ساياسات • 14 تامىز، 2020

رۋحاني جاڭعىرۋ: مازمۇنعا ءمان بەرەتىن كەز كەلدى

37 رەت كورسەتىلدى

پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا «رۋحاني جاڭعىرۋ» باعدارلاماسىنىڭ ىسكە اسىرىلۋ بارىسى مەن ونىڭ نەگىزگى ناتيجەلەرى تۋرالى ءباسپاسوز ءماسليحاتى ءوتتى. وعان اقپارات جانە قوعامدىق دامۋ ۆيتسە-ءمينيسترى بولات تىلەپوۆ جانە «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى قاتىستى.

وسىدان ءۇش جىل بۇرىن مەملەكەتتىك يدەولوگيانىڭ باعىتىن ايقىنداپ، باعدارىن بولجاعان «رۋحاني جاڭعىرۋ» باعدارلاماسى قولعا الىنعان ەدى. اتالعان باعدارلاما بيىل دا جۇيەلى جالعاسىن تاۋىپ، جاڭا كەزەڭگە قادام باستى. «بۇگىنگى «رۋحاني جاڭعىرۋدىڭ» باستى ماقساتى – قوعامدىق سانا، باستى شارتى – ۇلتتىق كودتى ساقتاۋ. كورىپ-ءبىلىپ وتىرسىزدار، الەم كۇن سايىن وزگەرىپ جاتىر. ايتىپ كەلمەگەن ىندەتتىڭ ءوزى ادامداردىڭ ءومىر سالتىن عانا ەمەس، تۇتاستاي مەملەكەتتەردىڭ ساياساتىن وزگەرتۋدە. ءبىرىنشى كەزەككە قازىر ەلدىڭ ءتان ساۋلىعى عانا ەمەس، جان ساۋلىعى، ياعني، رۋحاني كۇشى، ساۋاتى مەن ءتالىم-تاربيەسى شىعىپ وتىر. مۇنىڭ بارلىعى ءبىر كۇندە، ءبىر جىلدا بولا سالاتىن دۇنيە ەمەس. سەبەبى، ادامنىڭ ءتانىن ەمدەۋ قانشالىقتى قيىن بولسا، جانىن ەمدەۋ قيىننىڭ قيىنى. سوندىقتان قوعامنىڭ رۋحاني جاڭعىرۋ ماسەلەسىنە بەلگىلى ءبىر مەرزىمدى باعدارلاما دەپ ەمەس، ۇنەمى دامىتىپ، تولىقتىرىپ وتىراتىن ۇلكەن يدەيالىق تۇعىرناما دەپ قاراعان ءجون»، دەدى ب.تىلەپوۆ.

ونىڭ ايتۋىنشا، وتكەن ءۇش جىلدا باعدارلامانى باسقارۋدىڭ ينستيتۋتتىق نەگىزى تولىق قالىپتاستىرىلدى. بارلىق ايماقتاردا جوبالىق كەڭسەلەر اشىلىپ، ءار ءوڭىردىڭ ەرەكشەلىگىنە بايلانىستى مازمۇندى جوسپارلار قۇرىلدى. مينيسترلىك جانىنان قوعامدىق دامۋ ينستيتۋتى جولعا قويىلدى، جەرگىلىكتى اتقارۋشى ورگاندار جانە وڭىرلىك جوبالىق كەڭسەلەرمەن جۇمىس جانداندىرىلدى، تالدامالىق جانە ادىستەمەلىك سۇيەمەلدەۋدى قامتاماسىز ەتەتىن قازاقستاندىق قوعامدىق دامۋ ينستيتۋتىنىڭ قىزمەتى جولعا قويىلدى. وعان عىلىمي-ساراپتامالىق مىندەتتەن بولەك، وڭىرلىك كەڭسەلەردەگى ماماندارعا ادىستەمەلىك كومەك كورسەتۋ جۇمىسى جۇكتەلدى. سونىمەن قاتار 6 باعىت بويىنشا 13 جوبا بەكىتىلىپ، ولاردىڭ اياسىندا ونداعان مىڭ ءىس-شارالار ءوتتى. «بۇل جەردە ءبىز ءۇشىن ماڭىزدىسى سان ەمەس، ساپا. سەبەبى، تاجىريبە كورسەتكەندەي، كەيبىر جەرلەردە ەسەپتىلىك، ناۋقانشىلدىق سياقتى ۇردىستەردىڭ ورىن العانى جاسىرىن ەمەس. بۇل تۋرالى جىل باسىندا وتكەن مەملەكەتتىك كوميسسيانىڭ وتىرىسىندا دا ناقتى ايتىلدى. ناتيجەسىندە، وڭىرلەردەگى بارلىق ءىس-شارالارعا قايتا تالداۋ جاسالىپ، رۋحاني جاڭعىرۋعا مۇلدەم قاتىسى جوق، مازمۇنى ساياز، ماقساتى سۇيىق كوپتەگەن شارالار الىنىپ تاستالدى»، دەدى ۆيتسە-مينيستر.

وتكىزىلەتىن ءىس-شارالاردىڭ سانى ەمەس، ساپاسى ماڭىزدى ەكەنىن ايتقان ۆيتسە-مينيستر بۇل مىندەتكە قول جەتكىزۋ ءۇشىن باعدارلامانى ىسكە اسىرۋدىڭ ءۇش باعىتى بەكىتىلگەنىن جەتكىزدى. ونىڭ ايتۋىنشا، ءبىرىنشى، «تۇلعالىق دامۋ» باعىتىنا ءبىلىمنىڭ سالتانات قۇرۋى، باسەكەگە قابىلەتتىلىك، سانانىڭ اشىقتىعى، پراگماتيزم قاعيداتتارى كىردى. ەكىنشى باعىت – ۇلتتىق بىرەگەيلىكتى ساقتاۋ، حالىقارالىق مارتەبەنى ارتتىرۋ. ءۇشىنشى باعىت – مەملەكەتتىڭ، ازاماتتىق قوعامنىڭ جانە جەرگىلىكتى قوعامداستىقتاردىڭ دامۋى. اتالعان باعىتتاردى ىسكە اسىرۋ ءۇشىن ورتالىق مەملەكەتتىك ورگاندار مەن جەرگىلىكتى اتقارۋشى ورگاندارعا ارنالعان ارنايى ۇسىنىمدار ازىرلەنىپ، جىبەرىلدى. وسى رەتتە جوعارىدا اتالعان تىزىمنەن «تۋعان جەر» جوباسىن ادەيى اتاپ وتكىم كەلەدى. وزدەرىڭىز بىلەسىزدەر، 2018 جىلدان باستاپ مينيسترلىك «جومارت جۇرەك» سىيلىعىن تاعايىنداپ، ونى قايىرىمدىلىققا جانى جاقىن جاندارعا جىل سايىن ۇسىنىپ كەلەدى. ولاردىڭ ىشىندە، تۋعان ولكەسىنە ەرەكشە ۇلەس قوسىپ جۇرگەن تۇلعالاردىڭ ورنى بولەك. باعدارلامانى ىسكە اسىرۋدىڭ ءۇش جىلىندا وسىنداي 12 مىڭ مەتسەناتتىڭ دەمەۋشىلىگىمەن 270 ملرد تەڭگەنىڭ جۇمىسى اتقارىلدى»، – دەدى ب.تىلەپوۆ.

ۆيتسە-ءمينيستردىڭ ايتۋىنشا، جومارت جۇرەكتى ازاماتتاردىڭ قولداۋىمەن 2600-دەن استام ءتۇرلى الەۋمەتتىك-رۋحاني ماڭىزى بار نىسان تۇرعىزىلىپ، 2142 نىسان قايتا جوندەۋدەن ءوتتى. بيىلعى قيىندىقتارعا قاراماستان، 2131 دەمەۋشىنىڭ ارقاسىندا ەلىمىزدىڭ ءار ايماعىندا 228 نىسان سالىنىپتى. ونىڭ ىشىندە 2 مەكتەپ، 2 بالاباقشا، 19 مادەنيەت نىسانى، 36 سپورت الاڭى، 31 بالالار الاڭى بار. بۇل جۇمىس الداعى ۋاقىتتا دا جالعاسىن تابادى. ول ءۇشىن مينيسترلىك تاراپىنان دا، جەرگىلىكتى بيلىك تاراپىنان دا قاجەتتى جاعداي جاسالادى.

«رۋحاني جاڭعىرۋ» باعدارلاماسىنىڭ ءبىر تارماعى – «جاڭا گۋمانيتارلىق ءبىلىم – قازاق تىلىندەگى 100 جاڭا وقۋلىق» باعدارلاماسى. ۇلتتىق اۋدارما بيۋروسى كىتاپتاردى اۋدارۋ جۇمىسىن 2017 جىلدان باستاپ قولعا العان بولاتىن. ءباسپاسوز ءماسليحاتى بارىسىندا «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى وسى باعىتتا اتقارىلىپ جاتقان جۇمىستارعا توقتالدى. ونىڭ ايتۋىنشا بۇل جۇمىسقا 300-دەن استام عالىم، اۋدارماشىلار تارتىلعان. جوبانىڭ نەگىزگى ماقساتى دۇنيە جۇزىندەگى ەڭ ىرگەلى وقۋ ورىندارىنىڭ وقۋ باعدارلاماسىنا ەنگەن وقۋلىقتاردى قازاق تىلىنە اۋدارىپ، وتاندىق جوعارى وقۋ ورىندارىنا تەگىن جەتكىزۋ. «بۇگىندە ەلىمىزدە 1،5 ملن ستۋدەنت بار. ولاردىڭ 70%-دان استامى قازاق تىلىندە ءبىلىم الىپ جاتىر. جوبانى ىسكە اسىرۋ ءۇشىن وقۋ ورىندارىنداعى فاكۋلتەتتەر قاجەتتى دەگەن كىتاپتاردىڭ ءتىزىمىن بەردى. بيىلعى اۋدارىلعان وقۋلىقتاردىڭ دەنى شىعارماشىلىق باعىتتا وقىتىلاتىن ستۋدەنتتەرگە ارنالدى»، دەدى ر.كەنجەحان ۇلى. ونىڭ ايتۋىنشا، 2017 جىلدان بەرى 77 وقۋلىق اۋدارىلىپ، ولار 10 مىڭ دانامەن جارىق كورىپتى. بۇل وقۋلىقتار ەلىمىزدەگى 132 جوعارى وقۋ ورنىنىڭ كىتاپ قورىنا جەتكىزىلگەن. سونىمەن قاتار وقۋلىقتاردىڭ ەلەكتروندى نۇسقالارى «قازاقستاننىڭ اشىق ۋنيۆەرسيتەتى» پورتالىنا ەنگىزىلدى. ال بيىل اۋدارىلعان 30 جاڭا كىتاپ – كينو، تەاتر ونەرى، مۋزىكا سالاسىنداعى الەمنىڭ ۇزدىك عالىمدارىنىڭ ەڭبەكتەرىن جانە قۇقىقتانۋ باعىتىنداعى بىرنەشە باسىلىمدى قۇرايدى. كىتاپتاردىڭ تولىق ءتىزىمىن 100 كىتاپتىڭ رەسمي سايتىنان كورۋگە بولادى.

 

سوڭعى جاڭالىقتار

اتىراۋدا 9 بالانى يت تالادى

ايماقتار • بۇگىن، 19:57

ۇقساس جاڭالىقتار