قوعام • 14 تامىز، 2020

قازاقستاندىق ديپلوماتتار نورۆەگيادا يادرولىق قارۋعا قارسى ۆەلوشەرۋگە قاتىستى

10 رەت كورسەتىلدى

حالىقارالىق يادرولىق سىناقتارعا قارسى ءىس-قيمىل كۇنى جانە حيروسيما مەن ناگاساكيدىڭ اتوم بومبالاۋىنىڭ 75 جىلدىعى قارساڭىندا قازاقستاننىڭ نورۆەگياداعى ەلشىلىگىنىڭ قىزمەتكەرلەرى «Bike for Peace» (ۆەلوسيپەدشىلەر بەيبىتشىلىك ءۇشىن) قوزعالىسىمەن ۇيىمداستىرىلعان ۆەلوجارىسقا قاتىستى. بۇل تۋرالى Egemen.kzء سىم ءباسپاسوز قىزمەتىنە سىلتەمە جاساپ حابارلايدى.

كەزدەسۋگە نورۆەگيا پارلامەنتىنىڭ، مۋنيتسيپاليتەتتەردىڭ، بيزنەس جانە اكادەميالىق توپتاردىڭ وكىلدەرى قاتىستى.

ءۇش كۇن ىشىندە قاتىسۋشىلار وسلو جانە اكەرسحۋس پروۆينتسيالارىنداعى قالالارىنا باردى. وسلو، ليللەستريوم، يەزحايم جانە ەيدسۆول قالالارىنىڭ مەرلەرىمەن، سونداي-اق يادرولىق قارۋعا تىيىم سالۋ جونىندەگى حالىقارالىق ناۋقانى (ICAN) جانە «Nei til atomvåpen» (يادرولىق قارۋعا جول بەرمەۋ) ۇيىمى جەتەكشىلەرىمەن كەزدەسۋلەر وتكىزىلدى. جارىس قاتىسۋشىلارى نورۆەگيانىڭ سىرتقى ىستەر مينيسترلىگىندە قارۋسىزدانۋ ماسەلەلەرى جونىندەگى ارنايى وكىلى يورن وسمۋندسەنمەن سۇحباتتاستى.

قازاقستاندىق ديپلوماتتار سەمەي يادرولىق پوليگونىنداعى يادرولىق سىناقتاردىڭ زارداپتارى، كسرو-دان مۇراعا قالعان يادرولىق زىمىراندىق الەۋەتتى بولشەكتەۋ تاريحى، سونداي-اق جاھاندىق يادرولىق قارۋسىزدانۋ بويىنشا جۇمىستى جالعاستىرۋدىڭ ماڭىزدىلىعىمەن تانىستىردى. ەلشىلىكتىڭ قىزمەتكەرلەرى نورۆەگ تىلىندە باسىلعان قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «بەيبىتشىلىك كىندىگى» كىتابىن تارتۋ ەتتى.

«قازاقستان تاۋەلسىزدىك العان كەزىندە الەمدەگى ءتورتىنشى يادرولىق الەۋەتكە يە بولعان. ەل ءوزىنىڭ بارلىق يادرولىق قارۋىن بولشەكتەدى. بۇل باسقا يادرولىق مەملەكەتتەر ءۇشىن وراسان ۇلگى»، - دەپ «Bike for Peace» پرەزيدەنتى تۋرە نەرلاند وسلو مەرياسىنىڭ الدىنداعى الاڭىندا سويلەگەن سوزىندە اتاپ ءوتتى. جۇزدەن استام ەلدە يادرولىق قارۋعا قارسى ۆەلوشەرۋ مەن ميتينگىلەر ۇيىمداستىرعان ت.نەرلاند ءوزىنىڭ قازاقستان اۋماعىنداعى، ونىڭ ىشىندە سەمەيگە ساپارىمەن بارعانىن جىلى لەبىزبەن ەسكە الدى.

وسىمەن قاتار، وسلو قالاسىنىڭ مەرى ماريانن بورگەن، «بەيبىتشىلىك جولىنداعى مەرلەر» قوزعالىسىنىڭ مۇشەسى، «بۇل بۇكىل الەمدەگى يادرولىق قارۋعا تىيىم سالۋعا مۇمكىن ەكەندىگىنىڭ دالەلى» - دەپ قازاقستاننىڭ انتيادرولىق قوزعالىستاعى ءرولىن اتاپ ءوتتى.

ستورتينگ دەپۋتاتى حيمانشۋ گۋلاتي نۇر-سۇلتان مەن الماتىعا جاساعان ساپارلارى تۋرالى ەستەلىكتەرىمەن ءبولىسىپ، «بىزدە نورۆەگيا مەن قازاقستان اراسىنداعى دوستىق پەن ساۋدا ىنتىماقتاستىعىن كەڭەيتۋ ءۇشىن ۇلكەن الەۋەت بار. ءبىز پارلامەنت مۇشەلەرى رەتىندە بۇل سالادا ءوز ءرولىمىزدى ورىنداعىمىز كەلەدى»، - دەپ اتاپ ءوتتى.

سوڭعى جاڭالىقتار

ۇقساس جاڭالىقتار