قازاقستان • 14 تامىز، 2020

كورەيانىڭ ۇلتتىق تۋريزم ۇيىمى قازاقستانعا 1000 قورعانىش كوستيۋمىن بەردى

11 رەت كورسەتىلدى

كورەيانىڭ ۇلتتىق تۋريزم ۇيىمى COVID-19 ىندەتىمەن كۇرەستە قازاقستانعا كومەك قولىن سوزىپ، قر دەنساۋلىق ساقتاۋ مينيسترلىگىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگى كوميتەتىنىڭ «ۇلتتىق ساراپتاما ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنا قۇنى 25 مىڭ اقش دوللارىنان اساتىن 1000 قورعانىش كوستيۋمىن بەردى.

ءوز كەزەگىندە «ۇلتتىق ساراپتاما ورتالىعى»  حالىقتىڭ سانيتارلىق-ەپيدەميولوگيالىق يگىلىگىن قامتاماسىز ەتۋ سالاسىندا قىزمەتءتى جۇزەگە اسىرۋعا جاۋاپتى.

كورەيا رەسپۋبليكاسىنداعى مادەنيەت، سپورت جانە تۋريزم مينيسترلىگىنە قاراستى ۇلتتىق تۋريزم ۇيىمى قازاقستانعا وسىلايشا جاھاندىق ىندەتپەن كۇرەسۋگە وزىندىك جاردەمىن بەرىپ وتىر.

وسى ارادا KHIDI اقپاراتتارىنا سايكەس، كورەياداعى مەديتسينالىق ءتۋريزمدى تاڭدايتىن ەلدەردىڭ ىشىندە قازاقستان 8-ورىندا تۇرعاننى ايتا كەتۋ كەرەك. سوندىقتان دا كورەيا ەلى COVID-19ىندەتىمەن كۇرەستە قازاقستانعا بارىنشا قولداۋ كورسەتىپ، مەملەكەتارالىق جانە مەديتسينالىق تۋريزم سالاسىنداعى ىنتىماقتاستىقتى بەكەمدەۋگە ۇمتىلىپ وتىر.

قوماقتى گۋمانيتارلىق تاپسىرۋ ءراسىمى كورەيا رەسپۋبليكاسىنىڭ باس كونسۋلدىعى عيماراتىندا ءوتىپ، وعان كورەيا رەسپۋبليكاسىنىڭ باس كونسۋلى كيم حىنگ سۋ مەن كورەيانىڭ ۇلتتىق تۋريزم ۇيىمىنىڭ الماتىداعى وكىلدىگىنىڭ ديرەكتورى سونگ پحيل سانگ، ال قازاقستان تاراپىنان ۇلتتىق ساراپتاما ورتالىعىنىڭ جەتەكشىسى التاي امانباەۆ قاتىستى.

گۋمانيتارلىق كومەكتى تاپسىرۋ بارىسىندا كورەيا رەسپۋبليكاسىنىڭ باس كونسۋلى كيم حىنگ سۋ مىرزا جاھاندىق پاندەميا كەسىرىنەن قانشاما ادامدار قۇربان بولعانىن جانە وراسان ماتەريالدىق شىعىن شەگىپ وتىرعانىمىزدى اتادى. كيم حىنگ سۋ مىرزا ءدال وسىنداي كۇردەلى كەزەڭدەردەن ءوتۋ ءۇشىن مەملەكەتتەردىڭ ءبىر بىرىنە دەگەن قامقورلىعى مەن كومەگى بۇرىنعىدان دا كوكەيكەستى سيپاتقا يە بولىپ وتىرعاندىعىن اتادى.

ال قازاقستان مەن كورەيا مەديتسينا سالاسىنداعى ستراتەگيالىق ارىپتەستەر بولىپ تابىلادى. سول سياقتى كورەيا پاندەميامەن ءتيىمدى كۇرەستە بۇكىل الەمگە ۇلگى بولا ءبىلدى. سوندىقتان دا بۇل ەل ىندەتپەن كۇرەستە بۇدان ءارى قاراي دا قازاقستانعا قولداۋ كورسەتىپ، كورەي تەحنولوگيالارىمەن جانە تاجىريبەسىمەن بولىسۋگە نيەتتى ەكەندىگىن ءبىلدىرىپ وتىر.

 

سوڭعى جاڭالىقتار

ۇقساس جاڭالىقتار