بۇل بەتپەردە نازارباەۆ ۋنيۆەرسيتەت جانىنداعى تەحنوپاركتە ۋلترادىبىستىق تەحنولوگيا بويىنشا شىعارىلادى. وندىرۋشىلەر ماسكا باكتەريانىڭ 99,99 پايىزىن, ۆيرۋستىڭ 98,89 پايىزىن جوياتىنىنا كەپىلدىك بەرەدى. بۇل الەمنىڭ ءارتۇرلى ءىرى عىلىمي-زەرتتەۋ ورتالىقتارىنىڭ زەرتحانالىق زەرتتەۋلەرى ناتيجەسىندە راستالعان. حالىقارالىق ستاندارتتارعا سايكەس كەلەدى.
وندىرۋشىلەردىڭ ايتۋىنشا, بەتپەردەنى ءبىر جىل بويى قولدانۋعا بولادى, ءجۇز رەت جۋ تسيكلىنان كەيىن دە قاسيەتى جويىلمايدى. ايتا كەتۋ كەرەك, پاندەميا كەزىندە «Qamqor Tech» كومپانياسى وزىق جانە بىرەگەي تەحنولوگيانى قولدانا وتىرىپ, جۇزدەگەن ادامنىڭ ءومىرىن قۇتقارۋ ءۇشىن COVID-19 ۆيرۋسىنىڭ تارالۋىنا قارسى كۇرەسكە اتسالىسۋعا شەشىم قابىلدادى.
يزرايلدىك «Sonovia» كومپانياسىنىڭ ونىمدەرى ەۋروپا مەن اقش نارىقتارىن قامتيدى, كومپانيانىڭ ۆيرۋسقا قارسى ماسكالارى تمد جانە وڭتۇستىك-شىعىس ازيا نارىقتارىندا قازاقستاندىق «Qamqor Tech» كومپانياسىنىڭ برەندىمەن ۇسىنىلۋدا.
– بۇگىنگى تاڭدا وسى جوباعا سالىنعان ينۆەستيتسيا كولەمى 140 ملن تەڭگەدەن اسادى, الداعى ۋاقىتتا ءوندىرىستى جاڭعىرتۋ, ءونىم تۇرلەرىن كوبەيتۋ اياسىندا كوپتەگەن جۇمىستار اتقارىلادى, – دەيدى كومپانيا وكىلدەرى.
ايتا كەتۋ كەرەك, «SONOMASK» ماسكالارىنىڭ ەرەكشەلىگى تۋرالى New York Times, Reuters, The Guardian, I24 News, VogueBusiness, The Independent سىندى شەتەلدىك بەدەلدى باسىلىمدار جازعان بولاتىن.
گۋمانيتارلىق كومەك اياسىندا «Sonovia» كومپانياسى پاندەمياعا قارسى كۇرەستە العى شەپتە جۇرگەن دارىگەرلەرگە قورعانىس ماسكالارىن تاپسىردى. بەتپەردەلەر ۇلتتىق عىلىمي كارديوحيرۋرگيالىق ورتالىققا جانە №1 قالالىق اۋرۋحاناعا بەرىلدى.
