ايماقتار • 14 تامىز، 2020

تۇرعىندار تىلەگى نازاردا بولادى

59 رەت كورسەتىلدى

قازالى اۋدانىنىڭ اكىمى مۇرات ەرگەشباەۆ اۋىلداردى ارالاپ، «جۇمىسپەن قامتۋدىڭ جول كارتاسى» جانە «اۋىل – ەل بەسىگى» باعدارلامالارى اياسىندا اتقارىلىپ جاتقان جۇمىستارمەن تانىستى.  

وسى ساپار اۋدان باسشىسى اۋىل تۇرعىندارىمەن كەزدەسىپ، ءار سالا بويىنشا قويىلعان ساۋالدارعا جاۋاپ بەردى.

–   بيىل ءبارىمىز ءۇشىن قيىن ۋاقىت بولدى. الايدا حالىقتى ەڭبەكپەن قامتىپ، جۇمىسسىزدىقتىڭ الدىن الۋ ءۇشىن 2020-2021 جىلدارعا ارنالعان جۇمىسپەن قامتۋدىڭ جول كارتاسى قابىلداندى. سونىڭ ناتيجەسىندە وزەكتى ماسەلەلەردىڭ ءتۇيىنى تارقاتىلىپ، بىرقاتار شارۋانىڭ شەشىمى تابىلدى، – دەدى اۋدان اكىمى تۇرعىندارمەن كەزدەسۋدە.

كەزدەسۋگە جينالعان تۇرعىندار ەلدى مەكەندەردەگى كەيبىر ماسەلەلەردى ورتاعا سالدى. اۋىل كوشەلەرىن جوندەۋ، كاسىپكەرلىكپەن اينالىسۋشىلارعا قولداۋ كورسەتۋ، ينتەرنەت جەلىسىنىڭ جىلدامدىعىن ارتتىرۋ باعىتىندا ۇسىنىستار ايتىلدى.

ال، بەكارىستان بي مەن مايداكول اۋىلدارىنىڭ تۇرعىندارى مەديتسينا مەكەمەلەرىندەگى دارىگەرلەر سانىن كوبەيتۋدى سۇراسا، تۇكتىباەۆتىقتار اۋىلعا بانكومات ورناتۋ جونىندە ۇسىنىس ايتتى. وركەندەۋ اۋىلدىق وكرۋگىنىڭ حالقى جانكەنت پەن بىرلىك اۋىلدارىنا جاڭا جەدەل جاردەم كولىگىن الىپ، «قارلاڭ» وتكەلىنە تەمىر-بەتون كوپىر سالۋ جايىن قوزعادى.

ءوز كەزەگىندە اۋدان باسشىسى مۇرات ەرگەشباەۆ ەل ءۇشىن ماڭىزدى ماسەلەلەردى شەشۋ جولىندا بىرلەسە جۇمىس اتقاراتىندىعىن تىلگە تيەك ەتتى. تۇرعىندار تاراپىنان كوتەرىلگەن ۇسىنىس-پىكىرلەردىڭ ءاربىرى مۇقيات زەرتتەلىپ، كەيبىرىن وڭتايلى شەشۋ ءۇشىن سەنات دەپۋتاتتارىنىڭ نازارىنا جەتىكىزىلەتىن بولادى.

ايتا كەتەيىك، قازالى اۋدانىندا «جۇمىسپەن قامتۋدىڭ 2020-2021 جىلدارعا ارنالعان جول كارتاسى» مەملەكەتتىك باعدارلاماسىنىڭ اياسىندا قۇنى 3 ملرد 11 ملن 89 مىڭ تەڭگە بولاتىن 42 جوبا ىسكە اسىرىلىپ جاتىر. ال، «اۋىل – ەل بەسىگى» باعدارلاماسى ارقىلى بولىنگەن 930،4 ملن تەڭگەگە بەكارىستان بي اۋىلىندا اۋقىمدى جۇمىستار اتقارىلۋدا.

سوڭعى جاڭالىقتار

ۇقساس جاڭالىقتار