رەيدتەر ناتيجەسىندە جاعاجاي ماۋسىمى باستالعاننان بەرى نۇر-سۇلتاندا 114 ادام جاۋاپكەرشىلىككە تارتىلدى.
«جاعاجاي ماۋسىمىنىڭ باسىنان بەرى 1992 ادامدى قامتىعان 596 رەيد ۇيىمداستىرىلىپ, 114 ادام اكىمشىلىك جاۋاپكەرشىلىككە تارتىلدى. جۇمىستارعا 503 مەملەكەتتىك قىزمەتكەر تارتىلىپ, 12200 بۋكلەتتەر مەن بروشيۋرالار تاراتىلدى, باق-تا 151 ماتەريال جاريالاندى, 155 تىيىم سالۋ بەلگىلەرى, 20 اقپاراتتىق ستەندتەر جانە 20 قالقىما بەلگى ورناتىلدى», - دەپ حابارلادى ەلوردانىڭ توتەنشە جاعدايلار دەپارتامەنتى.
ەلوردانىڭ بارلىق سۋ نىساندارىن كۇن سايىن 14 قايىقپەن جابدىقتالعان 80 توتەنشە جاعداي قىزمەتكەرلەرى كۇزەتەدى. سونداي-اق پاترۋلدىك كولىكتەر قالا ماڭىنداعى سۋ جولدارىنىڭ جانىندا ورنالاسىپ, كولىكتەردىڭ كىرۋىنە تىيىم سالۋدى قامتاماسىز ەتەدى.
شومىلاتىن جەرلەردە ءتارتىپتى قوعامدىق قۇتقارۋشىلار مەن اۋداندىق بولىمشەلەردىڭ قىزمەتكەرلەرى قاداعالايدى. بۇگىندە قوعامدىق قۇتقارۋشىلار قارقىندى جۇمىس جاساۋدا. بەلسەندىلەر رەيد جۇرگىزىپ, سۋ قاۋىپسىزدىگى ەرەجەلەرىن الەۋمەتتىك جەلىدە تاراتۋدا. سوڭعى ءۇش جىلدا ولاردىڭ قاتىسۋىمەن 24 ادام قۇتقارىلدى.
