ايماقتار • 14 تامىز، 2020

جامبىل وبلىسىنا يرلانديادان اسىل تۇقىمدى سيىرلار اكەلىندى

36 رەت كورسەتىلدى

جامبىل وبلىسىنىڭ جالپاقتوبە اۋىلىنداعى "جامبىل ەت" جشس-نە يرلانديادان انگۋس تۇقىمدى ءىرى قارا مالدىڭ العاشقى پارتياسى جەتكىزىلدى، - دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.

جالپى، «سىباعا» باعدارلاماسى بويىنشا اتالعان كاسىپورىن 1000 باس ەت باعىتىنداعى تۇقىمدى ساتىپ الدى. نەسيەگە «اگرارلىق نەسيە كورپوراتسياسى» اق فيليالى ارقىلى قول جەتكىزگەن. نەگىزى ءىرى قارا مال تۇتىنۋشىلارعا بۇعان دەيىن جەتكىزىلۋى ءتيىس ەدى، بىراق پاندەمياعا بايلانىستى بۇل پروتسەسس كەيىنگە قالدىرىلعان بولاتىن.

«جامبىل-ەت» جشس ەت وندىرىسىنە ماماندانعان ءارى ءوندىرىستىڭ ايتارلىقتاي كولەمىن قامتاماسىز ەتۋگە نيەتتى. وسى ورايدا ەت باعىتىنداعى ءىرى قارا مالى باعۋمەن شىنداپ اينالىسۋعا دەن قويعان. كاسىپورىن ديرەكتورىنىڭ ورىنباسارى باقىت ەسقاليەۆتىڭ ايتۋىنشا، بۇل جاعدايدا انگۋس تۇقىمى وتە قولايلى ەكەن.

- بۇلار ازىرگە 10-15 ايلىق تانالار. ءبىز ولاردى الدىمەن كارانتينگە جىبەرەمىز، سودان كەيىن عانا جايىلىمعا شىعارامىز. وسى ۋاقىت ىشىندە ءبىز جانۋارلارعا ءتيىستى كۇتىم جاسايمىز. ول ءۇشىن بىزدە بارلىق جاعداي قاراستىرىلعان. جەم قورى، قاجەتتى دارۋمەندەر مەن مينەرالدار دايىندالعان، - دەيدى باقىت ەسقاليەۆ.

5 قىركۇيەككە دەيىن قالعان 600 باس مال سەرىكتەستىككە جەتكىزىلىپ، ول كارانتيننەن كەيىن جايىلىمدارعا جىبەرىلمەك.

- جامبىل اۋدانىندا جازدا مال ۇستاۋعا ارنالعان 1000 گەكتار جايىلىمدىق جەرىمىز بار. بۇل ازىرگە جەتكىلىكتى. قاجەت بولعان جاعدايدا، كەز-كەلگەن ۋاقىتتا قوسىمشا الاڭداردى جالعا الۋعا بولادى. قىستىق ماۋسىمعا ارنالعان جەم-ءشوپ قورى جەتكىلىكتى مولشەردە جينالدى، - دەيدى "جامبىل ەت" جشس ديرەكتورىنىڭ ورىنباسارى.

- انگۋس تۇقىمىنان باسقا، بولاشاقتا ەت-ءسۇت باعىتىنداعى Simmental تۇقىمدى ءىرى قارا مالىن ساتىپ الۋدى جوسپارلاپ وتىرمىز. بىزدە ءسۇت وندىرۋگە مۇمكىندىك بار. بىراق بۇل ازىرگە جوسپار عانا، - دەيدى «جامبىل ەت» جشس ديرەكتورى سۆەتا شاۋشەنوۆا.

اكەلىنگەن ءىرى قارا مالىن كۇتىپ، باپتاۋ ءۇشىن بارلىق جاعداي قاراستىرىلعان. كومپانيادا قازىرگى تاڭدا 35 ادام جۇمىس ىستەيدى. ورتاشا جالاقىلارى 120-130 مىڭ تەڭگە ارالىعىندا. وندا ەكى تراكتور، ەكى تيەۋ ارباسى جانە ۋاز اۆتوموبيلىنە نەگىزدەلگەن دەزينفەكتور بار.

جامبىل وبلىسى اكىمدىگى اۋىل شارۋاشىلىعى باسقارماسىنىڭ مال شارۋاشىلىعى ءبولىمىنىڭ باسشىسى بالجان ىسقاقوۆانىڭ ايتۋىنشا، 2020 جىلى «سىباعا» باعدارلاماسى بويىنشا وبلىستا 5 مىڭ باس ءىرى قارا مالىن ساتىپ الۋ جوسپارلانعان. بۇگىنگى تاڭدا 1 676 باس مال ساتىپ الىنعان.

سوڭعى جاڭالىقتار

ۇقساس جاڭالىقتار