ايماقتار • 12 تامىز، 2020

الەۋمەتتىك دۇكەندەر تۇرعىندار ءۇشىن ءتيىمدى

39 رەت كورسەتىلدى

«بايقوڭىر» الەۋمەتتىك كاسىپكەرلىك كورپوراتسياسى» اق باسشىلىعى وبلىس ورتالىعىنداعى بىرقاتار ساۋدا ورىندارىنىڭ جەتەكشىلەرىمەن كەزدەستى. ءوز دۇكەندەرىنەن الەۋمەتتىك بۇرىش اشقان «اجار سيتي»، «ال-اساد»، «انۆار»، «ميراس»، «الەۋمەتتىك ماركەت» ساۋدا ۇيلەرى مەن «قىزىلوردا وپتوماركەتى» ساۋدا جەلىسى وكىلدەرى قاتىسقان كەزدەسۋدە ازىق-ت ۇلىك ونىمدەرىنىڭ باعاسى مەن ساپاسى، حالىقتى باعاسى ارزان ونىممەن قامتۋدىڭ باسقا دا تاسىلدەرى جايلى ايتىلدى.

- حالىققا ەڭ قاجەتتى، الەۋمەتتىك ماڭىزى بار 19 ءتۇرلى ازىق-ت ۇلىك ونىمدەرى باعاسىنىڭ قىمباتتاماۋى بۇگىنگى كۇننىڭ باستى تالابىنىڭ ءبىرى. مەملەكەت باسشىسى مىندەتتەگەن بۇل تاپسىرمانىڭ ورىندالۋىن وبلىس اكىمدىگى دە تۇراقتى قاداعالاۋدا. ءبىزدىڭ كورپوراتسيا بۇل باعىتتا ءبىراز جۇمىستى قولعا الدى. ونىڭ العاشقى ناتيجەلەرى دە جامان ەمەس. الداعى ۋاقىتتا جۇرتشىلىق ءۇشىن ساۋدا ورىندارىنان الەۋمەتتىك بۇرىشتار اشۋدى جالعاستىرا بەرەمىز، – دەدى «بايقوڭىر» اكك» اق باسقارما توراعاسى ەرلان نۇرلانباەۆ.

«اجار سيتي» ساۋدا ءۇيى «بايقوڭىر» اكك» اق-مەن تۇراقتى جۇمىس جاساپ كەلە جاتقان نىساننىڭ ءبىرى. بيىل ساۋدا ۇيىنە زاەم نەگىزىندە 50 ملن. تەڭگە بەرىلىپ، «اجار سيتي» بەلگىلەنگەن ساۋدا ورىندارىندا 19 الەۋمەتتىك ماڭىزى بار ازىق-ت ۇلىك ونىمدەرىن بازار نارقىنان 10-15 پايىز تومەن باعادا ساۋدالاۋدا. 

«الەۋمەتتىك ماركەت» ساۋدا ءۇيىنىڭ قۇرىلتايشىسى «دانچو» جك قازىر وبلىس ورتالىعىنداعى 29 الەۋمەتتىك دۇكەننىڭ 20-سىن جالعا الىپ جۇمىس جاسايدى. ولارعا قويىلعان باستى تالاپ – 19 تاۋاردى حالىققا ءتيىمدى باعامەن ساتۋ. قازىر تۇرعىندار بۇل باستاماعا ريزاشىلىقتارىن ءبىلدىرىپ وتىر.

«بايقوڭىر» اكك» اق باسقارما توراعاسى وزگە دە ساۋدا ۇيلەرى باسشىلارىنا وسىنداي جولمەن بىرلەسە جۇمىس ىستەۋدى ۇسىندى. كەزدەسۋدە كاسىپكەرلەر تاراپىنان كەي ونىمدەردىڭ ساپاسى مەن  باعاسى جايلى ۇسىنىستار ايتىلدى. «اسىرەسە، سوڭعى اپتادا كارتوپ پەن قىرىققاباتتىڭ ءبىراز بولىگى جارامسىز بولىپ شىقتى، ولاردى سۇرىپتاعاننان كەيىنگى ساتۋ باعاسى شىعىنىمىزدى اقتامايدى. سوندىقتان باعاسىن ءسال دە بولسا كوتەرۋدى سۇرايمىز» دەدى كەيبىر ساۋدا ورىندارىنىڭ وكىلدەرى. وسىعان بايلانىستى باسقارما توراعاسى ەرلان نۇرلانباەۆ ءتيىستى ماماندارعا تەز ارادا ماسەلەنى شەشۋدى تاپسىردى.

- جەدەل تۇردە ءونىم ساپاسىن جاقسارتامىز. وعان مۇمكىندىگىمىز جەتەدى. بىراق، باعا قىمباتتامايدى. ءار دۇكەندە حالىققا ءتيىمدى الەۋمەتتىك بۇرىشتار جۇمىسىن جالعاستىرا بەرۋى كەرەك، – دەدى ول.

وڭىرگە ازىق-ت ۇلىك ونىمدەرىنىڭ بارلىعى دەرلىك سىرتتان جەتكىزىلەدى. وسىعان بايلانىستى وڭىردە وڭدەۋ ونەركاسىبىن قولعا الۋعا بولادى جانە ولارعا «بايقوڭىر» اكك» اق قولداۋ كورسەتەدى. جيىن سوڭىندا ەرلان قۇماربەك ۇلى كاسىپكەرلەردى وسى ماسەلەگە بايلانىستى ۇسىنىس بەرۋگە شاقىردى.

 

 

 

سوڭعى جاڭالىقتار

تسيرك - الەم نازارىندا

قازاقستان • كەشە

ۇقساس جاڭالىقتار