كەلەس اپب-ءنىڭ كەزەكشى بولىمىنە جەرگىلىكتى پوليتسيا قىزمەتىنىڭ تابيعاتتى قورعاۋ پوليتسياسىنىڭ ينسپەكتورى جانبولات ساپارباەۆتان كەلەس اۋدانىنا قاراستى اۋماقتاعى سىرداريا وزەنىنەن زاڭسىز بالىق اۋلاعاندار جايلى حابارلاما تۇسەدى.
وسىلايشا وقيعا ورنىنا جەتكەن جەدەل-تەرگەۋ توبىنىڭ قىزمەتكەرلەرى كەلەس اۋدانىنىنىڭ ماڭىنداعى سىرداريا وزەنىنەن ەلەكتر توعى ارقىلى بالىق اۋلاپ جۇرگەن كۇدىكتىنى ۇستاعانىن انىقتادى. ايعاقتى زاتتار تاركىلەنىپ الىنعان كۇدىكتىنىڭ كەلەستىك تۇرعىن ەكەنى بەلگىلى بولدى. پوليتسيا قىزمەتكەرلەرى كۇدىكتىنى ءىستىڭ بارلىق ءمان-جايىن انىقتاۋ ءۇشىن اۋداندىق پوليتسيا بولىمىنە جەتكىزدى. براكونەردەن ەلەكتر توگىن كۇشەيتكىش قۇرىلعى, اككۋمۋلياتور, ۇرمەلى رەزەڭكە قايىق پەن بالىقتار تاركىلەندى.
قازىرگى ۋاقىتتا اتالعان جايت قر قك-ءنىڭ 335-بابى 1-بولىگى (بالىق رەسۋرستارىن, باسقا دا سۋ جانۋارلارىن نەمەسە وسىمدىكتەردى زاڭسىز اۋلاۋ) بويىنشا سوتقا دەيىنگى تەرگەۋ امالدارى جۇرگىزىلۋدە.
سوندىقتان وبلىستىڭ پوليتسەيلەرى ءاربىر بالىق اۋلاۋشى تۇرعىنعا ەسكەرتەدى, جوعارىدا كورسەتىلگەن باپتىڭ سانكتسيالارى التى مىڭ اەك دەيىنگى مولشەردە ايىپپۇل سالۋ نەمەسە سول مولشەردە تۇزەۋ جۇمىستارى, نە ءۇش جىلدان التى جىلعا دەيىنگى مەرزىمگە باس بوستاندىعىن شەكتەۋ, نە مۇلكى تاركىلەنىپ, جەتى جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ, سول مەرزىمگە باس بوستاندىعىنان ايىرۋ تۇرىندەگى جازا قولدانىلادى.
زاڭسىز بالىق اۋلاۋ, سونداي-اق قىزىل كىتاپقا ەنگىزىلگەن جانۋارلار مەن وسىمدىكتەردى جويۋ زاڭ اياسىندا جاۋاپقا تارتىلاتىنىن دا ەسكە سالادى. ەگەر دە ءسىز وسى سەكىلدى قىلمىستاردىڭ, وقيعالاردىڭ كۋاگەرى بولساڭىز مىندەتتى تۇردە "102"-گە حابار بەرىڭىز. بۇل ءوز ۋاقىتىندا پوليتسەيلەردىڭ قىلمىسكەردى ءىزىن سۋىتپاي ۇستاۋعا كومەگىن تيگىزەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
