سەبەبى باستاۋىش پارتيانىڭ پارمەنىن ارتتىرىپ, ەلدىڭ سەنىمىنەن, حالىقتىڭ ۇدەسىنەن شىعا بىلەتىن تالابى تاۋ قوپارالىق كوشباسشىلار مەملەكەتكە اۋاداي قاجەت. ال Nur Otan پارتياسى ۇسىنعان مالىمەتكە ۇڭىلسەك, پارتياعا ادال قىزمەت ەتۋگە بەل بايلاعان ونداي ۇمىتكەرلەردىڭ قاتارى كۇن ساناپ تولىعىپ كەلەدى.
«مىقتى ليدەرلەر – مىقتى پارتيا» قاعيداتى بويىنشا ناقتى ءارى مىقتى كوشباسشىلاردى انىقتاۋ مەن ولاردى ەل ىسىنە تارتۋدى مىندەت ەتكەن بۇل باستاما ايەل ازاماتتاردىڭ دا ۇلەسىن ۇمىت قالدىرعان جوق. پرايمەريز وتكىزۋدىڭ ەرەجەسىندە پارتيالىق تىزىمدەردە كەم دەگەندە 30% ايەلدەردىڭ, كوپبالالى انالاردىڭ بولۋى ايتىلعان ەدى. ەرەجە ەسكەرۋسىز قالماعان ءتارىزدى. ماسەلەن, پرايمەريز باستالعان العاشقى كۇنى-اق تىركەۋگە ءوتىنىش بىلدىرگەن ۇمىتكەرلەردىڭ سانى 1000-نان اسقان بولسا, سول 1000 كانديداتتىڭ 336-سى ايەل ازاماتتار. سونىڭ ىشىندە 20 كوپبالالى انا بار. سونىمەن قاتار 35 جاسقا دەيىنگى 228 جاستىڭ, ەرەكشە قاجەتتىلىگى بار 8 ازاماتتىڭ ەسىمىن ۇمىتكەرلەر تىزىمىنەن كورۋگە بولادى. باستاۋىش پارتيا ۇيىمدارىنان 322 ادام ۇسىنىلسا, 717 كانديدات ءوزىن-ءوزى ۇسىندى.
ەڭ باستىسى, پرايمەريز باستاۋىش پارتيانىڭ قايتا جاڭعىرۋىنىڭ ناتيجەسى بولاتىنىنا ۇلكەن ءۇمىت ارتىلۋدا. بۇل تۋرالى ەلباسى نۇرسۇلتان نازارباەۆ پرايمەريزدىڭ باستالۋىنا بايلانىستى ۇندەۋىندە «بۇكىل ەلىمىز بويىنشا اۋقىمدى پرايمەريز وتكىزۋ بيلىكتەگى پارتيانىڭ «قايتا جاڭعىرۋىنىڭ» نəتيجەسى بولادى. بۇل – پارتيا ىشىلىك سايلاۋ. بۇل شىنايى əلەۋمەتتىك ليفت. قاتاڭ ىرىكتەۋ, جاڭا يدەيالار مەن جوبالاردى ىزدەۋ. بۇل يدەيانى كوپتەگەن بەلگىلى ساياساتتانۋشىلار مەن قوعام بەلسەندىلەرى قولدادى. بۇلار بەلسەندى ازاماتتىق ۇستانىمى بار, Nur Otan-دى قولداۋشىلار ليگاسىنا بىرىككەن جəنە رەفورمالارعا قاتىسۋعا دايىن ادامدار. ءبىز پارتيا ىشىندەگى اشىقتىق پەن ەسەپتىلىك ءۇشىن قاجەتتى جاعدايلاردى جاسادىق. ەڭ باستىسى – اشىقتىق پەن ادالدىق, بارلىق قاتىسۋشىلار ءۇشىن تەڭ جاعدايلار مەن بəسەكەلەستىك», دەپ ايرىقشا اتاپ وتكەن ەدى.
باسەكەلەستىك بار جەردە بەلسەندىلىك تە, تاباندى تارتىس تا بولادى. كانديداتتار ءوز سايلاۋشىلارىنىڭ ۇدەسىنەن شىعىپ, حالىقتىڭ ارتىپ وتىرعان ءۇمىتىن اقتاۋ ءۇشىن بارىن سالاتىنى بەلگىلى. سوندىقتان تۇڭعىش رەت رەسپۋبليكالىق پارتياىشىلىك سايلاۋ اۋقىمىندا وتەتىن پرايمەريزگە ءوز ىسىنە سەنىمدى, جالىندى ازاماتتار قاتىسادى دەپ تارازىلايمىز. قازاقستاننىڭ تۇڭعىش پرەزيدەنتىنىڭ باستاماسىمەن قولعا الىنعان «سەنىم. ديالوگ. بولاشاققا نىق قادام» – پارتيا جۇمىسىن «قايتا جانداندىرۋ» باعدارلاماسىنىڭ قورىتىندى كەزەڭدەرىنىڭ ءبىرى سانالاتىن پرايمەريزدى Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك تە ايرىقشا نازارعا الىپ وتىر.
ول ءوزىنىڭ Facebook-تەگى جەكە پاراقشاسىندا «ەلباسى نۇرسۇلتان نازارباەۆ كەشەگى ۇندەۋىندە اتاپ وتكەندەي, پارتيا ءوز ءىسىنىڭ شەبەرلەرىن, ەل تاعدىرىنا الاڭدايتىن تۇلعالاردى, شەشىم قابىلداي الاتىن جانە كونسترۋكتيۆتى ۇسىنىستار جاساي الاتىن جاڭا ازاماتتاردى بيلىككە ۇسىناتىن قاينار كوز بولۋى ءتيىس. پارتياىشىلىك سايلاۋدىڭ اشىق ءارى ءادىل وتۋىنە پارتيا تاراپىنان قاجەتتى جاعداي جاسالعان. باستىسى – ايقىندىق پەن تازالىقتى, بارلىق قاتىسۋشىلارعا تەڭ مۇمكىندىك پەن باسەكەلەستىكتى قامتاماسىز ەتۋ. پارتيا ليدەرى ازاماتتاردى تولعاندىرىپ جۇرگەن كوكەيكەستى ماسەلەلەردىڭ ءوزارا سەنىم مەن سىيلاستىق اياسىندا كوتەرىلەتىنىنە سەنىم ءبىلدىردى. كوتەرىلگەن ماسەلەلەردى پارتيا باقىلاۋعا الۋى ءتيىس. ءاربىر اۋداننىڭ, قالانىڭ, وبلىستىڭ سايلاۋالدى باعدارلاماسىنا ەنگىزۋ ءۇشىن بارلىق شەشىمدى بيۋدجەتتىڭ مۇمكىندىكتەرىمەن ۇيلەستىرە قاراستىرۋ قاجەت», دەپ وقىرماندارىمەن وي بولىسەدى.
ونىڭ ايتۋىنشا, ەلىمىزدىڭ الدىندا پاندەميادان كەيىن ەكونوميكالىق ءوسىمدى قالپىنا كەلتىرۋ, جۇمىس ورىندارىن قۇرۋ, شاعىن جانە ورتا بيزنەستىڭ جۇمىسىن جانداندىرۋ مىندەتتەرى تۇر. سونىمەن بىرگە پاندەميامەن كۇرەس ماسەلەلەرىن تالداپ, ونىڭ ەكىنشى تولقىنى ورىن الۋى مۇمكىن جاعدايعا دايىندالۋ قاجەت. مۇنىڭ بارلىعى پارتيانىڭ سايلاۋالدى باعدارلاماسىنا ەنگىزىلىپ, نۇروتاندىقتاردىڭ الداعى 5 جىلدا اتقاراتىن ءىس-ارەكەتتەرىنە باعىت-باعدار بولادى. «تاعى دا بارلىق پارتيالىقتار مەن Nur Otan جاقتاستارىن ەلدەگى اسا ماڭىزدى ساياسي دوداعا بەلسەندى قاتىسۋعا شاقىرامىن!», دەپ جازادى ب.بايبەك.
پرايمەريز ناتيجەسى ەڭ الدىمەن باستاۋىش پارتيانىڭ ايماقتارداعى فيليالدارىنىڭ جۇمىسىن جانداندىرادى دەگەن سەنىم بار. ەلىمىز بويىنشا حالىق بارىنشا تىعىز قونىستانعان ايماق رەتىندە تۇركىستان وبلىسىن ايتۋعا بولار ەدى. Nur Otan پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆتىڭ ايتۋىنشا, وڭىردە پرايمەريزگە دايىندىق تالاپقا ساي جۇرگىزىلۋدە. ول كادرلىق رەزەرۆتە ايەلدەردىڭ ۇلەسىن كەم دەگەندە 30, ال جاستاردىڭ ۇلەسىن 20 پايىزعا جەتكىزۋ باستاماسى قوعام تاراپىنان قولداۋعا يە بولعانىن العا تارتىپ وتىر. «پارتيا توراعاسى, ەلباسى ن.نازارباەۆتىڭ «سەنىم. ديالوگ. بولاشاققا نىق قادام» اتتى پارتيا جۇمىسىن جۇيەلى جاڭعىرتۋ باعدارلاماسىنا سايكەس قولعا الىنعان پرايمەريزدە ايەلدەر مەن جاستار قاۋىمىنا دا ۇلكەن مۇمكىندىك بەرىلىپ وتىر. پرايمەريزدىڭ العاشقى كۇنى تۇركىستاندىق جاستاردىڭ بەلسەندىلىگى بايقالدى. ءالى دە قاتىسۋعا نيەت ءبىلدىرىپ جاتقاندارى كوپ. ءبىز وسى ازاماتتار اراسىنان ەلگە جاناشىر, ناعىز پاتريوتتاردى ىرىكتەپ الۋىمىز كەرەك», دەيدى ب.تاجىباەۆ.
ىلگەرى قادامنىڭ ىرىكتەۋدەن باستالاتىنىن ەسكەرسەك, پرايمەريزگە تىركەلىپ, بابى مەن باعىن سىناپ جاتقان ەل ازاماتتارىنىڭ سانى كۇن ساناپ ارتىپ كەلە جاتقانى قۋانتادى. ەل يگىلىگى جولىندا ەرىنبەي ەڭبەك ەتۋگە بەل بۋعان ونداي ازاماتتارعا سايلاۋشىلارى دا ءتيىستى قولداۋىن بىلدىرەدى دەگەن سەنىمدەمىز.
