭ وتباسىن الەۋمەتتىك قولداۋ جايى دا نازاردان تىس قالمادى. ناقتى ايتقاندا, كوروناۆيرۋس ىندەتىن جۇقتىرعان مۇعالىمدەردى ساۋىقتىرۋ ماسەلەسى اڭگىمە وزەگىنە اينالدى. ۇستازدار قاۋىمى بيىل تۇڭعىش رەت باستاۋىش سىنىپتار ءۇشىن ۇيىمداستىرلاتىن «كەزەكشى سىنىپتار» ماسەلەسىنە نازار اۋداردى.
