170-كە جۋىق ادامنىڭ ءومىرىن جالماپ, 600 ادام زارداپ شەككەن 4 تامىزداعى جارىلىس ليۆاندىقتاردىڭ كوپتەن بەرگى ۇكىمەتكە نارازىلىعىن اشىق بىلدىرۋگە سەبەپ بولدى. ولار ىلە-شالا ەلدىڭ سىرتقى ىستەر مينيسترلىگىن باسىپ الماق بولىپ, عيماراتقا شابۋىل جاسادى. شامامەن 10 مىڭ ادام نارازىلىق اكتسياسىنا قاتىسىپ, حالىق جاپا شەككەن اۋدانداردان باستاپ, استانانىڭ ورتالىق الاڭىنا دەيىن جەتتى. قۇقىق قورعاۋ ورگاندارىنىڭ قىزمەتكەرلەرىمەن قاقتىعىس تا كوپ كۇتتىرمەدى. پوليتسياعا تاس, اعاش لاقتىرىپ, بۇزاقىلىققا باردى. ال پوليتسيا ۋلى گاز بەن قارۋلى جاۋاپ بەردى. بۇگىندە ماڭىزدى عيماراتتاردىڭ الدىندا كۇزەت تۇر. ۇكىمەت عيماراتى قورشالعان.
پرەزيدەنت ميشەل اۋن بەيرۋت پورتىنا كەلگەن شەتەلدىك تەرگەۋشىلەردەن تابىلعان اقپاراتتىڭ بارلىعىن اشىق جاريالاۋىن سۇرادى. بۇۇ ليۆانعا كومەككە 565 ملن اقش دوللارىن بولگەن. قاراجات جارىلىستان جاپا شەككەن پورت حالقىنا جۇمسالۋى ءتيىس. ۇيىم ەسەبىنە سۇيەنسەك, قالاداعى 20 اۋرۋحانا, 120 مەكتەپ قيراعان. بۇۇ گۋمانيتارلىق كوورديناتورى نيجات روچدي «قۇلاعان مەكتەپتەر مەن اۋرۋحانالاردى قالپىنا كەلتىرگىمىز كەلەدى», دەدى. تەرگەۋ جۇمىستارىنا FBI اگەنتتەرى دە تارتىلعان. جەرگىلىكتى كاسىپكەرلەر ۇكىمەتكە سەنبەيتىنىن ايتۋدا. ولاردىڭ ويىنشا, ماسەلەگە سىرتقى كۇشتەردى ارالاستىرسا, ناقتى سەبەپ ءمالىم بولماق.
اپات قويمادا 2014 جىلدان بەرى ساقتالىپ كەلە جاتقان سەليترانىڭ جارىلۋىنان بولعان. ۇكىمەت بۇعان جاۋاپتىلاردى تابۋعا ءسوز بەرگەن-ءدى. جاپا شەككەن اۋدانداردى ارالاماق بولعان مينيسترلەردى حالىق قۋىپ شىقتى. سەنبىدە ۇكىمەت باسشىسى حاسسان دياب مالىمدەمە جاساپ, جارىلىستىڭ جەمقورلىق سالدارىنان بولعانىن حابارلادى. ءتىپتى ماسەلەنىڭ شەشىمى كەزەكتەن تىس سايلاۋدا ەكەنىن دە جەتكىزدى.
حالىقارالىق قىزىل كرەست قوعامىنىڭ ەسەبىنە سۇيەنسەك, نارازىلىق اكتسياسى كەزىندە 230 ادام جاراقات العان. ال باق جاپا شەككەندەردىڭ سانى 500-دەن اساتىنىن حابارلايدى. اپات سەبەبىن انىقتاۋ ءىسى جالعاسىپ جاتىر. مەملەكەت پرەزيدەنتى ميشەل اۋن سىرتقى كۇشتەردىڭ قاتىسى بار-جوعىن انىقتاۋ قاجەتتىگىن ايتتى.
