قابىلدانعان كارانتين شارالارىنىڭ ناتيجەسىندە ينفەكتسيانىڭ تارالۋ تىزبەگىن ءۇزىپ, مەديتسينا ۇيىمدارى مەن قىزمەتكەرلەر جۇكتەمەسىن ەداۋىر ازايتۋعا قول جەتكىزىلدى.
«قازىرگى ۋاقىتتا ستاتسيونارلاردا 343 ادام بار. اۋرۋدىڭ شارىقتاۋ شەگىندە 4 مىڭعا جۋىق ادام بولدى. التى اپتاعا سوزىلعان كارانتين ارقىلى كوروناۆيرۋستىڭ تارالۋىنا بايلانىستى جاعداي رەتتەلدى. مەملەكەت قابىلداعان شارالار دارىگەرلەرگە ءوز جۇمىستارىمەن تىكەلەي اينالىسۋعا – ادام ءومىرىن ساقتاۋعا مۇمكىندىك بەردى. مەديتسينا قىزمەتكەرلەرى ءاربىر ناۋقاسقا ءتيىستى كوڭىل ءبولدى. ءبىز تومەندەۋ ديناميكاسىن جالعاستىرىپ قانا قويماي, كارانتين ناتيجەلەرىن دە بەكىتۋىمىز كەرەك.
ينفەكتسيا تارالماۋى ءۇشىن اۋقىمدى شارالار قاجەت. بۇل قاتاڭ سانيتارلىق-ەپيدەميالىق نورمالاردى ساقتاۋ ارقىلى عانا مۇمكىن بولماق. كارانتيندى جەڭىلدەتۋ ۆيرۋس تۇبەگەيلى جويىلدى دەگەندى بىلدىرمەيدى. ونىڭ قاۋپى ءالى دە بار. تۋىستارىڭىزدى قورعاۋ ءۇشىن قاتاڭ سانيتارلىق نورمالاردى ۇستانىپ, قوناققا ادام كوپ جينالاتىن ورىندارعا بارۋدان باس تارتۋ قاجەت», دەدى ەلوردا اكىمى التاي كولگىنوۆ.
16 ستاتسيوناردىڭ التاۋى جابىلدى – ونداعى بارلىق ناۋقاس ەمدەلىپ شىقتى. ستاتسيونارلاردىڭ جۇكتەمەسى 99%-دان 17,2%-عا دەيىن تومەندەدى. بارلىق قالالىق ەمحانالار الدىن الا جازىلۋ بويىنشا جوسپارلى قابىلداۋدى قايتا باستادى. كۆي بەلگىلەرى بار ناۋقاستاردى قابىلداۋ بويىنشا فيلتر-كابينەتتەردىڭ جۇمىسى جالعاسۋدا.
اكىمدىك مەديتسينا مەكەمەلەرىنە 600-دەن استام فلوۋمەتر, 500 وتتەگى كونتسەنتراتورى, 500 ارنايى كەرەۋەت, وكپەنى جاساندى جەلدەتۋ جانە كومپيۋتەرلىك توموگرافيا اپپاراتتارىن جەتكىزدى. مەديتسينا جابدىقتارى مەن ءدارى-دارمەك ساتىپ الۋ بويىنشا جۇمىستار تۇراقتى نەگىزدە جۇرگىزىلۋدە.
