دەپۋتاتتار وڭىردەگى احۋالعا مونيتورينگ جۇرگىزۋ كەزىندە شىمكەنت قالاسىنداعى 60 مەديتسينالىق مەكەمەنىڭ ءدارى-دارمەك پەن مەديتسينالىق بۇيىمدارعا تاپسىرىس بەرۋ ماقساتىمەن وسى جىل ءۇشىن 465 كەلىسىمشارت جاساسقانى انىقتالدى. ونىڭ جالپى قۇنى قوسىمشا وتىنىشتەردى بىرگە ەسەپتەگەندە 6,9 ميلليارد تەڭگەنى قۇرايدى. قازىردىڭ وزىندە جەتكىزۋشى تاراپ 4,15 ميلليارد تەڭگەنىڭ مەديكامەنتىن جەتكىزگەن.
وسىعان وراي سەنات دەپۋتاتتارى فارماتسەۆتيكالىق حابتىڭ قويماسىن ارنايى بارىپ تەكسەردى. بۇل جەردەن ءدارى-دارمەكتەر شىمكەنت شاھارىمەن بىرگە تۇركىستان, قىزىلوردا جانە تاراز قالالارىنا دا جەتكىزىلەدى. تەكسەرىس كەزىندە نۇرلان بەكنازاروۆ پەن ايگۇل قاپباروۆا قويمادا مەديتسينالىق پرەپاراتتار مەن باسقا دا قاجەتتى بۇيىمداردىڭ ەكى ايلىق قورى بار ەكەنىنە كوز جەتكىزدى. قىركۇيەك ايىندا تاعى دا قوسىمشا مەديكامەنتتەر جەتكىزىلەدى دەپ جوسپارلانىپ وتىر.
فارماتسەۆت ماماندار سەناتورلارعا وسى سالاداعى تۇيتكىلدەر جونىندە ايتىپ, شىمكەنتتە ۇلتتىق مەديتسينالىق ونىمدەر مەن قىزمەتتەردى ساراپتاۋ جانە سەرتيفيكاتتاۋ ورتالىعىنىڭ فيليالىن اشۋ ماسەلەسىن كوتەردى. قازىرگى تاڭدا ولار ساراپتاما جۇرگىزۋ ءۇشىن وزگە قالالارداعى ماماندارعا جۇگىنۋگە ءماجبۇر. مۇنىڭ ءوزى ايتارلىقتاي ۋاقىت الاتىنى بەلگىلى. سونىڭ سالدارىنان پاندەميا كەزىندە ءدارى-دارمەك جەتكىزۋدە ماسەلەلەر تۋىنداعان. وسىعان وراي شىمكەنتتىك فارماتسەۆتتەر اتالعان ورتالىق قالانىڭ وزىندە بولسا, ساراپتاۋلاردى جەدەل جۇرگىزۋگە جانە قاجەتتى پرەپاراتتارمەن قىسقا مەرزىمدە قامتاماسىز ەتۋگە جول اشىلاتىنىن جەتكىزدى.
سونىمەن قاتار سەناتورلار قوعامدىق كەڭەستىڭ وكىلدەرىمەن كەزدەسىپ, شىمقالادا مەديتسينا سالاسىنىڭ دامۋىنا تىڭ سەرپىن بەرەتىن باسىمدىقتاردى پىسىقتادى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
