ۋاقىت ءوتتى, كوروناۆيرۋستىڭ الەمدە تارالۋىن توقتاتۋ مۇمكىن بولمادى. اينالامىز, ءومىرىمىز تۇبەگەيلى وزگەرىسكە ۇشىرادى.
ەگەر ءبىز جەكەلەگەن ەلدەردى ەمەس, تۇتاستاي عالامشاردى الاتىن بولساق جاعداي ءماز ەمەس سەكىلدى. ۆيرۋس جۇقتىرعاندار سانى 21 ميلليونعا جاقىندادى, ال قايتىس بولعان ادامدار سانى 750 مىڭنان استى. پاندەميا باستالعان العاشقى كەزەڭدە ءار ءجۇز مىڭ ناۋقاستىڭ دەرتىن انىقتاۋعا ءبىر اپتا ۋاقىت قاجەت بولعان ەدى, ال قازىر بۇل بىرنەشە ساعاتتىڭ ىشىندە بەلگىلى بولىپ جاتىر. ددۇ ۇيىمى الەم ءالى دە پاندەميانىڭ قۇرساۋىندا ەكەنىن ايتۋدا. بۇل ىندەت بارشا ادامزاتقا ورتاق جانە ونىڭ اسەرى ءار مەملەكەتتە ءارتۇرلى. بىراق ءوز ەلىڭە قاراپ, بارلىق جەردە وسىلاي ەكەن دەپ توپشىلاۋعا دا بولمايدى, سەبەبى كەيبىر مەملەكەتتەردە جەڭىل وتسە, كەيبىرەۋى اۋىرتپاشىلىقتى قاتتى سەزىندى. سول ەلدەردىڭ ىشىندە قازاقستان دا بار. بارلىعىن بىرىكتىرەتىن ءبىر جايت – ۆيرۋس جۇقتىرۋ قاۋپى.
لاتىن امەريكاسىندا ىندەتتىڭ ءورشۋى, ءۇندىستاننىڭ قاۋىپتى ايماقتاردىڭ بىرىنە اينالۋى, گونكونگتا تۇرعىنداردىڭ كارانتين ورتالىقتارىندا جاتۋى, ەۋروپا مەن اۋستراليانىڭ كارانتين ەنگىزۋدەگى قيىندىقتارى جانە تاعى باسقالار بۇگىنگى ءومىردىڭ ءبىر بولىگىنە اينالدى.
ىندەتتى نوقتالاعان ەلدەر دە جوق ەمەس. جاڭا زەلانديانىڭ ارەكەتى بارشا الەمنىڭ نازارىندا بولدى. ەلدە العاشقى ناۋقاستار پايدا بولعاندا بىردەن ىسكە كوشكەندەردىڭ ءبىرى وسى مەملەكەت. ناتيجەسىندە ۆيرۋس جويىلىپ, حالقى بۇرىنعى ومىرىنە قايتا ورالعان. الايدا سوڭعى كۇندە ەلدە ءبىر-ەكىلى ناۋقاستىڭ انىقتالعانى جايلى حابارلار بار. سوندا بۇل كوروناۆيرۋستى تۇبەگەيلى قۇرتۋ مۇمكىن بولماي تۇر دەگەن ءسوز بە؟
قاراپايىم ەرەجەلەردى ءتۇسىنۋ موڭعوليا سەكىلدى قىتايمەن شەكاراسى ەڭ ۇزاق ەلگە كومەكتەستى. ەلدەگى جاعدايدىڭ ۋشىعۋى ابدەن مۇمكىن ەدى. دەگەنمەن شىلدە ايىنا دەيىن بىردە-ءبىر جاعداي تىركەلمەگەن. بۇگىن موڭعوليادا ىندەت جۇقتىرۋدىڭ 298 دەرەگى عانا تىركەلگەن.
ماماندار ەل بيلىگى مەن قوعامدىق دەنساۋلىق ساقتاۋ وكىلدەرىنىڭ ءتىل تابىسا الماۋى دا ۆيرۋستىڭ جىلدام تاراۋىنا سەبەپ بولعانىن العا تارتادى. ماسەلەن, اقش-تا دونالد ترامپ پەن باس سانيتارلىق دارىگەردىڭ ءسوزى ءبىر جەردەن شىقپاۋى قيىندىق كەلتىرگەن. برازيليادا دا وسىعان ۇقساس جاعداي. پرەزيدەنت ج.بولسونارو العاشقىدا ۆيرۋستى بولماشى تۇماۋعا تەڭەپ, كارانتين ەنگىزۋدى قۇپ كورمەگەن. اقىرى اياعىندا قوس ەل دە الەمدە ەڭ كوپ زارداپ شەككەن ايماققا اينالدى. بۇل ەكى ەلدى قوسا العاندا 9 ميلليونعا جۋىق ادام جۇقتىرعان.
ودان بولەك قاتاڭ شارالار ەنگىزىپ, سوڭىنان قاۋىپتىڭ ءالى بار ەكەنىن ۇمىتىپ كەتكەن ەلدەر دە بار. ءبىزدىڭ ەلدەگى ستسەناري وسىعان سايكەس بولسا كەرەك. بۇل قاتارداعىلارعا اۋستراليانى دا جاتقىزۋعا بولادى. قىتايدان كەيىن ىندەتتىڭ وشاعىنا اينالعان ەۋروپا دا قايتا اشىلا باستاعان. يسپانيا, فرانتسيا, گرەكيا, گەرمانيا ۆيرۋس جۇقتىرعاندار سانى وسكەنىن ايتىپ, قايتا دابىل قاعىپ جاتىر. ساراپشىلار بارلىق ەلدەرگە ەسكەرتۋ رەتىندە ءبىر رەت جەڭىسكە جەتۋ ەكىنشى رەت ءساتتى ناتيجەگە قول جەتكىزەمىز دەگەندى بىلدىرمەيتىنىن ايتىپ ەسكەرتىپ كەلەدى. ونى تاجىريبە دە كورسەتتى. جاقىندا ەلىمىزدە كارانتين شارالارى جەڭىلدەي باستايدى. بىراق بۇل ۆيرۋس جوق دەگەندى بىلدىرمەيدى. سوندىقتان وتكەننەن ساباق الىپ, جاڭا جاعدايدا ءومىر ءسۇرۋدى ادەتكە اينالدىرۋ كەرەك بولار. جاز اياقتالىپ, كۇز كەلە جاتىر. بۇل ءبىزدىڭ قوعامداعى جاۋاپكەرشىلىگىمىزدى قايتا سىنايتىن كەز سەكىلدى.
