العاشقى جۇمىس كۇنىنەن باستاپ قازاقستاننىڭ اسكەري دارىگەرلەرى ليۆاننىڭ جۇزدەگەن ازاماتتارىنا مەديتسينالىق كومەك كورسەتتى. قازاقستاندىق مامانداردىڭ مەديتسينالىق كومەك كورسەتۋى ليۆان دارىگەرلەرىمەن بىرگە اسكەري گوسپيتال مەن مۋنيتسيپالدىق اۋرۋحانالاردىڭ بازاسىندا جۇزەگە اسىرىلادى.
ءوتىنىش بىلدىرگەندەردىڭ اراسىندا اممياك سەليتراسىنىڭ دەتوناتسياسى ناتيجەسىندە جارىلىس تولقىنى اسەر ەتەتىن ايماقتا بولعاندار بار. قازاقستاندىق دارىگەرلەر حيرۋرگيالىق, تراۆماتولوگيالىق جانە تەراپەۆتىك پاتسيەنتتەردى ەمدەۋگە جۇمىلدىرىلدى. ءبىزدىڭ دارىگەرلەر رەانيماتسيا جانە انەستەزيولوگيا بولىمشەلەرىنىڭ جۇمىسىنا, ەندوپروتەزدەۋ سياقتى جوعارى تەحنولوگيالىق قىزمەتتەردى قوسا العاندا, وپەراتسيالىق ارالاسۋلار جۇرگىزۋگە بەلسەندى قاتىسادى. سونىمەن قاتار اسكەري دارىگەرلەر امبۋلاتوريالىق ناۋقاستارعا كومەك كورسەتۋ جانە قابىلداۋ بويىنشا مەديتسينالىق پۋنكتتىڭ جۇمىسىن ۇيىمداستىردى.
قازاقستاندىق دارىگەرلەردىڭ جۇمىسى ەلدەگى ەپيدەميالىق جاعدايدى ەسكەرە وتىرىپ, قاتاڭ سانيتارلىق-گيگيەنالىق تالاپتاردى ساقتاي وتىرىپ ۇيىمداستىرىلعان.
«مەن ليۆاننىڭ وڭتۇستىگىندەگى بەيرۋتتا تۇرامىن. وسى قيىن-قىستاۋ كەزەڭدە قازاقستان باسشىلىعىنا جانە اسكەري دارىگەرلەرگە مەنىڭ حالقىما جانە بالالارىما كومەك كورسەتكەنى ءۇشىن العىسىمدى بىلدىرگىم كەلەدى. ليۆانعا قوش كەلدىڭىز!» – دەدى ناۋقاستاردىڭ ءبىرى فادي ەحري.
ەستەرىڭىزگە سالا كەتەيىك, قازىرگى ۋاقىتتا ليۆاندا ارنايى ماقساتتاعى قازاقستاندىق اسكەري-مەديتسينالىق جاساق جۇمىس ىستەۋدە.
