بيىلعى شومىلۋ ماۋسىمى اشىلعالى بەرى الاكول جاعاسىنا كەلگەن دەمالۋشىلاردىڭ سانى 629 مىڭنان اسىپتى. قازىرگە دەيىن تۋريستەرگە 3 ملرد 739 ملن تەڭگەگە سەريۆيستىك قىزمەتى كورسەتىلگەن ەكەن. ال شومىلۋ ماۋسىمىنىڭ سوڭىنا دەيىن كولگە كەلەتىن تۋريست سانى 1 ملن ادامنان اسادى دەگەن بولجام بار. قازىر كول جاعالاۋىندا 262 ءىرىلى-ۇساقتى نىسان تۋريستەرگە قىزمەت كورسەتىپ وتىر ەكەن. تۋريستەردىڭ نەگىزگى اعىنى جەڭىل كولىك جانە ارنايى اۆتوبۋسپەن كەلىپ جاتقان كورىنەدى. سونداي-اق «الماتى-جەتىگەن-دوستىق» تەمىرجولى باعىتى مەن اپتاسىنا جەتى رەت «استانا-ءۇشارال-استانا», «الماتى-ءۇشارال-الماتى» جانە «تالدىقورعان-ءۇشارال-تالدىقورعان» اۋە قاتىناسى ارقىلى كەلۋشىلەر كوبەيگەن. شومىلۋ ماۋسىمى قىزعان شاقتا كولگە كەلۋشىلەردىڭ كۇن سايىنعى ۇلەس 12 512 ادامعا دەيىن جەتىپ وتىر.
- كارانتين رەجيمى كەزىندە كول جاعالاۋىنداعى سانيتارلىق نورمالاردىڭ ساقتالۋىن قامتاماسىز ەتۋ ماقساتىندا ارنايى مونيتورينگ توپ قۇرىلعان. قازىر اۋداندا 4 توبى كۇندەلىكتى جۇمىس ىستەۋدە. ساقتىق شاراسى جوعارى دەڭگەيدە. مونيتورينگ توبىنىڭ زەردەلەۋ جۇمىستارى بارىسىندا سانيتارلىق تالاپتاردى بۇزعان 17 ستيحيالىق شاتىرلى لاگەر جابىلدى. سونداي-اق, كول جاعاسىنداعى تىيىم سالىنعان, زاڭسىز ساۋدا جۇرگىزگەن تۇلعالارعا ەسكەرتۋ بەرىلىپ, ايىپپۇل دا سالىندى. مۇنىڭ ءبارى تۋريستەردىڭ قاۋىپسىزدىگى ءۇشىن جاسالىپ وتىر. تالاپ بويىنشا ءار دەمالىس ورنى كەلگەن تۋريستەرگە قىزمەت كورسەتەر الدىندا نىساننىڭ دايىندىق اكتىسىن الادى. نىسانعا رۇقسات بەرىلگەن جاعدايدا عانا جۇمىستارىن باستايدى. قازىر وسى ەرەجەگە سايكەس اۋداندا تۋريزممەن اينالىساتىن 262 نىسان اراسىنان 171دەمالىس ورىنىنا جۇمىس ىستەۋگە رۇقسات بەرىلگەن. بۇل ورتالىقتاردا بارلىق سانيتارلىق نورمالار ساقتالعان, - دەيدى الاكول اۋدانىنىڭ اكىمى الىبەك جاقانباەۆ.
ايتپاقشى, پاندەميا كەزىندەگى شەكتەۋلەر شەت ەل نارىعىنا اعىلعان قارجىنى وتاندىق ءتۋريزمنىڭ كادەسىنە جاراتۋعا ىقپال ەتە باستاپتى. ياعني, بيىل شەكارا اسىپ بارىپ شومىلۋشىلار ازايىپ, الاكولدىڭ ايدىنىنا سۇڭگىشۋلەر سانى وسكەن. ماسەلەن, وتاندىق شوۋ بيزنەستىڭ تانىمال وكىلى, پروديۋسسەر بايان الاكوزوۆا بيىلعى دەمالىس الاكول جاعالايىندا وتكىزىپتى. بۇل جايىندا بايان ماقساتقىزى ءوزىنىڭ Instagram جەلىسىندەگى پاراقشاسىندا جاريالاعان ەكەن. ء«بىزدىڭ ءتۋريزمنىڭ بولاشاعى بار ەكەنى ءسوزسىز. ەلەستەتىپ كورسەڭىز تۇركيانىڭ كۇنشۋاقتى جەرىندە جۇرگەندەي سەزىلەدى. الايدا, بۇل ءوزىمىزدىڭ ەل, قازاقستاندا ەكەنى قاتتى قۋانتادى. الاكول - الماتى وبلىسىنىڭ ءىنجۋ-مارجانى. كول سۋى جىلى, تازا, ءمولدىر, ءارى تۇنىق. مەن عاشىق بولدىم... دەپ جازادى ول.
جالپى, وتاندىق ءتۋريزمنىڭ دامۋىنا جاسالعان قولداۋدىڭ ارقاسىندا الاكول جاعالاۋىنداعى دەمالىس ورىندارىنىڭ ينفراقۇرىلىمىن جاقسارتۋ جۇمىستارى توقتاۋسىز ءجۇرىپ جاتىر. قازىر الماتى وبلىسىنىڭ اۋماعىنا كىرەتىن كول جاعالاۋىنداعى تۋريستەر ءۇشىن جاسالعان جاعداي شەتەلدىك تانىمال كۋرورتتاردىڭ ساپاسىنان كەم تۇسپەيدى. قىزمەت كورسەتۋ ساپاسى دا جىلدان جىلعا جوعارىلاپ كەلەدى. مىسالعا, بىلتىر الاكولدە 1 340 000 ادام دەمالسا, ولارعا كورسەتىلگەن سەرۆيس قۇنى 7,9 ملرد تەڭگەگە جەتكەن ەدى.
الماتى وبلىسى
