قوعام • 13 تامىز، 2020

سوڭعى پاتسيەنت ۇيىنە قايتتى

22 رەت كورسەتىلدى

«ادامنىڭ ءبىر اتى پەندە بولعاسىن ەجەلدەن ەكى نىعمەتتىڭ قادىرىن بىلمەيدى» دەيدى ىلگەرىدەگى ءىلىم يەلەرى. ونىڭ ءبىرى دەنساۋلىق، ەندى ءبىرى بوس ۋاقىت ەكەن. سوڭعى كەزدەگى الەمدى ابىگەرگە سالعان ىندەت تىنىمسىز تىنىس الۋدىڭ دا قانشالىقتى قۇندى ەكەنىن ءتۇسىندىرىپ بەرگەندەي بولدى. بۇگىندە الاڭداعان كوڭىل، ابدىراعان ءومىر ارناسىنا ءتۇسىپ كەلەدى. شالدىققانداردان شيپا قونعانداردىڭ قاتارى قالىڭدادى.

سوزىمىزگە دالەل، كۇنى كەشە دەن­ساۋ­لىق ساقتاۋ مينيسترلىگى «وتان سو­عىسىنىڭ مۇگەدەكتەرىنە ارنالعان ورتالىق كلينيكالىق گوسپيتالىنەن» كوروناۆيرۋستىق ينفەكتسيانى جۇق­تىر­عان سوڭعى پاتسيەنت ەمدەلىپ شىق­قا­نى تۋرالى اقجولتاي حابار تاراتتى. 24 ماۋ­سىمنان باستاپ اتالعان مي­نيسترلىكتىڭ بۇيرىعىنا سايكەس گوس­پيتال سovid-19 كوروناۆيرۋس ين­فەك­تسياسىنا كۇدىك بولعان كەزدە پاتسيەنتتەردى تەكسەرە وتىرىپ، ۆيرۋستىڭ بار نەمەسە جوق ەكەنىن ايقىنداۋ ءۇشىن، ەمدەۋگە جاتقىزاتىن پروۆيزورلىق ستاتسيونار بولىپ بەكىتىلگەن ەدى. جەتى اپتا ىشىندە گوسپيتالگە Covid-19 ىقتيمال جاعدايى بار 730 پاتسيەنت تۇسكەن، ونىڭ ىشىندە 335 پاتسيەنت وڭ ناتيجەمەن باسقا ستاتسيو­نارلارعا اۋىستىرىلعان، قال­عان­دارى گوسپيتالدەن ەمدەلىپ شىقان. ورتالىقتاعى مامانداردىڭ بىلىكتى­لى­گىنىڭ ناتيجەسىندە بىردە-ءبىر ءولىم وقيعاسى تىركەلمەگەن.

گوسپيتال ديرەكتورى دينارا ورازالينا پاتسيەنتتەردىڭ جاس ەرەك­شە­لىكتەرى 18 جاس پەن 90 جاس ارالىعىن قامتىعانىن ايتادى.

ء«بىز 50 كۇن بويى كۇنى-ءتۇنى توقتاماي جۇمىس ىستەدىك. اسىرەسە، العاشقى كەزەڭدەرى قيىن بولدى. سەبەبى كوروناۆيرۋس ينفەكتسياسىمەن كۇرەستە بۇرىن تاجىريبە بولماعان. ورتالىق قىزمەتكەرلەرى جاعدايى ناشار ناۋ­قاس­تارمەن جۇمىس ىستەپ تاجىريبە جي­ناقتاعان. سول قىزمەت بارىسىنداعى جيناعان تاجىريبەمىز سەپتىگىن تيگىزدى دەپ ايتا الامىن. ءبىزدىڭ ورتالىق ماماندارى از ۋاقىتتىڭ ىشىندە ۆيرۋسقا قارسى كۇرەستە كوپ دۇنيە ۇيرەندى»، دەيدى ول.

ەندى ورتالىققا زارارسىزداندىرۋ جاسالادى. ءتيىستى قورىتىندى شىققان سوڭ گوسپيتال بۇرىنعى بەيىنى بويىنشا جۇمىسىن جالعاستىرادى. گوسپيتال دارىگەرلەرى، مەيىرگەرلەرى مەن سانيتارلارى سوڭعى ساۋىققان 68 جاستاعى پاتسيەنت كەنجەتاي دۇيسەن­باي ۇلىن قوشەمەتتەپ شىعارىپ سالدى. ول جۋرناليستەرگە بەرگەن سۇحباتىندا اتالعان ورتالىققا اۋا جەتپەي، ەنتىگىپ كەلگەنىن جەتكىزدى.

«جاسىم – 68-دە. بۇعان دەيىن جامبىل وبلىسىنىڭ جامبىل اۋدانى اسا اۋىلىندا 10 كۇن اۋرۋحانادا جاتتىم. ول جاقتاعى دارىگەرلەر دە ايانباي ەڭبەك ەتىپ، قولدان كەلگەننىڭ ءبارىن ىستەدى. ولارعا دا راقمەت. كەيىن وسى جەرگە اۋىستىرىلىپ، تاعى 12 كۇن ەمدەلدىم. اۋا جەتپەي، ەنتىگىپ كەلىپ ەدىم. وكپەنى جاساندى جەلدەتۋ اپپاراتىنا قوسىپ، ءدارى-دارمەكپەن ەمدەدى. وسى قيىندىقتىڭ ءبارى ارتتا قالسىن. دارىگەرلەر ۇجىمىنا العىسىم شەكسىز»، دەيدى ەمدەلىپ شىققان سوڭعى پاتسيەنت.

«اۋرۋ باتپانداپ كىرىپ، مىسقالداپ شىعادى» دەگەن ءتالىمدى ءتامسىل بار. جاسىڭا قارامايتىن جاسىرىن جاۋ سياقتى كورىنگەن ىندەت ىرگەمىزدەن ءىزىن سۋىتىپ، ەمدەلىپ شىققاندار ەندى قايتىپ ەمحانا ەسىگىن كورمەسە دەيمىز.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار