اقتوتى رايىمقۇلوۆا جۇمىس ساپارىمەن الماتىعا باردى

مينيسترلىك وكىلدەرىمەن كەزدەسۋگە ش.ايمانوۆ اتىنداعى «قازاقفيلم» كينوستۋدياسىنىڭ پرەزيدەنتى اقان ساتاەۆ، الماتى قالاسى اكىمىنىڭ ورىنباسارى ەرجان باباقۇماروۆ، الماتى قالاسى ءىىد باستىعىنىڭ ورىنباسارى ايدىن قابدۋلدينوۆ، الماتى قالاسى ءىىد تەرگەۋ باسقارماسى باستىعىنىڭ ورىنباسارى، پوليتسيا مايورى ولجاس ءشارىپوۆ، الماتى قالاسى تجد باستىعىنىڭ ورىنباسارى پولكوۆنيك ەرلان الىبەكوۆ جانە الماتى قالاسى اكىمدىگى مەن كينوستۋديا قىزمەتكەرلەرى قاتىستى.

كەزدەسۋ بارىسىندا ءورت شىققان ورىنداردا تەكسەرۋ جۇرگىزىلىپ، جاۋاپتى مەكەمەلەر وكىلدەرى ءورتتىڭ پايدا بولۋىنىڭ سەبەبى مەن حرونولوگياسى تۋرالى بايانداما جاسادى. قر مادەنيەت جانە سپورت ءمينيسترى اقتوتى رايىمقۇلوۆا ءورتتى سوندىرۋگە قاتىسقان ازاماتتارعا العىسىن ءبىلدىردى.
​
ايتا كەتەيىك، قالالىق تجد مالىمەتىنشە، ءورت تۋرالى حابار 14 تامىزدا نۇر-سۇلتان ۋاقىتى بويىنشا ساعات 21:33-تە كەلىپ تۇسكەن. ءورت سوندىرۋگە قاجەتتى تەحنيكا وقيعا ورنىنا 7 مينۋتتا جەتكەن. ءورت سوندىرۋشىلەر كەلگەن ساتتە «قازاقفيلم» اۋماعىندا دەكوراتسياعا ارنالعان، تەمىر قالقانىڭ استىنا سالىنعان قۇرىلىس ماتەريالدار لاۋلاعان وتتىڭ ورتاسىندا بولعان. ءورت شىققان جەردىڭ اۋدانى 400 شارشى مەتردى قۇرايدى.

العاشقى وشاقتى ءسوندىرۋ كەزىندە كينوستۋديا اۋماعىندا اۋدانى 200 شارشى مەتردى قۇرايتىن اعاش عيمارات («شايبان شاح سارايى» دەكوراتسياسى) جاقتان ەكىنشى ءورت وشاعى بايقالعان. ەكى وشاقتىڭ اراسى 300 مەتر.

الماتى قالاسى تجد حابارلاۋىنشا، ءبىرىنشى ءورت وشاعى 23:10-دا، ەكىنشىسى - 23:26-دا سوندىرىلگەن. ءورت سوندىرۋشىلەر «قازاقفيلمنىڭ» اكىمشىلىك عيماراتتارىنا وتتىڭ وتۋىنە جول بەرمەگەن. زارداپ شەككەندەر جوق.

ءورتتى سوندىرۋگە، تجد – 53 قىزمەتكەر مەن 16 بىرلىك تەحنيكا، پوليتسيا دەپارتامەنتىنىڭ – 30 قىزمەتكەرى مەن 10 بىرلىك تەحنيكا، جمك قىزمەتى - 6 قىزمەتكەرى مەن 2 بىرلىك تەحنيكا، الماتى قالاسى اكىمى اپپاراتىنىڭ قۇتقارۋ قىزمەتى - 4 قىزمەتكەر مەن 4 بىرلىك تەحنيكا، "الماتى سۋ" مكك – 6 قىزمەتكەر، 3 بىرلىك تەحنيكا جۇمىلدىرىلدى.