جارتىلاي فينالدا الەمنىڭ بەس دۇركىن چەمپيونى رونني و'سالليۆان دۇنيەجۇزىلىك رەيتينگتە 7-ورىندا تۇرعان مارك سەلبيدى اسا تارتىستى وتكەن ويىندا 17:16 ەسەبىمەن تىزە بۇكتىردى.
ال ەكىنشى جارتىلاي فينالداعى كايرەن ۋيلسون - ەنتوني ماكگيلل اراسىنداعى جەكپە-جەك تە ءدال وسىنداي ەسەپپەن اياقتالىپ, ناتيجە العاشقىسىنىڭ پايداسىنا شەشىلدى. ايتا كەتۋ كەرەك, سنۋكەر تاريحىندا جارتىلاي فينالدارداعى ويىن ناتيجەلەرىنىڭ ءدال وسىنداي ەسەپپەن اياقتالۋى تۇڭعىش رەت كەزدەسىپ وتىر.
سنۋكەر ويىنىنداعى دەڭگەيى ەڭ جوعارى ءتۋرنيردىڭ باس جۇلدەسىن فينالدا ساراپقا سالاتىن رونني و'سالليۆان مەن كايرەن ۋيلسون بۇعان دەيىن ءتۇرلى تۋرنيرلەردە التى رەت كەزدەسىپ, ءوزارا كىم مىقتىنى انىقتاعان ەكەن. ازىرگە, جالپى ەسەپتە 4:2 ەسەبىمەن رونني و'سالليۆان الدا تۇر. ايتا كەتەتىن ءبىر جايت, بۇل قوس سنۋكەرشىنىڭ جولى فينالدىق ويىنداردا ەكى رەت ءتۇيىسىپتى. العاش رەت ولار 2017 جىلى English Open ءتۋرنيرىنىڭ شەشۋشى كەزەڭىندە كۇش سىناستىرىپ, رونني و'سالليۆان 9:2 ەسەبىمەن باسىم ءتۇسىپتى. سونداي-اق, 2018 جىلى وتكەن Champion of Champions دوداسىنىڭ فينالىندا تاعى دا رونني و'سالليۆان 10:9 ەسەبىمەن جەڭىسكە جەتكەن ەكەن.
بيىلعى الەم چەمپيوناتىنىڭ جۇلدە قورى £2,400,000 قۇرايدى (شامامەن 1 317 765 467,52 تەڭگە). چەمپيونعا £500,000 تيەسىلى بولسا, جەڭىلىپ قالعان سنۋكەرشى 200,000 فۋنت ستەرلينگپەن كوڭىل جۇباتادى.
سنۋكەردەن الەمنىڭ 2020 جىلعى چەمپيونى ەرتەڭ, 16 تامىز كۇنى بەلگىلى بولادى. ەگەر, 45 جاستاعى رونني و'سالليۆاننىڭ قولى ءجۇرىپ بەرسە, ايگىلى سنۋكەرشى الەمنىڭ التى دۇركىن چەمپيونى اتانادى. ال 28 جاستاعى كايرەن ۋيلسون عايىپتان تايىپ جەڭەر بولسا, ول ءوزىنىڭ سپورتتىق مانسابىنداعى ەڭ جوعارى اتاققا تۇڭعىش رەت قول جەتكىزەدى.
